മുകുന്ദനുണ്ണി അസോസിയേറ്റ്സ്, പ്ലൂട്ടോ തുടങ്ങിയ സിനിമകളിലൂടെ സുപരിചിതയായ നടിയാണ് ആർഷ ബൈജു. മോഹൻലാൽ ചിത്രം തുടരുമിലും ആർഷ പ്രധാനപ്പെട്ട ഒരു വേഷം ചെയ്തിരുന്നു. തന്റെ കരിയറിൽ ഒരുപാട് ആലോചിക്കാതെ ഉടൻ യെസ് പറഞ്ഞ സിനിമയാണ് തുടരുമെന്ന് പറയുകയാണ് ആർഷ. ഒർജിനൽസിന് നൽകിയ അഭിമുഖത്തിലായിരുന്നു ആർഷയുടെ പ്രതികരണം.’ആകെ കുറച്ച് സിനിമകൾ മാത്രമാണ് ഞാൻ ഇതുവരെ ചെയ്തിട്ടുള്ളത്. സിനിമകൾ കമ്മിറ്റ് ചെയ്യാൻ ഞാൻ കുറച്ച് സമയം എടുക്കാറുണ്ട്.
ഓഫറുകൾ വരാറുണ്ടെങ്കിലും ഞാൻ വളരെ സെലക്ടീവാണ്. അതുകൊണ്ടാണ് ഞാൻ ചെയ്യുന്ന സിനിമകൾക്കിടയിൽ ഗ്യാപ്പ് വരുന്നത്. ആരെങ്കിലും ഒരു സിനിമയുമായി സമീപിച്ചാൽ ആലോചിച്ച് മാത്രമാണ് ഞാൻ തീരുമാനം പറയാറുള്ളത്. അങ്ങനെ ആലോചിക്കാതെ ഉടൻ തന്നെ ‘യെസ്’ പറഞ്ഞ സിനിമയാണ് തുടരും. ആ സിനിമ വളരെ പെട്ടെന്ന് തുടങ്ങുമെന്ന് എന്നോട് പറഞ്ഞിരുന്നു. എനിക്ക് ആ കഥാപാത്രം നന്നായി ചെയ്യാൻ കഴിയണമെന്ന ആഗ്രഹം മാത്രമേ ഉണ്ടായിരുന്നുള്ളു. ആകെ കുറച്ച് സീനുകൾ മാത്രമായിരുന്നു ഉണ്ടായിരുന്നത്’, ആർഷയുടെ വാക്കുകൾ.
മലയാള സിനിമയിലെ പല റെക്കോർഡുകളും തകർത്തുകൊണ്ടാണ് മോഹൻലാൽ-തരുൺ മൂർത്തി ടീമിന്റെ തുടരും തിയേറ്ററുകളിൽ നിറഞ്ഞാടിയത്. കേരളത്തില് നിന്ന് മാത്രം 100 കോടിയില് അധികം നേടി മലയാളത്തിന്റെ ഇൻഡസ്ട്രി ഹിറ്റായും മാറി. കെ ആര് സുനിലിന്റെ കഥയ്ക്ക് തരുണ് മൂര്ത്തിയും ചേര്ന്നാണ് തിരക്കഥ ഒരുക്കിയത്. ജിയോ ഹോട്ട്സ്റ്റാറിലൂടെയാണ് തുടരും ഒടിടി സ്ട്രീം ചെയ്യുന്നത്. മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി ഭാഷകളിലും സിനിമ ലഭ്യമാണ്. സിനിമയിൽ പ്രകാശ് വർമ, ബിനു പപ്പു, ഫർഹാൻ ഫാസിൽ, മണിയൻപിള്ള രാജു, തോമസ് മാത്യു, ഇർഷാദ് തുടങ്ങിയവരാണ് ചിത്രത്തിൽ പ്രധാന വേഷങ്ങളിൽ എത്തുന്നത്. നിരവധി പുതുമുഖങ്ങളും ചിത്രത്തിൽ എത്തുന്നുണ്ട്.
