ജയസൂര്യയെ നായകനാക്കി ജിതിൻ കെ. ജോസ് സംവിധാനം ചെയ്യുന്ന ‘മായൻ’ ഡിസംബർ മൂന്നിന് ആഗോള റിലീസായി പ്രേക്ഷകരിലേക്ക്. മാജിക് മൂൺ പ്രൊഡക്ഷൻസിന്റെ ബാനറിൽ രാജീവ് ഗോവിന്ദൻ നിർമിക്കുന്ന ചിത്രത്തിന്റെ ചിത്രീകരണം പൂർത്തിയായി. പാലായിൽ നടന്ന അവസാനഘട്ട ചിത്രീകരണത്തോടെയാണ് ചിത്രം പാക്കപ്പായത്. റഷ്യയിൽ നടന്ന ആദ്യ ഷെഡ്യൂളിന് ശേഷമാണ് കേരളത്തിലെ ചിത്രീകരണം ആരംഭിച്ചത്. ‘കളങ്കാവലി’ന് ശേഷം ജിതിൻ കെ. ജോസ് സംവിധാനം ചെയ്യുന്ന ചിത്രം കൂടിയാണ് ‘മായൻ’. ‘ഓർഡിനറി’, ‘അനാർക്കലി’ എന്നീ ബ്ലോക്ക്ബസ്റ്റർ ചിത്രങ്ങൾ നിർമിച്ച രാജീവ് ഗോവിന്ദൻ മാജിക് മൂൺ പ്രൊഡക്ഷൻസ് ബാനറിൽ ഒരുക്കുന്ന മൂന്നാമത്തെ ചിത്രമാണിത്. റാഫിയും ജിതിൻ കെ. ജോസും ചേർന്നാണ് തിരക്കഥ ഒരുക്കിയിരിക്കുന്നത്.
‘മായൻ ചാപ്റ്റർ വൺ’ എന്നാണ് ചിത്രത്തിന്റെ പൂർണമായ പേര്. ‘ബിയോണ്ട് ദ ഷാഡോസ്’ എന്നാണ് ടൈറ്റിൽ ടാഗ് ലൈൻ. നൈല ഉഷയാണ് ചിത്രത്തിലെ നായിക. വിജയ് ബാബു, ഐശ്വര്യ രാജ്, ജിബിൻ ഗോപിനാഥ് എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. ജയസൂര്യ പൊലീസ് ഓഫീസറുടെ വേഷത്തിലെത്തുന്ന ചിത്രം ഒരു ദുരൂഹത നിറഞ്ഞ ത്രില്ലറാണെന്ന സൂചനയാണ് നേരത്തെ പുറത്തുവന്ന ടൈറ്റിൽ വീഡിയോ നൽകിയത്. സാധാരണ ദുരൂഹതാ ചിത്രങ്ങളിൽനിന്ന് വ്യത്യസ്തമായി രാജ്യാതിർത്തികൾക്കപ്പുറത്തേക്ക് നീളുന്ന ഒരു നിഗൂഢ ലോകത്തേക്കാണ് ‘മായൻ’ പ്രേക്ഷകരെ കൊണ്ടുപോകുന്നതെന്നാണ് ലഭിക്കുന്ന സൂചനകൾ.
നൂറ്റാണ്ടുകൾ പഴക്കമുള്ള ചില രഹസ്യ ആചാരങ്ങളും ലോകത്തിന്റെ വിവിധ ഭാഗങ്ങളിൽ മറഞ്ഞിരിക്കുന്ന ശക്തികളും തമ്മിലുള്ള ബന്ധമാണ് ചിത്രത്തിന്റെ കഥയുടെ പ്രധാന പശ്ചാത്തലമെന്നാണ് റിപ്പോർട്ടുകൾ. ഇതിനിടെ കേരളത്തിലെ ചില പുരാതന ക്രിസ്തീയ കുടുംബങ്ങളുമായി ബന്ധപ്പെട്ട് പറയപ്പെടുന്ന ‘കറുത്തച്ചനൂട്ട്’ എന്ന ദുർമന്ത്രവാദ രീതിയും ചിത്രത്തിന്റെ പ്രമേയത്തിന്റെ ഭാഗമാകുമോ എന്ന ചർച്ചകളും സജീവമാണ്. എന്നാൽ ഇക്കാര്യത്തിൽ കൂടുതൽ വ്യക്തത ലഭിക്കാനായി പ്രേക്ഷകർ കാത്തിരിക്കുകയാണ്. ആഗോള പശ്ചാത്തലവും നിഗൂഢത നിറഞ്ഞ കഥയും അന്താരാഷ്ട്ര നിലവാരത്തിലുള്ള സാങ്കേതിക മികവും ഒരുമിക്കുന്ന വമ്പൻ ദുരൂഹതാ ത്രില്ലറായാണ് ‘മായൻ’ ഒരുങ്ങുന്നതെന്നാണ് നിലവിലെ സൂചന.
ഫൈസൽ അലിയാണ് ചിത്രത്തിന്റെ ഛായാഗ്രാഹകൻ. മുജീബ് മജീദ് സംഗീതം ഒരുക്കുന്നു. പ്രവീൺ പ്രഭാകറാണ് ചിത്രസംയോജനം. ദീപക് പരമേശ്വരൻ പ്രൊഡക്ഷൻ കൺട്രോളറും സുനിൽ ദാസ് പ്രൊഡക്ഷൻ ഡിസൈനറും രോഹിത് ആർ. നായർ ലൈൻ പ്രൊഡ്യൂസറുമാണ്. സമീറ സനീഷ് വസ്ത്രാലങ്കാരവും അമൽ ചന്ദ്രൻ മേക്കപ്പും നിർവഹിക്കുന്നു. ബോസ് വി ചീഫ് അസോസിയേറ്റ് ഡയറക്ടറാണ്. രാജീവ് ഗോവിന്ദനും ജിതിൻ കെ. ജോസും ചേർന്നാണ് വരികൾ ഒരുക്കുന്നത്. ശ്രീഖിൽ ശ്രീനിവാസനാണ് സഹരചയിതാവ്. സിനറ്റ് സേവ്യർ സ്റ്റിൽസ്, ആന്റണി സ്റ്റീഫൻ പ്രൊജക്ട് ഡിസൈൻ, വൈശാഖ് സി. വടക്കേവീടും ജിനു അനിൽകുമാറും പ്രചാരണ വിഭാഗം എന്നിവ കൈകാര്യം ചെയ്യുന്നു. ഡിസംബർ മൂന്നിന് ചിത്രം തിയറ്ററുകളിലെത്തുമ്പോൾ ‘മായൻ’ മുന്നോട്ടുവയ്ക്കുന്ന നിഗൂഢ ലോകവും അതിന് പിന്നിലെ രഹസ്യങ്ങളും എങ്ങനെയായിരിക്കും എന്നതാണ് ഇനി അറിയാനുള്ളത്.
