ഉർവശിയും ജോജു ജോർജ്ജും ഐശ്വര്യ ലക്ഷ്മിയും പ്രധാന വേഷങ്ങളിലെത്തിയ ‘ആശ’ തിയേറ്ററുകളിൽ മികച്ച പ്രേക്ഷക നിരൂപക പ്രശംസ നേടി മുന്നേറുന്നതിനിടെ ഉർവശിയെ കുറിച്ച് സംവിധായകൻ എം എ നിഷാദ് സോഷ്യൽ മീഡിയയിൽ കുറിച്ച വാക്കുകൾ ശ്രദ്ധ നേടുന്നു. ‘ഉർവശി മലയാളത്തിൻറെ അൽ പച്ചീനോ’ എന്നാണ് അദ്ദേഹം വിശേഷിപ്പിച്ചിരിക്കുന്നത്. സൂക്ഷ്മാഭിനയത്തിന്റെ താളലയങ്ങളിലൂടെ ലോകത്തെ വിസ്മയിപ്പിച്ച നടനാണ് അൽ പച്ചീനോയെന്നും അതുപോലെ ഉർവശി പ്രേക്ഷകരെ സ്വാഭാവികാഭിനയത്തിലൂടെ അത്ഭുതപ്പെടുത്തുകയാണെന്നും എം എ നിഷാദ് പറഞ്ഞു. ആശയിലെ പ്രകടനം അതിഗംഭീരമാണെന്നും അദ്ദേഹം അഭിപ്രായപ്പെട്ടു.
‘അഭിനയ മോഹിയായ ഏതൊരാൾക്കും പഠിക്കാൻ ഒരു അക്കാഡമിയിലോ, ആക്റ്റിംഗ് സ്ക്കൂളിലോ പോകണ്ട… സ്ക്രീനിൽ ഉർവശിയുടെ കഥാപാത്രങ്ങൾ കണ്ട് മനസ്സിലാക്കിയാൽ മാത്രം മതി… ആശ പൂർണ്ണമായും ഒരു ഉർവശി ചിത്രമാണ്,’ എന്നും എം എ നിഷാദ് പറഞ്ഞു. കഴിഞ്ഞ ദിവസം തിയേറ്ററുകളിലെത്തിയ ആശ മികച്ച പ്രതികരണമാണ് നേടുന്നത്. സൈക്കോളജിക്കൽ ത്രില്ലർ ഴോണറിലെ മികച്ച മലയാളചിത്രങ്ങളിലൊന്നാണ് ആശയെന്നാണ് ഉയരുന്ന അഭിപ്രായം. നവാഗതനായ സഫർ സനലാണ് ചിത്രം സംവിധാനം ചെയ്തിരിക്കുന്നത്. മധു നീലകണ്ഠന്റെ ഛായാഗ്രഹണ മികവും ഷാൻ മുഹമ്മദിന്റെ കൃത്യതയാർന്ന എഡിറ്റിംഗും ഗോവിന്ദ് വസന്ത ഒരുക്കിയിരിക്കുന്ന പശ്ചാത്തല സംഗീതവും പാട്ടുകളും തീർച്ചയായും ഒരു വരിഞ്ഞുമുറുക്കുന്ന അനുഭവം സമ്മാനിക്കുന്നു എന്നാണ് പ്രേക്ഷക പ്രതികരണം.
എം എ നിഷാദിന്റെ ഫേസ്ബുക്ക് കുറിപ്പിന്റെ പൂർണരൂപം
‘ഉർവശി മലയാളത്തിൻറെ അൽ പച്ചീനോ… അൽഫ്രെദോ ജയിംസ് അൽ പച്ചീനോ എന്ന വിശ്വ വിഖ്യാതനായ നടനെ പറ്റി നിങ്ങൾ കേട്ടിട്ടുണ്ടാവും എന്ന് ഞാൻ വിശ്വസിക്കുന്നു. ലോക പ്രശസ്തനായ അമേരിക്കൻ ആക്റ്റർ. ദ ഗോഡ് ഫാദർ, സ്കാർഫേസ്, സെൻറെ ഓഫ് എ വുമൺ, ഏഞ്ചൽസ് ഇൻ അമേരിക്ക പോലെയുളള ചിത്രങ്ങളിലെ പ്രകടനത്തിന് ഒരേ സമയം പ്രേക്ഷക പ്രശംസയും പുരസ്ക്കാരങ്ങളും നേടിയ അഭിനേതാവ്.
