ദുൽഖർ സൽമാനെ നായകനാക്കി പവൻ സാദിനേനി സംവിധാനം ചെയ്ത പാൻ ഇന്ത്യൻ ചിത്രം ‘ആകാശംലോ ഒക താര’ കേരള ബോക്സ് ഓഫീസിൽ മികച്ച മുന്നേറ്റം തുടരുന്നു. ആദ്യ ഷോ മുതൽ തന്നെ മികച്ച പ്രേക്ഷക – നിരൂപക പ്രതികരണം സ്വന്തമാക്കിയ ചിത്രം, ആദ്യദിനത്തേക്കാൾ ഇരട്ടി കളക്ഷനുമായി രണ്ടാം ദിനത്തിലും കുതിപ്പ് തുടർന്നു. കേരളത്തിൽ 115 കേന്ദ്രങ്ങളിലായി റിലീസ് ചെയ്ത ചിത്രം, പ്രേക്ഷകരുടെ വർധിച്ചുവരുന്ന തിരക്ക് കണക്കിലെടുത്ത് മൂന്നാം ദിനത്തോടെ 155 സ്ക്രീനുകളിലേക്ക് പ്രദർശനം വ്യാപിപ്പിച്ചിരിക്കുകയാണ്. രണ്ടാം ദിനം മാത്രം കേരളത്തിൽ 92 സ്പെഷ്യൽ ലേറ്റ് നൈറ്റ് ഷോകൾ നടന്നതും ചിത്രത്തിന് ലഭിക്കുന്ന വലിയ സ്വീകാര്യതയുടെ തെളിവാണ്. ദുൽഖർ സൽമാന്റെ വേഫറെർ ഫിലിംസ് ആണ് ചിത്രം കേരളത്തിൽ വിതരണം ചെയ്തിരിക്കുന്നത്. സന്ദീപ് ഗണ്ണവും രമ്യ ഗണ്ണവും ചേർന്ന് നിർമ്മിച്ച ചിത്രം ഗീത ആർട്സ്, സ്വപ്ന സിനിമ, ലൈറ്റ്ബോക്സ് മീഡിയ എന്നീ ബാനറുകളാണ് അവതരിപ്പിക്കുന്നത്.
പ്രീമിയർ ഷോകൾ മുതൽ മികച്ച പ്രതികരണം നേടിയ ചിത്രത്തിന് റിലീസിന് ശേഷവും പ്രേക്ഷകരിൽ നിന്ന് വലിയ പിന്തുണയാണ് ലഭിക്കുന്നത്. ദുൽഖർ സൽമാന്റെ പ്രകടനവും സാത്വിക വീരവല്ലിയുടെ അഭിനയവും ചിത്രത്തിന്റെ വൈകാരികമായ അവതരണവും പ്രേക്ഷക പ്രശംസ നേടുന്നുണ്ട്. സ്വപ്നങ്ങൾക്കും പ്രതീക്ഷകൾക്കും പ്രണയത്തിനും പ്രാധാന്യം നൽകുന്ന കഥയും മികച്ച മേക്കിംഗും സംഗീതവുമെല്ലാം ചിത്രത്തിന്റെ പ്രധാന ആകർഷണങ്ങളാണ്. പ്രേക്ഷകരുടെ പോസിറ്റീവ് പ്രതികരണം കൂടുതൽ ഷോകളിലേക്കും സ്ക്രീനുകളിലേക്കും ചിത്രം വ്യാപിപ്പിക്കാൻ വഴിയൊരുക്കിയിരിക്കുകയാണ്. യുവ പ്രേക്ഷകരും കുടുംബ പ്രേക്ഷകരും ഒരുപോലെ ചിത്രത്തെ സ്വീകരിക്കുന്നതും വിജയത്തിന് കാരണമായിട്ടുണ്ട്.
ചിത്രത്തിൽ ‘കൃഷ്ണ’ എന്ന കഥാപാത്രത്തെയാണ് ദുൽഖർ സൽമാൻ അവതരിപ്പിക്കുന്നത്. പുതുമുഖം സാത്വിക വീരവല്ലി ‘കല്പന’യായി എത്തുന്നു. സമൂഹം മുന്നിൽ വെക്കുന്ന അതിർവരമ്പുകൾ മറികടന്ന് സ്വന്തം സ്വപ്നങ്ങളിലേക്ക് മുന്നേറാൻ ശ്രമിക്കുന്ന കല്പനയ്ക്ക് പിന്തുണയുമായി നിൽക്കുന്ന കൃഷ്ണയുടെ കഥയാണ് ചിത്രം പറയുന്നത്. സ്വപ്നങ്ങൾ കാണാനും അവ നേടിയെടുക്കാൻ പരിശ്രമിക്കാനും പ്രചോദനം നൽകുന്ന ഈ പ്രമേയം പ്രേക്ഷകരുമായി വൈകാരികമായി സംവദിക്കുന്നുണ്ട്. എ.പി.ജെ. അബ്ദുൾ കലാം, വിക്രം സാരാഭായ്, കല്പന ചൗള തുടങ്ങിയ മഹത് വ്യക്തിത്വങ്ങൾക്ക് ചിത്രം സമർപ്പിച്ചിരിക്കുന്നതും ഇതിന്റെ ആശയലോകത്തിന് കൂടുതൽ പ്രസക്തി നൽകുന്നു.
ശ്രുതി ഹാസൻ ‘രോഹിണി’ എന്ന ശക്തമായ കഥാപാത്രത്തെ അവതരിപ്പിക്കുന്ന ചിത്രത്തിൽ റൂഹാനി ശർമ, മുരളി ശർമ, സ്വാസിക എന്നിവരും പ്രധാന വേഷങ്ങളിലുണ്ട്. ജി.വി. പ്രകാശ് കുമാറിന്റെ സംഗീതവും പശ്ചാത്തലസംഗീതവും ചിത്രത്തിന്റെ വൈകാരിക മുഹൂർത്തങ്ങൾക്ക് കരുത്തേകുന്നു. ചിത്രത്തിലെ ‘കുട്ടി കുട്ടി പൂവേ’, ‘കണ്ണേ കണ്ണേ’ എന്നീ ഗാനങ്ങൾ നേരത്തെ തന്നെ ശ്രദ്ധ നേടിയിരുന്നു. ദൃശ്യഭംഗിയും അവതരണ മികവും പ്രകടനങ്ങളും ഒത്തുചേരുന്ന മനോഹരമായ സിനിമാനുഭവമാണ് ‘ആകാശംലോ ഒക താര’ എന്നാണ് പ്രേക്ഷക പ്രതികരണങ്ങൾ വ്യക്തമാക്കുന്നത്.
മലയാളം, തമിഴ്, തെലുങ്ക്, ഹിന്ദി ഭാഷകളിലായി ആഗോളതലത്തിൽ റിലീസ് ചെയ്ത ചിത്രം മികച്ച ബോക്സ് ഓഫീസ് പ്രകടനമാണ് കാഴ്ചവയ്ക്കുന്നത്. ആദ്യ രണ്ട് ദിവസങ്ങളിലെയും മികച്ച മുന്നേറ്റത്തോടെ കേരളത്തിൽ കൂടുതൽ സ്ക്രീനുകളിലേക്ക് പ്രദർശനം വ്യാപിപ്പിച്ച ചിത്രം, വരും ദിവസങ്ങളിലും ബോക്സ് ഓഫീസിൽ കുതിപ്പ് തുടരുമെന്ന പ്രതീക്ഷയിലാണ്.




