ദുൽഖർ സൽമാനെ കുറിച്ച് മനസ് തുറന്ന് സംസാരിക്കുകയാണ് നടനും തിരക്കഥാകൃത്തുമായ ബിബിൻ ജോർജ്. കൂടൽ എന്ന സിനിമയുമായി ബന്ധപ്പെട്ട് തനിക്കെതിരെ വലിയ ട്രോളുകൾ ഉയർന്നപ്പോൾ ദുൽഖർ തന്നെ ആശ്വസിപ്പിച്ചതിനെ കുറിച്ചാണ് റിപ്പോർട്ടർ ബിസിനസിന് നൽകിയ അഭിമുഖത്തിൽ ബിബിൻ ജോർജ്സംസാരിച്ചത്. കൂടൽ എന്ന സിനിമയിൽ ബിബിൻ ജോർജ് അവതരിപ്പിച്ച കഥാപാത്രം ദുൽഖർ അവതരിപ്പിച്ച ചാർലി എന്ന കഥാപാത്രത്തിന്റെ വികലമായ കോപ്പിയടിയാണ് എന്നായിരുന്നു ട്രോളുകൾ ഉയർന്നിരുന്നത്. ഇത് സിനിമയുടെ സ്ട്രീമിങ്ങിനെ പിന്നാലെയാണ് വ്യാപകമായി സോഷ്യൽ മീഡിയയിൽ നിറഞ്ഞത്. ഈ സമയത്താണ് ബിബിനെ തേടി ദുൽഖറിന്റെ മെസേജ് എത്തിയത്.
‘DQ ഒരു നല്ല മനുഷ്യനാണ്. കൂടൽ എന്ന സിനിമ ഇറങ്ങിയ സമയത്ത് ചാർലിയെ പോലെ ആകാൻ ശ്രമിച്ച് പാളിപ്പോയി എന്ന നിലയിൽ എനിക്ക് കുറെ കളിയാക്കലുകൾ കേൾക്കേണ്ടി വന്നിരുന്നു. ഒരുപാട് ട്രോളുകൾ വന്നു. ആ സമയത്ത് ഡിക്യു എനിക്ക് മെസേജ് അയച്ചു. ഇതൊന്നും മൈൻഡ് ചെയ്യേണ്ടെന്ന് പറഞ്ഞു.
തനിക്ക് എതിരെയും ഇങ്ങനെ കുറെ ട്രോളുകൾ വന്നതാണെന്നും അദ്ദേഹം പറഞ്ഞു. തുടക്കക്കാലത്ത് നേരിട്ട ട്രോളുകളെ കുറിച്ചും സംസാരിച്ചു. അദ്ദേഹത്തെ പോലെ ഇത്രയും തിരക്കുള്ള ഒരാൾ നമ്മളെ ആശ്വസിപ്പിക്കാനായി മെസേജ് അയക്കുകയാണ്. അതൊന്ന് ആലോചിച്ച് നോക്കൂ. അന്ന് എനിക്ക് വലിയ സന്തോഷമായി,’ ബിബിൻ ജോർജ് പറഞ്ഞു.
വിഷ്ണു ഉണ്ണികൃഷ്ണനും ബിബിൻ ജോർജും ചേർന്ന് തിരക്കഥയെഴുതിയ ഒരു യമണ്ടൻ പ്രേമകഥ എന്ന ചിത്രത്തിൽ നായകനായി എത്തിയത് ദുൽഖറായിരുന്നു. 2019 ല് പുറത്തിറങ്ങിയ ചിത്രത്തിൽ ലല്ലു എന്ന നായക കഥാപാത്രമായി ദുൽഖർ സൽമാൻ എത്തിയപ്പോൾ ഡേവിസ് കരിക്കൻ എന്ന വില്ലൻ കഥാപാത്രത്തെ അവതരിപ്പിച്ചതും ബിബിൻ ജോർജ് ആയിരുന്നു.
