തെലുങ്ക് സൂപ്പർതാരം രാംചരൺ നായകനാകുന്ന ഏറ്റവും പുതിയ ബിഗ് ബജറ്റ് സ്പോർട്സ് ആക്ഷൻ ഡ്രാമ ചിത്രം ‘പെദ്ധി’യിലെ മൂന്നാമത്തെ ഗാനമായ ‘മസാ മസാ’യുടെ ലിറിക്കൽ വീഡിയോ പുറത്തിറങ്ങി. ഓസ്കാർ ജേതാവ് എ.ആർ. റഹ്മാൻ ഈണം നൽകിയ ഈ മനോഹര ഗാനത്തിന്റെ മലയാളം പതിപ്പിന് വരികൾ എഴുതിയിരിക്കുന്നത് സിജു തുറവൂരാണ്. ഭരത് കെ. രാജേഷാണ് ഗാനം ആലപിച്ചിരിക്കുന്നത്.
ചിത്രത്തിലെ ടൈറ്റിൽ കഥാപാത്രമായ ‘പെദ്ധി’ എന്ന റൂറൽ അത്ലറ്റാകാൻ രാംചരൺ നടത്തിയ വമ്പൻ ശാരീരിക പരിവർത്തനത്തിന്റെ മേക്കിങ് ദൃശ്യങ്ങളും മാസ് ഗുസ്തി രംഗങ്ങളും കോർത്തിണക്കിയാണ് ലിറിക്കൽ വീഡിയോ ഒരുക്കിയിരിക്കുന്നത്. ചിത്രത്തിൽ ക്രിക്കറ്റ്, ഗുസ്തി, ഓട്ടം എന്നീ കായിക ഇനങ്ങൾ കഥാഗതിയിൽ നിർണ്ണായക പങ്കുവഹിക്കുന്നുണ്ട്. ദേശീയ അവാർഡ് ജേതാവായ ബുചി ബാബു സന സംവിധാനം ചെയ്യുന്ന ഈ ചിത്രം ജൂൺ നാലിന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും.
വൃദ്ധി സിനിമാസിന്റെ ബാനറിൽ വെങ്കട സതീഷ് കിലാരു നിർമ്മിക്കുന്ന ഈ ചിത്രം മൈത്രി മൂവി മേക്കേഴ്സ്, സുകുമാർ റൈറ്റിങ്സ് എന്നിവർ ചേർന്നാണ് അവതരിപ്പിക്കുന്നത്. കേരളത്തിലും തമിഴ്നാട്ടിലും ചിത്രം തിയേറ്ററുകളിൽ എത്തിക്കുന്നത് തിങ്ക് സ്റ്റുഡിയോസ് ആണ്. ബോളിവുഡ് താരം ജാൻവി കപൂർ നായികയാകുന്ന ചിത്രത്തിൽ കന്നഡ സൂപ്പർതാരം ശിവരാജ് കുമാറും ഒരു പ്രധാന വേഷത്തിൽ എത്തുന്നുണ്ട്. രാംചരണും ശിവരാജ് കുമാറും ആദ്യമായി ഒന്നിക്കുന്ന ചിത്രം കൂടിയാണിത്. ഇവരെ കൂടാതെ ദിവ്യേന്ദു ശർമ, ജഗപതി ബാബു, ബോമൻ ഇറാനി തുടങ്ങിയ വൻ താരനിരയും ചിത്രത്തിലുണ്ട്. തെലുങ്ക്, തമിഴ്, കന്നഡ, മലയാളം, ഹിന്ദി എന്നീ 5 ഭാഷകളിലാണ് ചിത്രം റിലീസ് ചെയ്യുന്നത്.
