സൂപ്പർസ്റ്റാർ പദവികളുടെയും ഗ്ലാമർ ലോകത്തിന്റെയും തിളക്കങ്ങൾക്കപ്പുറം, തന്റെ ഉള്ളിന്റെയുള്ളിൽ താനൊരു സാധാരണ ബസ് കണ്ടക്ടർ മാത്രമാണെന്ന് തുറന്നുപറഞ്ഞ് രജനീകാന്ത്. ബസുകളും കാക്കി യൂണിഫോം ധരിച്ച കണ്ടക്ടർമാരെയും കാണുന്നത് പഴയ ഓർമ്മകൾ തിരികെ കൊണ്ടുവരുകയും തനിക്ക് സന്തോഷം നൽകുകയും ചെയ്യുന്നുവെന്ന് അദ്ദേഹം പറഞ്ഞു. സൂപ്പർസ്റ്റാർ പ്രതിച്ഛായയുമായി ഇനിയും പൊരുത്തപ്പെടാൻ തനിക്ക് കഴിഞ്ഞിട്ടില്ലെന്നും രജനി പറഞ്ഞു. ജയിലർ 2 റിലീസിന് മുമ്പായി നടന്ന സൂപ്പർ ഷോയിലാണ് അദ്ദേഹം ഇക്കാര്യം തുറന്നുപറഞ്ഞത്.
“എന്റെ ഉള്ളിന്റെയുള്ളിൽ, ഞാൻ എന്നെത്തന്നെ ഒരു ബസ് കണ്ടക്ടറായിട്ടാണ് കാണുന്നത്. അന്ന്, ഒരു കണ്ടക്ടർ എന്ന നിലയിൽ എനിക്ക് ചെറിയൊരു ശമ്പളമായിരുന്നു ലഭിച്ചിരുന്നത്. പക്ഷേ ഈ രജനീകാന്ത്, സൂപ്പർസ്റ്റാർ പ്രതിച്ഛായയുമായി പൊരുത്തപ്പെടാൻ എനിക്ക് ഇപ്പോഴും ബുദ്ധിമുട്ടാണ്.അതുകൊണ്ടാണ് ഞാൻ വീണ്ടും വീണ്ടും ബെംഗളൂരുവിലേക്ക് പോകുന്നത്. ബസുകൾ കാണുന്നത് മാത്രം എനിക്ക് സന്തോഷം തരുന്നു. ആ കാക്കി യൂണിഫോം കാണുമ്പോൾ ഇപ്പോഴും ആ പഴയ ആഗ്രഹം മനസ്സിലേക്ക് വരാറുണ്ട്. അതിനാൽ ഞാൻ എന്നെത്തന്നെ ഒരു ബസ് കണ്ടക്ടറായിട്ടാണ് കാണുന്നത്.” രജനീ കാന്ത് പറഞ്ഞു.
സിനിമയിലെത്തി ദശാബ്ദങ്ങൾ പിന്നിട്ടിട്ടും, തനിക്ക ലഭിച്ച ജനപ്രീതിയും ആരാധകസ്നേഹവും പലപ്പോഴും തന്നെ അത്ഭുതപ്പെടുത്താറുണ്ടെന്നാണ് താരം പറയുന്നത്. 75-ാം വയസ്സിലും ഇത്രയും ഊർജത്തോടെ നായകവേഷങ്ങളിൽ അഭിനയിക്കാൻ കഴിയുന്നതിന്റെ പ്രധാന കാരണം തന്റെ ആരാധകരാണെന്ന് അദ്ദേഹം ചൂണ്ടിക്കാട്ടി. തമിഴ് ജനതയും സിനിമയെയ സ്നേഹിക്കുന്ന പ്രേക്ഷകരും നൽകിയ അടിയുറച്ച പിന്തുണയാണ് ഇത്രയും കാലം തന്റെ സിനിമാജീവിതത്തെ മുന്നോട്ടുകൊണ്ടുപോയത്. വലിയ നിർമ്മാണ കമ്പനികളെയും നെൽസണെപ്പോലുള്ള പ്രമുഖ സംവിധായകരെയും തന്നോടൊപ്പം പ്രവർത്തിക്കാൻ പ്രേരിപ്പിക്കുന്നത് ഈ ജനപിന്തുണയാണെന്നും അദ്ദേഹം കൂട്ടിച്ചേർത്തു.
