വിജയ് ദേവരകൊണ്ടയുടെ ജന്മദിനത്തോടനുബന്ധിച്ച് ആരാധകർക്കായി പുതിയ ചിത്രം ‘റൗഡി ജനാർദ്ദന’യുടെ ആവേശകരമായ പോസ്റ്റർ പുറത്തുവിട്ടു. മഴയത്ത് നനഞ്ഞൊട്ടി, കയ്യിൽ പിസ്റ്റളുമായി നിൽക്കുന്ന താരത്തിന്റെ മാസ് ലുക്കാണ് പോസ്റ്ററിലെ പ്രധാന ആകർഷണം. പാൻ ഇന്ത്യൻ തലത്തിൽ ഒരുങ്ങുന്ന ഒരു ഗ്രാമീണ ആക്ഷൻ ഡ്രാമയാണിതെന്ന് അണിയറപ്രവർത്തകർ സൂചിപ്പിക്കുന്നു. ആക്ഷനും പ്രണയവും വൈകാരിക നിമിഷങ്ങളും കോർത്തിണക്കിയാണ് രവി കിരൺ കോല ഈ ചിത്രം സംവിധാനം ചെയ്യുന്നത്. ദിൽ രാജുവും ശിരീഷും ചേർന്നാണ് ശ്രീ വെങ്കടേശ്വര ക്രിയേഷൻസിന്റെ ബാനറിൽ ചിത്രം നിർമ്മിക്കുന്നത്.
ഗ്രാമീണ പശ്ചാത്തലത്തിലുള്ള സംഘർഷങ്ങളുടെ കഥ പറയുന്ന സിനിമയിൽ ഏറെ വ്യത്യസ്തമായൊരു വേഷത്തിലാണ് വിജയ് എത്തുന്നത്. ക്രിസ്റ്റോ സേവ്യർ സംഗീതവും ആനന്ദ് സി. ചന്ദ്രൻ ഛായാഗ്രഹണവും നിർവഹിക്കുന്ന ചിത്രം ഈ വർഷം ഡിസംബറിൽ തിയേറ്ററുകളിലെത്തും. പോസ്റ്റർ റിലീസിന് പിന്നാലെ സോഷ്യൽ മീഡിയയിൽ വലിയ ചർച്ചകൾക്കാണ് ചിത്രം തുടക്കമിട്ടിരിക്കുന്നത്. പ്രൊഡക്ഷൻ ഡിസൈനർ ഡിനോ ശങ്കറും പിആർഒ പ്രതീഷ് ശേഖറുമാണ് ചിത്രത്തിന്റെ മറ്റു സാങ്കേതിക വിഭാഗങ്ങൾ കൈകാര്യം ചെയ്യുന്നത്.
