‘കെ.ജി.എഫ്’, ‘സലാര്‍’, ‘കാന്താര’ തുടങ്ങിയ പാന്‍ ഇന്ത്യന്‍ ബ്ലോക്ക്ബസ്റ്റര്‍ ചിത്രങ്ങള്‍ക്കും ‘മഹാവതാര്‍ നരസിംഹ’ പോലുള്ള വേറിട്ട സിനിമാനുഭവങ്ങള്‍ക്കും പിന്നില്‍ പ്രവര്‍ത്തിച്ച ഹോംബാലെ ഫിലിംസ് പുതിയൊരു ആനിമേഷന്‍ ചിത്രവുമായി എത്തുന്നു. ഇന്റര്‍നാഷണല്‍ സൊസൈറ്റി ഫോര്‍ കൃഷ്ണ കോണ്‍ഷ്യസ്നെസ് (ഇസ്‌കോണ്‍) സ്ഥാപകാചാര്യനായ എ.സി. ഭക്തിവേദാന്ത സ്വാമി ശ്രീല പ്രഭുപാദയുടെ ജീവിതവും ആത്മീയ ദൗത്യവും ആസ്പദമാക്കിയുള്ള ‘ശരണാഗതി – ദ ലൈഫ് ഓഫ് എ സറണ്ടേര്‍ഡ് സോള്‍’ എന്ന ചിത്രമാണ് പ്രഖ്യാപിച്ചിരിക്കുന്നത്. മാപ്പുകൾ കാണുക
ട്രാന്‍സെന്‍ഡന്റല്‍ ഫിലിംസുമായി ചേര്‍ന്നാണ് ഹോംബാലെ ഫിലിംസ് ഈ ചിത്രം അവതരിപ്പിക്കുന്നത്. ഇസ്‌കോണിന്റെ അനുഗ്രഹാശിസ്സുകളോടെയാണ് ചിത്രം ഒരുങ്ങുന്നത്. അത്യാധുനിക ആര്‍ട്ടിഫിഷ്യല്‍ ഇന്റലിജന്‍സ് മോഷന്‍ ക്യാപ്ചര്‍ സാങ്കേതികവിദ്യ ഉപയോഗിച്ച് നിര്‍മ്മിക്കുന്ന ചിത്രത്തിന്റെ ആഗോള തിയേറ്റര്‍ റിലീസ് 2027 ഓഗസ്റ്റില്‍ ശ്രീല പ്രഭുപാദയുടെ വ്യാസപൂജ ദിനത്തോടനുബന്ധിച്ചായിരിക്കും. ആനിമേഷന്‍ രംഗത്ത് പുതിയൊരു സാങ്കേതിക പരീക്ഷണവുമായാണ് ‘ശരണാഗതി’ ഒരുങ്ങുന്നത്. എ.ഐ. മോഷന്‍ ക്യാപ്ചര്‍ എന്ന സാങ്കേതികവിദ്യയാണ് ചിത്രത്തില്‍ ഉപയോഗിക്കുന്നത്. മനുഷ്യരുടെ ശരീരചലനങ്ങളും ആംഗ്യങ്ങളും മുഖഭാവങ്ങളും ക്യാമറകളിലൂടെ പകര്‍ത്തി എ.ഐ.യുടെ സഹായത്തോടെ ആനിമേഷന്‍ കഥാപാത്രങ്ങളിലേക്ക് മാറ്റുന്നതാണ് ഈ രീതി. ഇതിലൂടെ മനുഷ്യര്‍ സ്വാഭാവികമായി ചലിക്കുന്നതുപോലെയും ഭാവങ്ങള്‍ പ്രകടിപ്പിക്കുന്നതുപോലെയും ആനിമേഷന്‍ കഥാപാത്രങ്ങളെയും അവതരിപ്പിക്കാന്‍ കഴിയും. ആധുനിക സാങ്കേതികവിദ്യയുടെ സഹായത്തോടെ കൂടുതല്‍ മികവുറ്റതും യഥാര്‍ത്ഥ്യത്തോട് ചേര്‍ന്നുനില്‍ക്കുന്നതുമായ ദൃശ്യാനുഭവം പ്രേക്ഷകര്‍ക്ക് സമ്മാനിക്കുകയാണ് ചിത്രം ലക്ഷ്യമിടുന്നത്.
1965ല്‍ തന്റെ 69-ാം വയസ്സില്‍ ഇന്ത്യയില്‍ നിന്ന് അമേരിക്കയിലേക്ക് യാത്രതിരിച്ച ശ്രീല പ്രഭുപാദയുടെ അസാധാരണമായ ജീവിതയാത്രയാണ് ചിത്രത്തിന്റെ പ്രമേയം. ഭഗവദ്ഗീതയുടെയും ശ്രീകൃഷ്ണന്റെ സന്ദേശത്തിന്റെയും കാലാതീതമായ ജ്ഞാനം ലോകത്തിന് പകര്‍ന്നുനല്‍കുക എന്ന ലക്ഷ്യത്തോടെയായിരുന്നു ആ യാത്ര. തന്റെ ആത്മീയ ഗുരുവായ ശ്രീല ഭക്തിസിദ്ധാന്ത സരസ്വതി ഠാക്കൂറിന്റെ നിര്‍ദേശപ്രകാരം ആരംഭിച്ച ആ ദൗത്യം പിന്നീട് ലോകമെമ്പാടുമുള്ള ദശലക്ഷക്കണക്കിന് ആളുകളിലേക്ക് കൃഷ്ണാവബോധത്തിന്റെ സന്ദേശമെത്തിച്ചു. അചഞ്ചലമായ വിശ്വാസം, പൂര്‍ണമായ ശരണാഗതി, പ്രതിസന്ധികളെ അതിജീവിക്കാനുള്ള മനക്കരുത്ത്, നിസ്വാര്‍ഥ സേവനം എന്നിവ നിറഞ്ഞ അദ്ദേഹത്തിന്റെ ജീവിതമാണ് സിനിമയിലൂടെ അവതരിപ്പിക്കുന്നത്.
