ചുരുക്കം സിനിമകൾ കൊണ്ട് പ്രേക്ഷകരുടെ ഇഷ്ടനടനായി മാറിയ ആളാണ് പ്രദീപ് രംഗനാഥൻ. നടന്റേതായി പുറത്തുവന്ന സിനിമകൾ എല്ലാം വലിയ ഹിറ്റാണ്. ഇപ്പോഴിതാ അഭിനയത്തിനും സംവിധാനത്തിനും പിന്നാലെ നിർമാണരംഗത്തേക്കും കടക്കുകയാണ് പ്രദീപ്. നടന്റെ പുതിയ നിർമാണ കമ്പനിയായ ‘പ്രദീപ് രംഗനാഥൻ ഷോ’ നിർമിക്കുന്ന ആദ്യ സിനിമയുടെ പ്രൊമോ വീഡിയോ പുറത്ത്.
മമിത ബൈജു ആണ് സിനിമയിൽ നായികയായി എത്തുന്നത്. ഡ്യൂഡ് എന്ന സിനിമയ്ക്ക് ശേഷം മമിതയും പ്രദീപും ഒന്നിക്കുന്ന സിനിമയാണിത്.
അശ്വന്ത് മാരിമുത്തു, സ്വാസിക, ശിവാജി സോന്തിനേനി, അനാമിക മഹി, ലിസി ആൻ്റണി എന്നിവരാണ് സിനിമയിലെ മറ്റു അഭിനേതാക്കൾ. സായ് അഭ്യങ്കർ ആണ് സിനിമയ്ക്കായി സംഗീതം നൽകുന്നത്. ആറ് സംവിധായകർ ചേർന്നാണ് ഈ സിനിമ ഒരുക്കുന്നത് എന്ന പ്രത്യേകതയുമുണ്ട്. ദി ആൽഫ ടീം എന്ന പേരിലാണ് ഈ സംവിധായകരെ അവതരിപ്പിച്ചിരിക്കുന്നത്. ഛായാഗ്രഹണം: ദിനേശ് പുരുഷോത്തമൻ, എഡിറ്റർ: പ്രദീപ് ഇ രാഗവ്, പ്രൊഡക്ഷൻ ഡിസൈനർ: അശ്വിൻ ലാറ.
അതേസമയം, ഡ്യൂഡ് തിയേറ്ററിൽ വലിയ വിജയം നേടിയ സിനിമയാണ്. 100 കോടിക്ക് മുകളിൽ നേടിയ സിനിമ പ്രദീപിന്റെ കരിയറിലെ തുടർച്ചയായ മൂന്നാമത്തെ 100 കോടി പടമാണ്. തമിഴിലെ മമിതയുടെ ആദ്യ 100 കോടി കൂടെയാണ് സിനിമ. നവാഗത സംവിധായകനായ കീർത്തീശ്വരനാണ് ഡ്യൂഡ് സംവിധാനം ചെയ്തിരിക്കുന്നത്. പ്രദീപിന്റേതായി അവസാനം പുറത്തുവന്ന ലവ് ഇൻ ഇൻഷുറൻസ് കമ്പനി തിയേറ്ററിൽ പരാജയമായിരുന്നു. സമ്മിശ്ര അഭിപ്രായമാണ് സിനിമയ്ക്ക് ലഭിച്ചത്.
