പ്രേക്ഷകർ ഏറെ നാളായി കാത്തിരിക്കുന്ന ചിത്രമാണ് മോഹൻലാലിനെ നായകനാക്കി ജീത്തു ജോസഫ് സംവിധാനം ചെയ്യുന്ന റാം. 2020ൽ ഷൂട്ടിംഗ് ആരംഭിച്ച ചിത്രം കൊവിഡ് സമയത്ത് നിർത്തേണ്ടി വന്നതിന് ശേഷം ഇപ്പോൾ ഷൂട്ടിംഗ് പുനരാരംഭിച്ചിരിക്കുകയാണ്. ചിത്രത്തിന്റെ ഷൂട്ട് റീസ്റ്റാർട്ട് ചെയ്യുന്നതായി നേരത്തെ ചില റിപ്പോർട്ടുകൾ ഉണ്ടായിരുന്നെങ്കിലും സ്ഥിരീകരിച്ചിരുന്നില്ല. ഇപ്പോൾ നടി പ്രിയമണിയാണ് തന്റെ ഇൻസ്റ്റഗ്രാമിലൂടെ റാം ഷൂട്ടിങ്ങ് ആരംഭിച്ച വിവരം അറിയിച്ചിരിക്കുന്നത്. ലൊക്കേഷനിൽ ക്ലാപ് ബോർഡ് പിടിച്ചുനിൽക്കുന്ന ചിത്രങ്ങളാണ് നടി പങ്കുവെച്ചിരിക്കുന്നത്.
എറണാകുളത്തും ഹൈദരാബാദിലും ആയിരിക്കും ഇനി ചിത്രത്തിന്റെ ഷൂട്ടിംഗ് ഉണ്ടാവുക എന്നാണ് റിപ്പോർട്ട്. ’20-25 ദിവസമുണ്ടെങ്കിൽ റാം ആദ്യഭാഗം പൂർത്തിയാകും. മറ്റൊരു 25 ദിവസമുണ്ടെങ്കിൽ രണ്ടാം ഭാഗവും. ആകെ മൊത്തത്തിൽ ഒരു 50 ദിവസത്തെ ഷൂട്ട് മാത്രമാണ് വേണ്ടിയിരുന്നത്’, ജീത്തു ഒരിക്കൽ അഭിമുഖത്തിൽ പറയുക ഉണ്ടായി. മോഹൻലാൽ കേന്ദ്രകഥാപാത്രത്തെ അവതരിപ്പിക്കുന്ന ഈ ചിത്രത്തിൽ തൃഷ, ഇന്ദ്രജിത്ത് സുകുമാരൻ, പ്രിയാമണി, സംയുക്ത, ആദിൽ ഹുസൈൻ, ദുർഗ്ഗ കൃഷ്ണ, അനൂപ് മേനോൻ, ചന്തുനാഥ്, സായ് കുമാർ, സുമൻ, വസിഷ്ഠ എൻ. സിംഹ, സിദ്ധിഖ്, ലിയോണ ലിഷോയ് തുടങ്ങി പ്രമുഖ താരങ്ങളുടെ ഒരു വൻ നിര തന്നെയുണ്ട്. വിഷ്ണു ശ്യാമാണ് ചിത്രത്തിന്റെ സംഗീത സംവിധാനം നിർവഹിക്കും.
