സൗത്ത് ഇന്ത്യൻ സിനിമയിലെ രണ്ട് സൂപ്പർ പവറുകൾ ആദ്യമായി കൈകോർക്കുന്നു. ഐക്കൺ സ്റ്റാർ അല്ലു അർജുനും ഹിറ്റ് മേക്കർ സംവിധായകൻ ലോകേഷ് കനകരാജും ഒന്നിക്കുന്ന പുതിയ ചിത്രം ‘AA23’ സിനിമ ലോകത്ത് വലിയ തരംഗമായിരിക്കുകയാണ്. ഇപ്പോഴിതാ ആരാധകരെ ആവേശത്തിലാഴ്ത്താൻ ഇരുവരും ഒന്നിച്ചുള്ള ചിത്രമാണ് ലോകേഷ് പുറത്ത് വിട്ടിരിക്കുന്നത്. ചിത്രത്തിന്റെ അപ്ഡേറ്റ് ഉടൻ ഉണ്ടാകുമെന്നും ലോകേഷ് കുറിക്കുന്നുണ്ട്.
പ്രമുഖ ചലച്ചിത്ര നിർമ്മാണ കമ്പനിയായ മൈത്രി മൂവി മേക്കേഴ്സും ബിവി വർക്സും സംയുക്തമായാണ് ഈ ബിഗ് ബജറ്റ് പാൻ-ഇന്ത്യൻ ചിത്രം നിർമ്മിക്കുന്നത്. ചിത്രത്തിന്റെ ഔദ്യോഗിക പ്രഖ്യാപനത്തോടൊപ്പം പുറത്തിറങ്ങിയ അനൗൺസ്മെന്റ് വിഡിയോ സോഷ്യൽ മീഡിയയിൽ വൈറലായിരുന്നു. ലോകേഷ് കനകരാജും അല്ലു അർജുനും ഒത്തുചേരുമ്പോൾ ഒരു പാൻ – ഇന്ത്യൻ ദൃശ്യവിരുന്നാണ് ആരാധകർ പ്രതീക്ഷിക്കുന്നത്.
താൽക്കാലികമായി ‘AA23’ എന്ന് പേരിട്ടിരിക്കുന്ന ചിത്രത്തിന്റെ ചിത്രീകരണം ഉടൻ ആരംഭിക്കുമെന്നാണ് റിപ്പോർട്ടുകൾ. തികച്ചും വേറിട്ട ലുക്കിലാകും അല്ലു അർജുൻ ഈ ചിത്രത്തിൽ പ്രത്യക്ഷപ്പെടുക എന്നാണ് സൂചനകൾ. സൗത്ത് ഇന്ത്യയിലെ പ്രശസ്തനായ സംഗീത സംവിധായകൻ അനിരുദ്ധ് രവിചന്ദറാണ് ചിത്രത്തിന് സംഗീതം ഒരുക്കുന്നത്. ലോകേഷ്-അനിരുദ്ധ് കൂട്ടുക്കെട്ടിൽ പുറത്തിറങ്ങിയ മുൻകാല ചിത്രങ്ങളെല്ലാം വൻ മ്യൂസിക്കൽ ഹിറ്റുകളായി മാറിയിട്ടുള്ളതിനാൽ, ഈ പ്രൊജക്റ്റിലെ സംഗീതത്തിന് മേലുള്ള പ്രതീക്ഷയും വളരെ വലുതാണ്.
