ബോളിവുഡ് സിനിമാപ്രേമികൾ ഏറെ ആകാംക്ഷയോടെ കാത്തിരിക്കുന്ന നിതേഷ് തിവാരിയുടെ ബ്രഹ്മാണ്ഡ ചിത്രം ‘രാമായണ’ റിലീസിന് മുൻപ് തന്നെ ബോക്സ് ഓഫീസിൽ ചരിത്രം കുറിക്കുന്നു. 2026 നവംബർ 5-ന് തിയേറ്ററുകളിലെത്തുന്ന ചിത്രത്തിന്റെ അഡ്വാൻസ് ബുക്കിങ് ഇതിനോടകം തന്നെ ആരംഭിച്ചിട്ടുണ്ട്. അഡ്വാൻസ് ടിക്കറ്റ് ബുക്കിങ്ങിലൂടെമാത്രം ആഗോളതലത്തിൽ ചിത്രം ഇതിനോടകം 25 കോടി രൂപ സ്വന്തമാക്കിക്കഴിഞ്ഞു.
ചിത്രത്തിൽ ശ്രീരാമനായി രൺബീർ കപൂറും, രാവണനായി കന്നഡ സൂപ്പർതാരം ‘റോക്കിംഗ് സ്റ്റാർ’ യഷും എത്തുമ്പോൾ, സീതാദേവിയായി വേഷമിടുന്നത് സായ് പല്ലവിയാണ്. രാകുൽ പ്രീത് സിംഗ് ശൂർപ്പണഖയായി എത്തുന്ന ചിത്രത്തിന്റെ പുതിയ ക്യാരക്ടർ പോസ്റ്റർ ഇപ്പോൾ പുറത്തുവന്നിട്ടുണ്ട്. മലയാളികളുടെ പ്രിയനടി ശോഭന കൈകേയിയായി വേഷമിടുന്നു എന്നത് മലയാളികൾക്ക് ഈ ചിത്രത്തിലെ മറ്റൊരു വലിയ ആകർഷണമാണ്. കൂടാതെ, മുൻപ് ടെലിവിഷൻ രാമായണ പരമ്പരയിലൂടെ പ്രശസ്തനായ അരുൺ ഗോവിൽ ദശരഥ മഹാരാജാവായി തിരിച്ചെത്തുന്നു എന്ന പ്രത്യേകതയുമുണ്ട്. ലക്ഷ്മണനായി രവി ദുബെയും, വിശ്വാമിത്ര മഹർഷിയായി അജിങ്ക്യ ദേവും, ഇന്ദ്രദേവനായി കുനാൽ കപൂറും ചിത്രത്തിൽ അണിനിരക്കുന്നുണ്ട്.
നമിത് മൽഹോത്രയുടെ പ്രൈം ഫോക്കസ് സ്റ്റുഡിയോസും, എട്ട് തവണ ഓസ്കർ പുരസ്കാരം നേടിയ വിഷ്വൽ ഇഫക്റ്റ്സ് സ്റ്റുഡിയോയായ ഡിഎൻഇജിയും, യഷിന്റെ മോൺസ്റ്റർ മൈൻഡ് ക്രിയേഷൻസും സംയുക്തമായാണ് ചിത്രം നിർമ്മിക്കുന്നത്. മലയാളം, ഹിന്ദി, കന്നഡ, തെലുങ്ക്, തമിഴ് എന്നീ അഞ്ച് ഭാഷകളിലായി പാൻ-ഇന്ത്യൻ തലത്തിലാണ് ചിത്രം പുറത്തിറങ്ങുന്നത്. സോണി പിക്ചേഴ്സ് ചിത്രത്തിന്റെ അന്താരാഷ്ട്ര വിതരണം ഏറ്റെടുത്തിരിക്കുമ്പോൾ, ഉത്തരേന്ത്യയിൽ ധർമ്മ പ്രൊഡക്ഷൻസാണ് ചിത്രം തിയേറ്ററുകളിലെത്തിക്കുന്നത്.
ഓസ്കാർ ജേതാക്കളായ സംഗീത ഇതിഹാസങ്ങൾ ഹാൻസ് സിമ്മറും എ.ആർ. റഹ്മാനും ആദ്യമായി ഒന്നിക്കുന്നു എന്ന വലിയ പ്രത്യേകതയും ഈ ചിത്രത്തിനുണ്ട്. ശ്രീധർ രാഘവനാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. കഥാപാത്രങ്ങളുടെ ആകർഷകമായ ലുക്കും ചിത്രത്തിന്റെ വലിയ ക്യാൻവാസും വ്യക്തമാക്കുന്ന തരത്തിലുള്ള ഒഫീഷ്യൽ റിലീസ് ഡേറ്റ് പോസ്റ്റർ ഇതിനോടകം ചലച്ചിത്ര ലോകത്ത് വലിയ തരംഗമാണ് സൃഷ്ടിച്ചിരിക്കുന്നത്.