ഇന്ത്യന്‍ സിനിമയില്‍ വ്യത്യസ്തമായ കഥകള്‍ക്കും വമ്പന്‍ സിനിമാറ്റിക് പരീക്ഷണങ്ങള്‍ക്കും പിന്തുണ നല്‍കുന്ന നിര്‍മ്മാണക്കമ്പനിയാണ് ഹോംബാലെ ഫിലിംസ്. ‘കെ.ജി.എഫ്’ ഫ്രാഞ്ചൈസി, ‘സലാര്‍’, ‘കാന്താര’ തുടങ്ങിയ ചിത്രങ്ങളിലൂടെ പാന്‍ ഇന്ത്യന്‍ തലത്തില്‍ വലിയ വിജയം നേടിയ കമ്പനി, ഇന്ത്യയിലെ ശ്രദ്ധേയമായ ആനിമേഷന്‍ ചിത്രങ്ങളിലൊന്നായ ‘മഹാവതാര്‍ നരസിംഹ’യിലൂടെയും പുതിയ മേഖലകളിലേക്ക് കടന്നിരുന്നു. ‘കാന്താര’ ഫ്രാഞ്ചൈസിയിലൂടെ ഭൂതകോല പോലുള്ള പ്രാദേശിക നാടോടി-സാംസ്‌കാരിക പാരമ്പര്യങ്ങളെ രാജ്യവ്യാപകമായി പ്രേക്ഷകരിലേക്ക് എത്തിക്കാനും ഹോംബാലെ ഫിലിംസിന് കഴിഞ്ഞിട്ടുണ്ട്. ‘മഹാവതാര്‍ നരസിംഹ’യുടെ വിജയത്തിന് പിന്നാലെ ഇന്ത്യന്‍ നാഗരികതയുടെയും വിശ്വാസത്തിന്റെയും സാംസ്‌കാരിക പൈതൃകത്തിന്റെയും കഥകള്‍ പുതിയ തലമുറയിലേക്ക് എത്തിക്കാനുള്ള ശ്രമത്തിന്റെ തുടര്‍ച്ചയായാണ് ‘ശരണാഗതി’ ഒരുങ്ങുന്നത്. സനാതന ധര്‍മ്മത്തിന്റെ ആഴത്തിലുള്ള ആശയങ്ങള്‍ ആധുനിക സിനിമാ സാങ്കേതികവിദ്യയുടെ സഹായത്തോടെ കൂടുതല്‍ പ്രേക്ഷകരിലേക്ക് എത്തിക്കുകയാണ് ഈ ചിത്രത്തിലൂടെ ലക്ഷ്യമിടുന്നത്.
ഗൗര ശക്തി ദാസാണ് ചിത്രത്തിന്റെ രചനയും സംവിധാനവും നിര്‍വഹിക്കുന്നത്. രാജേഷ് സിങ്ങും ലോഹിത് റാവുവും ചേര്‍ന്നാണ് നിര്‍മ്മാണം. ശ്രീധര്‍ ശികാരിപുരയാണ് വിഷ്വല്‍ ഡയറക്ടര്‍. ട്രാന്‍സെന്‍ഡന്റല്‍ ഫിലിംസിന്റെ നിര്‍മ്മാണത്തില്‍ ഡൈവ് ഡീപ്പ് എ.ഐ. സ്റ്റുഡിയോയുമായി സഹകരിച്ചാണ് ചിത്രം ഒരുക്കുന്നത്. ഹോംബാലെ ഫിലിംസ് ചിത്രം അവതരിപ്പിക്കുകയും ലോകമെമ്പാടും വിതരണം ചെയ്യുകയും ചെയ്യും. ശ്രീരംഗപട്ടണത്തെ ശ്രീ നരസിംഹ ചൈതന്യ മഠം, ഇസ്‌കോണ്‍ ബാംഗ്ലൂര്‍, ഇസ്‌കോണ്‍, ഭക്തിവേദാന്ത ബുക്ക് ട്രസ്റ്റ് (ബി.ബി.ടി.) എന്നിവയുടെ അനുഗ്രഹാശിസ്സുകളും പിന്തുണയും ചിത്രത്തിനുണ്ട്. ഒരു വ്യക്തിയുടെ സമ്പൂര്‍ണ ശരണാഗതിയുടെയും തലമുറകളെ അതിജീവിക്കുന്ന ആത്മീയ പൈതൃകത്തിന്റെയും കഥ പറയുന്ന ‘ശരണാഗതി’ 2027 ഓഗസ്റ്റില്‍ ആഗോളതലത്തില്‍ തിയേറ്ററുകളിലെത്തും. പിആര്‍ഒ : വൈശാഖ് സി വടക്കേവീട്, ജിനു അനില്‍കുമാര്‍.
