മ്യൂസിക്കൽ ഹൊറർ കോമഡി എന്ന വേറിട്ട വിഭാഗവുമായി ശ്രീനാഥ് ഭാസി ചിത്രം ‘കറക്കം’ എത്തുന്നു. ചിത്രത്തിന്റെ ആകാംക്ഷ ഉണർത്തുന്ന ടീസർ അണിയറപ്രവർത്തകർ പുറത്തുവിട്ടു. മിന്നൽ മുരളി ഫെയിം ഫെമിന ജോർജ് നായികയായി എത്തുന്ന ഈ ചിത്രം സുഭാഷ് ലളിത സുബ്രഹ്മണ്യനാണ് സംവിധാനം ചെയ്യുന്നത്. സംഗീതത്തിനും ഹാസ്യത്തിനും ഭയത്തിനും ഒരുപോലെ പ്രാധാന്യം നൽകുന്ന ഈ സിനിമ മലയാള പ്രേക്ഷകർക്ക് പുത്തൻ അനുഭവമായിരിക്കുമെന്നാണ് ടീസർ നൽകുന്ന സൂചന.
ക്രൗൺ സ്റ്റാർസ് എന്റർടൈൻമെന്റിന്റെയും ബ്ലാക്ക് ടർട്ടിൽ പ്രൊഡക്ഷൻസിൻ്റെയും ബാനറിൽ കിംബർലി ട്രിനിഡാഡ്, അങ്കുഷ് സിംഗ് എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. പ്രമുഖ സംഗീത ലേബലായ ടി-സീരീസിലൂടെയാണ് ചിത്രത്തിലെ ഗാനങ്ങൾ പുറത്തിറങ്ങുന്നത്. സിനിമയുടെ ഹൊറർ മൂഡിനോട് ചേർന്നുനിൽക്കുന്ന ഗാനങ്ങൾ ഇതിനോടകം തന്നെ സംഗീത പ്രേമികൾക്കിടയിൽ ശ്രദ്ധിക്കപ്പെട്ടു കഴിഞ്ഞു.
ശ്രീനാഥ് ഭാസിക്കും ഫെമിനയ്ക്കും പുറമെ ഷൗൺ റോമി, സിദ്ധാർത്ഥ് ഭരതൻ, അഭിരാം രാധാകൃഷ്ണൻ, പ്രവീൺ ടി.ജെ. തുടങ്ങിയ മികച്ച താരനിരയും ചിത്രത്തിലുണ്ട്. മിസ്റ്ററിയും സംഗീതവും കോർത്തിണക്കിയുള്ള ഈ ഹൊറർ ചിത്രം ഉടൻ തന്നെ തീയേറ്ററുകളിലെത്തും. കരുത്തുറ്റ സാങ്കേതിക പ്രവർത്തകരുടെ പിൻബലത്തിൽ ഒരുങ്ങുന്ന ‘കറക്കം’ മലയാളത്തിലെ ഒരു ട്രെൻഡ് സെറ്റർ ചിത്രമാകുമെന്ന പ്രതീക്ഷയിലാണ് അണിയറപ്രവർത്തകർ.
