തമിഴ് സിനിമയിലെ ശ്രദ്ധേയ കൂട്ടുകെട്ടായ നടന്‍ വിജയ് സേതുപതിയും സംവിധായകന്‍ ത്യാഗരാജന്‍ കുമാരരാജയും വീണ്ടും ഒന്നിക്കുന്ന ചിത്രം ‘പോക്കറ്റ് നോവല്‍’ 2027 പൊങ്കല്‍ റിലീസായി ജനുവരി 14ന് ലോകമെമ്പാടുമുള്ള തിയേറ്ററുകളിലെത്തും. ‘ആരണ്യകാണ്ഡം’, ‘സൂപ്പര്‍ ഡീലക്‌സ്’ തുടങ്ങിയ വ്യത്യസ്തമായ സിനിമകളിലൂടെ ശ്രദ്ധേയനായ ത്യാഗരാജന്‍ കുമാരരാജയും വിജയ് സേതുപതിയും ഒന്നിക്കുന്ന ചിത്രം എന്ന നിലയില്‍ പ്രഖ്യാപനം മുതല്‍ തന്നെ സിനിമാപ്രേമികള്‍ക്കിടയില്‍ വലിയ പ്രതീക്ഷയാണ് ചിത്രം സൃഷ്ടിച്ചിരിക്കുന്നത്. ‘സൂപ്പര്‍ ഡീലക്‌സിന്’ ശേഷം ഇരുവരും ഒന്നിക്കുന്ന ചിത്രമെന്ന പ്രത്യേകതയും പോക്കറ്റ് നോവലിനുണ്ട്.
വിജയ് സേതുപതിക്കൊപ്പം മലയാളി താരം മാളവിക മോഹനന്‍, കന്നഡ സിനിമയിലെ ശ്രദ്ധേയ നടന്‍ രാജ് ബി ഷെട്ടി, കിഷോര്‍ എന്നിവരും ചിത്രത്തില്‍ പ്രധാന വേഷങ്ങളിലെത്തുന്നു. ഈ ചിത്രത്തിലൂടെ രാജ് ബി ഷെട്ടി തമിഴ് സിനിമയില്‍ അരങ്ങേറ്റം കുറിക്കുന്നു എന്ന പ്രത്യേകതയുമുണ്ട്. ആന്‍ഡ്രൂ ലൂയിസ് കഥയും തിരക്കഥയും ഒരുക്കുന്ന ചിത്രത്തിന് നീരവ് ഷായാണ് ഛായാഗ്രഹണം നിര്‍വഹിക്കുന്നത്. സത്യരാജ് നടരാജന്‍ എഡിറ്റിംഗും ജി.വി. പ്രകാശ് കുമാര്‍ സംഗീത സംവിധാനവും നിര്‍വഹിക്കുന്നു. ധിലീപ് സുബ്ബരായനാണ് ആക്ഷന്‍ കൊറിയോഗ്രഫി.
ടൈലര്‍ ഡര്‍ഡന്‍, കിനോ ഫിസ്റ്റ് എന്നീ ബാനറുകളില്‍ സംവിധായകന്‍ ത്യാഗരാജന്‍ കുമാരരാജയും എസ്.ഡി. എഴില്‍മതിയും ചേര്‍ന്നാണ് ചിത്രം നിര്‍മ്മിക്കുന്നത്. വ്യത്യസ്തമായ അവതരണശൈലിയും ശക്തമായ താരനിരയും ഒത്തുചേരുന്ന പോക്കറ്റ് നോവല്‍ 2027ലെ പൊങ്കല്‍ സിനിമാ ആഘോഷങ്ങളിലെ ശ്രദ്ധേയ റിലീസുകളിലൊന്നാകുമെന്നാണ് പ്രതീക്ഷ. ചിത്രം ജനുവരി 14ന് ലോകമെമ്പാടുമുള്ള തിയേറ്ററുകളില്‍ പ്രദര്‍ശനത്തിനെത്തും.പി ആര്‍ ഓ : പ്രതീഷ് ശേഖര്‍.
