തെലുങ്ക് സൂപ്പർ താരം നാനിയും സംവിധായകൻ ശ്രീകാന്ത് ഒഡേലയും കൂട്ടുകെട്ടിൽ ഒരുങ്ങിയ പാൻ ഇന്ത്യൻ ചിത്രം ‘ദി പാരഡൈസ്’ ആഗോള ബോക്സോഫീസിൽ തരംഗം സൃഷ്ടിക്കുന്നു. റിലീസ് ചെയ്ത് ഒമ്പത് ദിവസത്തിനുള്ളിൽ ചിത്രം ആഗോളതലത്തിൽ 180 കോടി രൂപ കളക്ഷൻ നേടി ചരിത്രനേട്ടത്തിലേക്ക് കുതിക്കുകയാണ്. സമ്മിശ്ര പ്രതികരണങ്ങൾക്കിടയിലും തിയേറ്ററുകളിൽ വലിയ മുന്നേറ്റമാണ് ചിത്രം കാഴ്ചവെക്കുന്നത്. ദുൽഖർ സൽമാന്റെ വേഫെറർ ഫിലിംസാണ് ചിത്രം കേരളത്തിലെത്തിച്ചിരിക്കുന്നത്. ‘ദസറ’ എന്ന ബ്ലോക്ക്ബസ്റ്റർ വിജയത്തിന് ശേഷം നാനിയും ശ്രീകാന്ത് ഒഡേലയും വീണ്ടും ഒന്നിക്കുന്ന ചിത്രമെന്ന നിലയിൽ റിലീസിന് മുൻപ് തന്നെ വലിയ ഹൈപ്പ് നേടിയിരുന്നു. ശ്രീലക്ഷ്മി വെങ്കടേശ്വര സിനിമാസിന്റെ ബാനറിൽ സുധാകർ ചെറുകുറിയാണ് നിർമ്മാണം.
വമ്പൻ കാൻവാസിൽ ഒരുക്കിയ ആക്ഷൻ ചിത്രത്തിനൊപ്പം ശക്തമായൊരു അമ്മ-മകൻ ബന്ധത്തിന്റെ വൈകാരിക കഥ കൂടിയാണ് ‘ദി പാരഡൈസ്’ പറയുന്നത്. നാനിയുടെ കരിയറിലെ ഏറ്റവും വലിയ പ്രോജക്ടായ ചിത്രത്തിൽ ‘ജദാൽ’ എന്ന മാസ് കഥാപാത്രമായാണ് താരം എത്തുന്നത്. കിൽ എന്ന ചിത്രത്തിലൂടെ ശ്രദ്ധേയനായ രാഘവ് ജൂയൽ വിക്രം മാലിക് എന്ന വില്ലൻ കഥാപാത്രത്തെ അവതരിപ്പിച്ച് കൈയടി നേടുന്നു. കായദു ലോഹർ, മോഹൻ ബാബു, സമ്പൂർണേഷ് ബാബു, സോണാലി കുൽക്കർണി തുടങ്ങിയ വൻതാരനിരയും ചിത്രത്തിലുണ്ട്. അനിരുദ്ധ് രവിചന്ദറിന്റെ സംഗീതവും ചിത്രത്തിന്റേതായി പുറത്തിറങ്ങിയ ഗാനങ്ങളും സമൂഹ മാധ്യമങ്ങളിൽ ഇതിനോടകം തന്നെ തരംഗമായി കഴിഞ്ഞിട്ടുണ്ട്. എട്ട് ഭാഷകളിലായി ലോകമെമ്പാടുമുള്ള തിയേറ്ററുകളിൽ പ്രദർശനം തുടരുന്ന ചിത്രം ബോക്സോഫീസിലെ പുതിയ റെക്കോർഡുകൾ ലക്ഷ്യമാക്കി മുന്നേറുകയാണ്.
