കെജിഎഫ് എന്ന ബ്രഹ്മാണ്ഡ സിനിമയ്ക്ക് ശേഷം യഷ് നായകനായി എത്തുന്ന ചിത്രമാണ് ‘ടോക്സിക്’. ഗീതു മോഹൻദാസ് ആണ് സിനിമ സംവിധാനം ചെയ്യുന്നത്. മാർച്ച് 19 നാണ് സിനിമയുടെ റിലീസ് പ്രഖ്യാപിച്ചിരുന്നത്. എന്നാൽ ഇറാൻ-ഇസ്രയേൽ സംഘർഷത്തെയും തുടർന്ന് മിഡിൽ ഈസ്റ്റിൽ തുടരുന്ന അനിശ്ചിതത്വത്തെയും പരിഗണിച്ച് സിനിമയുടെ റിലീസ് മാറ്റിയിരുന്നു. ഇപ്പോഴിതാ ഇതേ ഡേറ്റിൽ മറ്റൊരു സിനിമ എത്താൻ ഒരുങ്ങുകയാണ്. പവൻ കല്യാൺ നായകനായി എത്തുന്ന ഉസ്താദ് ഭഗത് സിംഗ് ആണ് ടോക്സിക്കിന് പകരം മാർച്ച് 19 ന് പുറത്തിറങ്ങുന്നത്. ഹരീഷ് ശങ്കർ ഒരുക്കുന്ന സിനിമയിൽ രാശി ഖന്നയും ശ്രീലീലയുമാണ് നായികമാർ. ദേവി ശ്രീ പ്രസാദ്, തമൻ എന്നിവരാണ് സിനിമയ്ക്കായി സംഗീതം ഒരുക്കുന്നത്. ദേ കാൾ ഹിം ഓജി എന്ന സിനിമയ്ക്ക് ശേഷം പുറത്തിറങ്ങുന്ന പവൻ കല്യാൺ സിനിമയാണിത്. ഒരു മാസ് ആക്ഷൻ എന്റർടെയ്നറായി സംവിധാനം ചെയ്തിരിക്കുന്ന ഈ ചിത്രത്തിൽ പവൻ കല്യാണ് ശക്തമായ ഒരു പോലീസ് വേഷത്തിൽ എത്തുന്നു.
അതേസമയം, ടോക്സിക് ജൂൺ നാലിന് പുറത്തിറങ്ങും. ഇസ്രയേൽ – ഇറാൻ സംഘർഷം സാധാരണ ജനജീവിതത്തെ എന്ന പോലെ സിനിമാ മേഖലയെയും ബാധിച്ചിരിക്കുകയാണ്. ചിത്രത്തിൽ യഷ് ഇരട്ട വേഷത്തിലാണ് എത്തുന്നതെന്ന സൂചനയാണ് ടീസർ നൽകുന്നത്. ടീസറിന്റെ അവസാനം പുതിയ ലുക്കിലുള്ള യഷിനെ കാണാനാകും. പക്കാ ഹോളിവുഡ് സിനിമയെന്ന് തോന്നിപ്പിക്കുന്ന തരം വിഷ്വലുകൾ ആണ് സിനിമയിൽ ഉള്ളതെന്ന സൂചനയാണ് ടീസർ നൽകുന്നത്. സിനിമയിൽ അഞ്ച് നായികമാരാണ് ഉള്ളത്. ഇവരുടെയെല്ലാം പോസ്റ്ററുകൾ നേരത്തെ പുറത്തുവന്നിരുന്നു. നയൻതാര, കിയാര അദ്വാനി, സുദേവ് നായർ എന്നിവരടങ്ങുന്ന വൻ താരനിര അണിനിരക്കുന്ന ഈ ചിത്രം ഗീതു മോഹൻദാസിന്റെ സംവിധായക എന്ന നിലയിലുള്ള കരിയറിലെ ഏറ്റവും വലിയ കാൽവെപ്പാണ്. കെ വി എൻ പ്രൊഡക്ഷൻസിന്റെ ബാനറിൽ വെങ്കട്ട് കെ നാരായണയും മോൺസ്റ്റർ മൈൻഡ് ക്രിയേഷൻസും ചേർന്നാണ് ടോക്സിക് നിർമ്മിക്കുന്നത്. യഷിന്റെ 19-ാം സിനിമയാണിത്. ‘എ ഫെയറി ടെയിൽ ഫോർ ഗ്രോൺ-അപ്സ്’ എന്നാണ് ചിത്രത്തിന്റെ ടാഗ് ലൈൻ.
