പൃഥ്വിരാജ്-വൈശാഖ് കൂട്ടുക്കെട്ടിലൊരുങ്ങുന്ന ബിഗ് ബഡ്ജറ്റ് ചിത്രം ‘ഖലീഫ’യിലെ “അസലായവളെ” എന്ന ഗാനം സോഷ്യൽ മീഡിയയിൽ തരംഗമാകുന്നു. റിലീസ് ചെയ്ത് 24 മണിക്കൂറിനുള്ളിൽ യൂട്യൂബിൽ ഒന്നര മില്യണിലധികം കാഴ്ചക്കാരെയാണ് ഈ പ്രണയഗാനം നേടിയത്. ജേക്സ് ബിജോയ് സംഗീതം പകർന്ന ഗാനം സിദ് ശ്രീറാമും മഖ്ബൂൽ മൻസൂറും ചേർന്നാണ് ആലപിച്ചിരിക്കുന്നത്. മുത്തുവിന്റേതാണ് വരികൾ. തെലുങ്ക് താരം മാളവിക ശർമ്മ മലയാളത്തിൽ അരങ്ങേറ്റം കുറിക്കുന്ന ചിത്രത്തിൽ, പൃഥ്വിരാജും മാളവികയും തമ്മിലുള്ള പ്രണയരംഗങ്ങളാണ് ഗാനത്തിന്റെ പ്രധാന ആകർഷണം.
‘മാമ്പറയ്ക്കൽ ആമിർ അലി’ എന്ന കഥാപാത്രമായി പൃഥ്വിരാജ് എത്തുന്ന ഈ മാസ്സ് ആക്ഷൻ ത്രില്ലറിൽ മോഹൻലാൽ അതിഥി താരമായി എത്തുന്നു എന്ന പ്രത്യേകതയുമുണ്ട്. സ്വർണ്ണക്കള്ളക്കടത്തിന്റെ പശ്ചാത്തലത്തിൽ വൻ ക്യാൻവാസിൽ ഒരുങ്ങുന്ന ചിത്രം ഓഗസ്റ്റ് 20-ന് ഓണം റിലീസായി ആഗോളതലത്തിൽ തിയേറ്ററുകളിലെത്തും. ബോളിവുഡ് താരം നീൽ നിതിൻ മുകേഷും പ്രധാന വേഷത്തിലെത്തുന്ന ചിത്രം നിർമ്മിക്കുന്നത് ജിനു എബ്രഹാമും സൂരജ് കുമാറും ചേർന്നാണ്. ലണ്ടൻ, ദുബായ്, നേപ്പാൾ, കേരളം എന്നിവിടങ്ങളിലായി ചിത്രീകരിച്ച ‘ഖലീഫ’ ഈ വർഷത്തെ ഏറ്റവും വലിയ പ്രതീക്ഷയുള്ള ചിത്രങ്ങളിലൊന്നാണ്.
