തമിഴ് സിനിമാ ചരിത്രത്തിൽ പുതിയൊരു അധ്യായം കൂടി എഴുതിച്ചേർത്ത് ജനപ്രിയ നായകൻ സൂര്യ. ഒരു കലണ്ടർ വർഷത്തിൽ 200 കോടി രൂപയിലധികം ആഗോള കളക്ഷൻ നേടുന്ന മൂന്ന് ചിത്രങ്ങൾ സമ്മാനിക്കുന്ന ആദ്യ തമിഴ് സിനിമാ താരം എന്ന അപൂർവ നേട്ടമാണ് സൂര്യ സ്വന്തമാക്കിയിരിക്കുന്നത്. പുതിയ ചിത്രമായ ‘സീൻ’ റിലീസ് ചെയ്ത് ഏഴുദിവസം പിന്നിട്ടപ്പോഴാണ് താരം ഈ ചരിത്രനേട്ടം കൈവരിച്ചത്. ഈ വർഷം തിയേറ്ററുകളിലെത്തിയ ‘കറുപ്പ്’, ‘വിശ്വനാഥ് ആൻഡ് സൺസ്’ എന്നീ ചിത്രങ്ങളുടെ വൻ വിജയത്തിന് പിന്നാലെയാണ് ‘സീനും’ ഈ നേട്ടം സ്വന്തമാക്കിയത്.
ഈ വർഷത്തെ സൂര്യയുടെ ഏറ്റവും വലിയ വിജയമായ ‘കറുപ്പ്’ ആഗോളതലത്തിൽ 310 കോടി രൂപ ഗ്രോസ് കളക്ഷനും ഇന്ത്യയിൽ 198 കോടി രൂപ നെറ്റ് കളക്ഷനുമാണ് നേടിയത്. രണ്ടാമത്തെ ചിത്രമായ ‘വിശ്വനാഥ് ആൻഡ് സൺസ്’ 209 കോടി രൂപ ആഗോള ഗ്രോസ് കളക്ഷനും ഇന്ത്യയിൽ 122 കോടി രൂപ നെറ്റും സ്വന്തമാക്കി. മൂന്നാമതായി എത്തിയ ജിത്തു മാധവൻ ചിത്രം ‘സീൻ’-ന്റെ ആഗോള ഗ്രോസ് 200 കോടി രൂപയാണ്. ചിത്രം ഇന്ത്യയിൽ 111 കോടി രൂപ നെറ്റ് കളക്ഷൻ നേട്ടവും കൈവരിച്ചു.ഇന്ത്യൻ സിനിമാ ചരിത്രത്തിൽ ഇതിനുമുമ്പ് അക്ഷയ് കുമാറും (2019) ഷാരൂഖ് ഖാനും (2023) മാത്രമാണ് ഒരു വർഷത്തിൽ മൂന്ന് അല്ലെങ്കിൽ അതിലധികം 200 കോടി കളക്ഷൻ ചിത്രങ്ങൾ നൽകിയിട്ടുള്ളത്. അക്ഷയ് കുമാറിന് 2019-ൽ നാല് ചിത്രങ്ങളും, ഷാരൂഖ് ഖാന് 2023-ൽ മൂന്ന് ചിത്രങ്ങളുമാണ് ഈ നേട്ടം സമ്മാനിച്ചത്. ഇപ്പോൾ ഈ എലീറ്റ് പട്ടിലേക്ക് കടക്കുന്ന ആദ്യ സൗത്ത് ഇന്ത്യൻ താരമായി സൂര്യ മാറിയിരിക്കുകയാണ്.
ജിത്തു മാധവൻ സംവിധാനം ചെയ്ത കോമഡി ത്രില്ലർ ചിത്രമായ ‘സീനിൽ’ ഡിഎസ്പി ഇൻബരാജ് എന്ന സ്റ്റൈലിഷ് പോലീസ് ഉദ്യോഗസ്ഥന്റെ കഥാപാത്രത്തെയാണ് സൂര്യ അവതരിപ്പിച്ചത്. രാമായണം ചിത്രത്തിൽ നിന്നുള്ള ശക്തമായ മത്സരം നിലനിൽക്കെയാണ് ‘സീൻ’ ആദ്യ വാരത്തിൽ തന്നെ 200 കോടിയെന്ന റെക്കോർഡിലെത്തിയത്. ചിത്രത്തിന്റെ ആദ്യ വാര ആഗോള ഗ്രോസ് 200 കോടിയും ഇന്ത്യയിലെ നെറ്റ് കളക്ഷൻ 111.50 കോടിയുമാണ്. വിദേശ വിപണികളിൽ നിന്ന് മാത്രം ചിത്രം 7.5 മില്യൺ ഡോളർ വാരിക്കൂട്ടി. സൂര്യയുടെയും ജ്യോതികയുടെയും 2D എന്റർടൈൻമെന്റും പുതുതായി ആരംഭിച്ച ഴഗരം സ്റ്റുഡിയോസും ചേർന്നാണ് ചിത്രം നിർമ്മിച്ചിരിക്കുന്നത്. 12 വർഷത്തെ ഇടവേളയ്ക്ക് ശേഷം നസ്രിയ നസീം തമിഴ് സിനിമയിലേക്ക് തിരിച്ചെത്തുന്നു എന്ന പ്രത്യേകതയും ഈ ചിത്രത്തിനുണ്ട്. കൂടാതെ മലയാളി താരം നസ്ലിൻ ഈ ചിത്രത്തിലൂടെ തമിഴ് സിനിമയിൽ അരങ്ങേറ്റം കുറിച്ചു. ആനന്ദരാജ്, ലാൽ, രാജ്പ്രിയൻ, സുരേഷ് മതിയഴകൻ, ഗജരാജ് എന്നിവരാണ് ചിത്രത്തിലെ മറ്റ് പ്രധാന വേഷങ്ങൾ കൈകാര്യം ചെയ്തത്.
