നീരജ് മാധവും അൽത്താഫ് സലീമും പ്രധാന വേഷങ്ങളിലെത്തുന്ന മലയാളത്തിലെ ആദ്യകാല സയൻസ് ഫിക്ഷൻ ഏലിയൻ കോമഡി ചിത്രം ‘പ്ലൂട്ടോ’യുടെ ടീസർ പുറത്തിറങ്ങി. മനുഷ്യലോകത്തേക്ക് അപ്രതീക്ഷിതമായി എത്തുന്ന ഒരു ഏലിയനും തുടർന്നുണ്ടാകുന്ന രസകരമായ സംഭവവികാസങ്ങളുമാണ് ചിത്രത്തിന്റെ പ്രമേയമെന്ന സൂചനയാണ് ടീസർ നൽകുന്നത്. ആദിത്യൻ ചന്ദ്രശേഖർ സംവിധാനം ചെയ്യുന്ന ഈ ചിത്രം ഒരു കംപ്ലീറ്റ് ഫൺ എന്റർടൈനറായിട്ടാണ് ഒരുങ്ങുന്നത്. വിക്രമാദിത്യനും വേതാളവും എന്ന ഐതിഹ്യത്തെ അനുസ്മരിപ്പിക്കും വിധം നീരജ് മാധവിന്റെ തോളിലിരിക്കുന്ന അൽത്താഫ് സലീമിന്റെ പോസ്റ്ററുകൾ നേരത്തെ തന്നെ സോഷ്യൽ മീഡിയയിൽ ഏറെ ശ്രദ്ധിക്കപ്പെട്ടിരുന്നു.
അൽത്താഫ് സലീമാണ് ചിത്രത്തിൽ വേറിട്ട ലുക്കിലുള്ള ഏലിയൻ കഥാപാത്രത്തെ അവതരിപ്പിക്കുന്നത്. ‘എങ്കിലും ചന്ദ്രികേ’ എന്ന സിനിമയ്ക്ക് ശേഷം ആദിത്യൻ ചന്ദ്രശേഖർ സംവിധാനം ചെയ്യുന്ന രണ്ടാമത്തെ ചിത്രമാണിത്. മലയാളത്തിൽ അധികം പരീക്ഷിക്കപ്പെടാത്ത ‘ഏലിയൻ കോമഡി’ എന്ന വിഭാഗത്തിൽ എത്തുന്ന ‘പ്ലൂട്ടോ’, പുതുമയുള്ള ഒരു ചലച്ചിത്രാനുഭവമായിരിക്കും പ്രേക്ഷകർക്ക് നൽകുകയെന്നാണ് അണിയറപ്രവർത്തകരുടെ പ്രതീക്ഷ. ഏലിയനും മനുഷ്യനും തമ്മിലുള്ള ആത്മബന്ധവും അതിനിടയിൽ സംഭവിക്കുന്ന അബദ്ധങ്ങളും തമാശകളുമാണ് സിനിമയുടെ മുഖ്യ ആകർഷണം.
അർഷ ബൈജു, അജു വർഗീസ്, ദിനേശ് പ്രഭാകർ, വിനീത് തട്ടിൽ തുടങ്ങി വലിയൊരു താരനിര തന്നെ ചിത്രത്തിൽ അണിനിരക്കുന്നുണ്ട്. ഓർക്കിഡ് ഫിലിംസ് ഇന്റർനാഷണലിന്റെ ബാനറിൽ രെജു കുമാർ, രശ്മി രെജു എന്നിവർ ചേർന്നാണ് പ്ലൂട്ടോ നിർമ്മിക്കുന്നത്. സയൻസ് ഫിക്ഷൻ എലമെന്റുകൾക്കൊപ്പം മലയാളിക്ക് പ്രിയപ്പെട്ട ഹാസ്യവും കൂടി ചേരുന്നതോടെ ഈ വർഷത്തെ ഏറ്റവും വലിയ വിനോദചിത്രങ്ങളിൽ ഒന്നായി പ്ലൂട്ടോ മാറുമെന്നാണ് വിലയിരുത്തപ്പെടുന്നത്.
