‘പുതിയ ഓരോ സംവിധായകർക്കും പുതിയതെന്തോ പറയാനുണ്ടാകും’; ‘ബസൂക്ക’യെ കുറിച്ച് മമ്മൂട്ടിയുടെ പോസ്റ്റ്

മമ്മൂട്ടിയെ നായകനാക്കി നവാഗത സംവിധായകന്‍ ഡീനോ ഡെന്നിസ് രചിച്ചു സംവിധാനം ചെയ്ത ‘ബസൂക്ക’ നാളെ തിയറ്ററിലേക്ക് എത്തുകയാണ്. ഏവരും ആവേശത്തോടെയാണ് ചിത്രത്തെ നോക്കിക്കാണുന്നത്. മമ്മൂട്ടിയുടെ ഗംഭീര ആക്ഷനും പഞ്ച് ഡയലോഗുകളും നിറഞ്ഞ ചിത്രം തീയറ്ററുകളെ ഇളക്കിമറിക്കുമെന്നതിൽ സംശയമില്ല. ഇപ്പോഴിതാ ചിത്രം നാളെ തിയറ്ററിലേക്ക് എത്തുന്ന വിവരം പങ്കുവച്ചിരിക്കുകയാണ് മമ്മൂട്ടി. ഗെയിമിംഗ് പ്രമേയമായതും വളരെ പുതുമ തോന്നിയതും ആയ കഥയാണെന്നും ആദ്യ കേൾവിയിൽ തന്നെ തനിക്ക് ഇഷ്ടപ്പെട്ടുവെന്നും താരം ഫേസ്ബുക്കിൽ കുറിച്ചു.

പോസ്റ്റിന്റെ പൂർണരൂപം

പ്രിയമുള്ളവരെ…
വീണ്ടും ഒരു നവാഗത സംവിധായകനോടൊപ്പം ഞാൻ എത്തുകയാണ്.
‘ ഡിനോ ഡെന്നിസ് ‘ അദ്ദേഹം തന്നെയാണ് കഥയും, തിരക്കഥയും…
ഏപ്രിൽ 10ന് (നാളെ) ‘ബസൂക്ക’ തിയേറ്ററുകളിൽ എത്തും..
ഗെയിമിംഗ് പ്രമേയമായതും വളരെ പുതുമ തോന്നിയതും ആയ കഥ ; ആദ്യ കേൾവിയിൽ തന്നെ എനിക്ക് ഇഷ്ടപ്പെട്ടു..
അത് സിനിമയായി പരിണമിച്ചു.
ഇനി നിങ്ങൾക്കാണ് ഇഷ്ടപ്പെടേണ്ടത്…
എപ്പോഴും പറയാറുള്ളത് പോലെ.. പുതിയ ഓരോ സംവിധായർക്കും പുതിയതെന്തോ പറയാനുണ്ടാകും…
അതിനൊപ്പം
ഞാനും
നിങ്ങളും
നമ്മളും…
സ്നേഹപൂർവ്വം
മമ്മൂട്ടി