മുകുന്ദനുണ്ണി അസോസിയേറ്റ്സ് എന്ന ഒറ്റ ചിത്രത്തിലൂടെ മലയാളികളെ ഞെട്ടിച്ച സംവിധായകൻ ആണ് അഭിനവ് സുന്ദർ നായക്. മികച്ച പ്രതികരണം നേടിയ സിനിമ ബോക്സ് ഓഫീസിലും ഹിറ്റായിരുന്നു. ജൂൺ അഞ്ചിന് തന്റെ അടുത്ത സിനിമയായ മോളിവുഡ് ടൈംസുമായി എത്തുകയാണ് അഭിനവ്. സിനിമയുടെ ട്രെയ്ലറിനായി കാത്തിരിക്കുകയാണ് സിനിമാ പ്രേമികൾ. എന്നാൽ ഇവരെ നിരാശപ്പെടുത്തുന്ന വാർത്തയാണ് ഇപ്പോൾ എത്തുന്നത്. പ്രീ റിലീസിന് മുൻപ് സിനിമയ്ക്ക് ട്രെയ്ലർ ഇല്ലെന്ന് പറയുകയാണ് സംവിധായകൻ അഭിനവ്.
‘മോളിവുഡ് ടൈംസിന് പ്രീ-റിലീസ് ട്രെയ്ലർ ഇല്ല. കഥയെക്കുറിച്ച് കൂടുതൽ ഒന്നും അറിയാതെ സിനിമ കാണുക. സാധിക്കുമെങ്കിൽ ടീസർ പോലും കാണരുത്,’ എന്നാണ് അഭിനവ് സോഷ്യൽ മീഡിയയിൽ കുറിച്ചു. റിലീസ് തീയതി അടുത്തതോടെ ചിത്രത്തിന്റെ ട്രെയ്ലറിനായി കാത്തിരുന്ന ഒരു പ്രേക്ഷകന്റെ ചോദ്യത്തിന് മറുപടിയായാണ്, ഇത് താൻ മനപ്പൂർവം എടുത്ത തീരുമാനമാണെന്ന് സംവിധായകൻ വെളിപ്പെടുത്തിയത്. നേരത്തെ മെയ് 14 നായിരുന്നു സിനിമ തിയേറ്ററിൽ എത്താൻ ഇരുന്നത്. എന്നാൽ സിനിമയുടെ റിലീസ് മാറ്റിവെക്കുകയായിരുന്നു. നീത് മാധവൻ എന്നാണ് നസ്ലെൻ അവതരിപ്പിക്കുന്ന കഥാപാത്രത്തിന്റെ പേര്. സംഗീത് പ്രതാപ്, ഷറഫുദ്ദീന് എന്നിവരെ കേന്ദ്ര കഥാപാത്രങ്ങളാക്കി അഭിനവ് സുന്ദര് നായക് സംവിധാനം ചെയ്യുന്ന മോളിവുഡ് ടൈംസ് ആഷിഖ് ഉസ്മാന് പ്രൊഡക്ഷന്സിന്റെ ബാനറില് ആഷിഖ് ഉസ്മാന് നിര്മിക്കുന്ന ചിത്രമാണ്.
രാമു സുനില് രചന നിര്വഹിക്കുന്ന ചിത്രത്തിനായി സംഗീതം ഒരുക്കുന്നത് ജേക്ക്സ് ബിജോയ് ആണ്. അഭിനവ് സുന്ദര് നായക്കും അരോള് നിതിനും ചേര്ന്നാണ് എഡിറ്റിംഗ് നിര്വഹിക്കുന്നത്. സിനിമയിലെ ആദ്യ ഗാനം നേരത്തെ പുറത്തുവന്നിരുന്നു. വിശ്വജിത്താണ് ക്യാമറ. 2026ല് നസ്ലെന്റേതായി ആദ്യം പുറത്തിറങ്ങുന്ന ചിത്രമാകും മോളിവുഡ് ടൈംസ്. നിരവധി താരങ്ങൾ കാമിയോ റോളുകളിൽ പ്രത്യക്ഷപ്പെടുന്ന ചിത്രം ഒരുപാട് പ്രതീക്ഷകൾ നൽകുന്ന ഒരു സിനിമയാണ്. അതേസമയം, ആസിഫ് അലി നായകനാകുന്ന ടിക്കി ടാക്കയാണ് നസ്ലെന് ഭാഗമാകുന്ന മറ്റൊരു പ്രോജക്ട്. മമ്മൂട്ടിയെ നായകനാക്കി ഖാലിദ് റഹ്മാന് സംവിധാനം ചെയ്യുന്ന ചിത്രത്തിലും നസ്ലെന് പ്രധാന വേഷത്തിലുണ്ട്.
