അമേരിക്കയിൽ വിവിധ പരിപാടികളുടെ തിരക്കിലായ മോഹൻലാലിന്റെ പുതിയൊരു ചിത്രമാണ് ഇപ്പോൾ സോഷ്യൽ മീഡിയയിൽ ചർച്ചാവിഷയം. ലോകപ്രശസ്ത അമേരിക്കൻ ഇ.ഡി.എം-പോപ്പ് താരങ്ങളായ അലക്സ് പാൽ, ഡ്രൂ ടാഗർട്ട് എന്നിവരടങ്ങുന്ന ‘ദി ചെയിൻ സ്മോക്കേഴ്സ്’ ആണ് മോഹൻലാലിനൊപ്പമുള്ള ചിത്രം പങ്കുവെച്ചിരിക്കുന്നത്. “തങ്ങൾക്ക് ഒരു പുതിയ കൂട്ടുകാരനെ ലഭിച്ചു” എന്ന കുറിപ്പോടെയാണ് ഇവർ ചിത്രം ഇൻസ്റ്റഗ്രാമിൽ പോസ്റ്റ് ചെയ്തത്. ഒരു പരിപാടിക്ക് തൊട്ടുമുൻപായിരുന്നു താരങ്ങളുടെ ഈ കണ്ടുമുട്ടൽ.
ലക്ഷക്കണക്കിന് ലൈക്കുകളും ആയിരക്കണക്കിന് കമന്റുകളുമാണ് ചിത്രത്തിന് ലഭിച്ചുകൊണ്ടിരിക്കുന്നത്. മലയാളത്തിന്റെ സൂപ്പർതാരത്തെ ആഗോള പ്രശസ്തരായ കലാകാരന്മാർക്കൊപ്പം കണ്ടത് ആരാധകരെയും ആവേശത്തിലാക്കിയിട്ടുണ്ട്. 2014-ൽ പുറത്തിറങ്ങിയ ‘#Selfie’ എന്ന ഗാനത്തിലൂടെ ലോകശ്രദ്ധ നേടിയ ഇവർ ‘Closer’, ‘Something Just Like This’ തുടങ്ങിയ സൂപ്പർഹിറ്റ് ഗാനങ്ങളുടെ സൃഷ്ടാക്കളാണ്. മഹേഷ് നാരായണൻ സംവിധാനം ചെയ്യുന്ന മൾട്ടിസ്റ്റാർ ചിത്രം ‘പേട്രിയറ്റ്’ ആണ് അദ്ദേഹത്തിന്റേതായി അണിയറയിൽ ഒരുങ്ങുന്നത്. നീണ്ട 19 വർഷത്തിന് ശേഷം മമ്മൂട്ടിയും മോഹൻലാലും ഒന്നിക്കുന്നു എന്ന പ്രത്യേകതയും ഈ ചിത്രത്തിനുണ്ട്. ഫഹദ് ഫാസിൽ, കുഞ്ചാക്കോ ബോബൻ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നു.
