നടൻ ആമിർ ഖാൻ മൂന്നാം വിവാഹത്തിനൊരുങ്ങുന്നതായി റിപ്പോർട്ടുകൾ. ജൂലൈ അഞ്ചിന് ആമിറിന്റെ വസതിയില് വച്ചാകും വിവാഹം റജിസ്റ്റര് ചെയ്യുക. ഇരുവരുടെയും കുടുംബാംഗങ്ങളും അടുത്ത സുഹൃത്തുക്കളും മാത്രമാകും പങ്കെടുക്കുക. സല്മാന്ഖാനും ഷാറൂഖ് ഖാനും ചടങ്ങില് പങ്കെടുക്കാനെത്തുമെന്നാണ് റിപ്പോര്ട്ട്. ഗൗരിയും ആമിർ ഖാനും ഒരു വർഷത്തിലേറെയായി ഒരുമിച്ചാണ് താമസിക്കുന്നത്. ഇത് നടന്റെ മൂന്നാം വിവാഹമാണ്.
61 വയസാണ് ആമിര്ഖാനുള്ളത്. ഗൗരിക്ക് 47 ഉം. ഒന്നിച്ച് കഴിഞ്ഞിരുന്ന ഇരുവരും അടുത്തയിടെയാണ് വിവാഹം ഔദ്യോഗികമായി റജിസ്റ്റര് ചെയ്യാമെന്ന തീരുമാനത്തിലെത്തിയത്. തന്റെ അറുപതാം ജന്മദിനത്തിലായിരുന്നു ആമിർ ഖാൻ പുതിയ പ്രണയം വെളിപ്പെടുത്തിയത്. ഗൗരിയെ കഴിഞ്ഞ 25 വർഷമായി പരിചയമുണ്ടെന്നും ഇപ്പോൾ ഒന്നര വർഷമായി പ്രണയത്തിലാണെന്നും ആമിർ പറഞ്ഞു. ഗൗരിയും ആമിർ ഖാനും പൊതുവിടങ്ങളിൽ ഒരുമിച്ച് പ്രത്യക്ഷപ്പെടാൻ തുടങ്ങിയതോടെയാണ് ഇരുവരും തമ്മിൽ പ്രണയത്തിലാണെന്ന ഗോസിപ്പുകള് വന്നത്. ഇതോടെ തന്റെ അറുപതാം ജന്മദിനത്തിൽ ഗൗരിയുമായി പ്രണയത്തിലാണെന്ന് ആമിര് പറയുകയായിരുന്നു.
ബെംഗളൂരു സ്വദേശിയായ ഗൗരി നിലവില് ആമിര് ഖാന്റെ പ്രൊഡക്ഷന് കമ്പനിയിലാണ് ജോലി ചെയ്യുന്നത്. ആറ് വയസ്സുള്ള ഒരു മകന്റെ അമ്മയായ ഗൗരിക്കൊപ്പം താന് ലിവിങ് ടുഗതറിലാണെന്ന് താരം നേരത്തെ വേ;ളിപ്പെടുത്തിയിരുന്നു. ഗൗരി തന്റെ കുടുംബാംഗങ്ങളുമായി കൂടിക്കാഴ്ച നടത്തിയതായും അവര് തങ്ങളുടെ ബന്ധത്തില് സന്തുഷ്ടരാണെന്നും ആമിര് ഖാന് പറഞ്ഞു. റീന ദത്തയായിരുന്നു ആമിറിന്റെ ആദ്യഭാര്യ. 1986-ല് വിവാഹിതരായ ഇവര് 2002-ല് വേര്പിരിഞ്ഞു. ഇവര്ക്ക് ജുനൈദ്, ഇറ എന്നിങ്ങനെ രണ്ടുമക്കളുണ്ട്. 2001-ല് ലഗാന്റെ സെറ്റില് വച്ചാണ് സംവിധാന സഹായിയായി പ്രവര്ത്തിച്ചിരുന്ന കിരണ് റാവുവിനെ ആമിര് പരിചയപ്പെടുന്നത്. 2005-ല് ഇവര് വിവാഹിതരായി. ഇരുവര്ക്കും ആസാദ് എന്നൊരു മകനുണ്ട്. 2021-ല് ആമിറും കിരണും വേര്പിരിഞ്ഞു.
