പ്രണയത്തിന്റെ മനോഹരമായ ഈണവുമായി ജോമോന്‍ ജ്യോതിര്‍ നായകനാകുന്ന ക്യാമ്പസ് പ്രണയചിത്രം ‘പ്രേംപാറ്റ’യിലെ ആദ്യ ഗാനം പുറത്തിറങ്ങി. ‘നെഞ്ചാടിയേ…’ എന്ന് തുടങ്ങുന്ന ഗാനം ഇതിനോടകം പ്രേക്ഷകര്‍ക്കിടയില്‍ ശ്രദ്ധ നേടുകയാണ്. സുഹൈല്‍ എം. കോയയുടെ വരികള്‍ക്ക് അങ്കിത് മേനോന്‍ ഈണവും ഓര്‍ക്കസ്ട്രേഷനും നിര്‍വഹിച്ചപ്പോള്‍ നിഹാല്‍ സാദിഖാണ് ഗാനം ആലപിച്ചിരിക്കുന്നത്.മലയാള സിനിമയില്‍ ആദ്യമായി വാര്‍ണര്‍ മ്യൂസിക് ഗാനങ്ങളുടെ വിതരണാവകാശം സ്വന്തമാക്കുന്ന ചിത്രം എന്ന പ്രത്യേകതയും ‘പ്രേംപാറ്റ’യ്ക്കുണ്ട്. ചിത്രത്തിലെ ഗാനങ്ങളുടെ വിതരണാവകാശം വാര്‍ണര്‍ മ്യൂസിക്കിനാണ്. നവംബര്‍ 27ന് ചിത്രം തിയറ്ററുകളിലെത്തും.
ജോമോന്‍ ജ്യോതിര്‍ നായകനാകുന്ന ചിത്രത്തില്‍ സാഫ് ബോയ്, ജുനൈസ് വി.പി., നയന എല്‍സ, ടിസ് തോമസ്, ഇന്നസെന്റ് സോണറ്റ്, വിഘ്നേഷ്, റയാന്‍ എന്‍ടിപി, സല്‍മാനുല്‍ ഫാരിസി തുടങ്ങിയ യുവതാരങ്ങള്‍ക്കൊപ്പം സൈജു കുറുപ്പ്, സിദ്ദിഖ്, അനുശ്രീ, രാജേഷ് മാധവന്‍, സഞ്ജു ശിവറാം, ഇര്‍ഷാദ് അലി തുടങ്ങി ശ്രദ്ധേയമായ താരനിരയും അണിനിരക്കുന്നു. നാല്‍പ്പതോളം പുതുമുഖങ്ങളും ചിത്രത്തിന്റെ ഭാഗമാകുന്നുണ്ട്. ചിത്രത്തിലെ നായികയെക്കുറിച്ചുള്ള വിവരങ്ങള്‍ അണിയറപ്രവര്‍ത്തകര്‍ ഇതുവരെ പുറത്തുവിട്ടിട്ടില്ല. ‘നെഞ്ചാടിയേ…’ എന്ന ഗാനത്തിലും മുഖം മറച്ച് കണ്ണുകള്‍ മാത്രം കാണിച്ചാണ് നായിക പ്രത്യക്ഷപ്പെടുന്നത്. ഇതോടെ നായിക ആരാണെന്ന ആകാംക്ഷയും പ്രേക്ഷകര്‍ക്കിടയില്‍ വര്‍ധിച്ചിരിക്കുകയാണ്.
‘ആയിഷ’, ‘ഇഡി’ എന്നീ ചിത്രങ്ങള്‍ക്കുശേഷം ആമിര്‍ പള്ളിക്കല്‍ സംവിധാനം ചെയ്യുന്ന ചിത്രമാണ് ‘പ്രേംപാറ്റ’. ലിജീഷ് കുമാറും ആമിര്‍ പള്ളിക്കലും ഒരുമിക്കുന്നു എന്നതും ചിത്രത്തിന്റെ പ്രത്യേകതയാണ്. ലിജീഷ് കുമാറിന്റെ തിരക്കഥയില്‍ ഒരുങ്ങുന്ന ചിത്രം എന്‍.എസ്.എസ് ക്യാമ്പിന്റെ പശ്ചാത്തലത്തില്‍ കഥ പറയുന്ന യൂത്ത് റൊമാന്റിക് എന്റര്‍ടെയ്നറാണ്. സെന്‍ട്രല്‍ പിക്ചേഴ്സിനാണ് ചിത്രത്തിന്റെ കേരളത്തിലെ വിതരണാവകാശം. പ്ലോട്ട് പിക്ചേഴ്സാണ് ഓവര്‍സീസ് വിതരണാവകാശം സ്വന്തമാക്കിയിരിക്കുന്നത്. ഗാനങ്ങളുടെ വിതരണാവകാശം വാര്‍ണര്‍ മ്യൂസിക്കിനാണ്. പ്രണയവും സംഗീതവും യുവത്വത്തിന്റെ ആഘോഷവുമായി ‘പ്രേംപാറ്റ’ നവംബര്‍ 27ന് തിയറ്ററുകളിലേക്ക്.പി ആര്‍ ഓ മഞ്ജു ഗോപിനാഥ്.