സൂക്ഷ്മാഭിനയത്തിൻറെ താളലയങ്ങളിൽ ലോകത്തെ വിസ്മയിപ്പിച്ച നടൻ. ഇങ്ങ് നമ്മുടെ കൊച്ച് കേരളത്തിൽ സ്വാഭാവിക അഭിനയത്തിലൂടെ നമ്മെ വിസ്മയിപ്പിക്കുന്ന നമ്മുടെ മാത്രം ഉർവശി, അൽ പച്ചീനയുടെ വെളളിത്തിരയിലെ പ്രകടനത്തെ ഓർമ്മപ്പെടുത്തുന്നു ‘ആശ’ എന്ന ചിത്രത്തിലൂടെ. എല്ലാ വാദ്യങ്ങളും ചെണ്ടക്ക് താഴെ, എന്ന ചൊല്ല് അന്വർത്ഥമാക്കുന്ന പ്രകടനം… അതെ ഉർവ്വശിയോളം, ഉർവ്വശി മാത്രം.. അഭിനയ മോഹിയായ ഏതൊരാൾക്കും പഠിക്കാൻ ഒരു അക്കാഡമിയിലോ, ആക്റ്റിംഗ് സ്ക്കൂളിലോ പോകണ്ട…സ്ക്രീനിൽ ഉർവ്വശിയുടെ കഥാപാത്രങ്ങൾ കണ്ട് മനസ്സിലാക്കിയാൽ മാത്രം മതി… ആശ പൂർണ്ണമായും ഒരു ഉർവ്വശി ചിത്രമാണ്.. ജോജുവും,ഐശ്വര്യ ലക്ഷ്മിയും അവരവരുടെ ഭാഗം മികച്ചതാക്കി എന്നുളള സത്യം വിസ്മരിക്കുന്നില്ല…
വിരസമാകുമെന്ന് തോന്നുന്ന നിമിഷങ്ങൾ പോലും സംവിധായകൻറെ ക്രാഫ്റ്റിലും ഉർവ്വശിയുടെ പ്രകടനത്തിലും പ്രേക്ഷകരുടെ ശ്രദ്ധ സിനിമയിൽ നിന്നും മാറാതെ അവരെ അതിൽ ലയിപ്പിച്ചു..
സഫർ സനൽ എന്ന സംവിധായകനും,അജിത് വിനായക എന്ന നിർമ്മാതാവിനും അഭിമാനിക്കാവുന്ന ചിത്രം…ആശ നൽകുന്ന സന്ദേശം മലയാളത്തിന് മാത്രമല്ല ലോകമെമ്പാടുമുളള പ്രേക്ഷർക്കാണ്…ഒരു നായികാ പ്രാധാന്യമുളള ചിത്രം പ്രേക്ഷകർ സ്വീകരിക്കുന്നത് കാണുമ്പോൾ ഒരുപാട് സന്തോഷം തോന്നി…അത് ലേഡീ സൂപ്പർ സ്റ്റാർ എന്ന പദവിയല്ല മറിച്ച് മികച്ച,അഭിനേത്രിയെന്ന ഒറ്റ പേരിലാണ്..അതെ അത് ഉർവ്വശിയാണ്…അവരെ മലയാളത്തിൻറെ അൽ പച്ചീനോ, എന്ന് വിളിക്കാനാണ്, ഞാനിഷ്ടപ്പെടുന്നത്’, നിഷാദ് കുറിച്ചിരിക്കുകയാണ്.
