കയാൽ ചന്ദ്രനെ നായകനാക്കി രാജ ദുരൈ സിംഗം സംവിധാനം ചെയ്യുന്ന ‘സിൻഗ’ എന്ന തമിഴ് ചിത്രത്തിന്റെ ടീസർ പുറത്തിറങ്ങി. ഒരു നായ്ക്കുട്ടിയാണ് ഈ സിനിമയിലെ ടൈറ്റിൽ കഥാപാത്രമായി എത്തുന്നത് എന്നത് ചിത്രത്തിന്റെ വലിയ പ്രത്യേകതയാണ്. മലയാളികൾക്ക് ഏറെ പ്രിയപ്പെട്ട താരങ്ങളായ സിജ റോസ്, മീനാക്ഷി രവീന്ദ്രൻ എന്നിവരാണ് ഈ ചിത്രത്തിൽ നായികമാരായി എത്തുന്നത്. ആദിത്യ കതിർ, അരിസ്റ്റോ സുരേഷ് എന്നിവർക്കൊപ്പം ഒരു കൂട്ടം പുതുമുഖങ്ങളും പ്രധാന വേഷങ്ങളിൽ അണിനിരക്കുന്ന ടീസർ, പ്രണയത്തിന്റെയും സൗഹൃദത്തിന്റെയും വൈകാരികമായ നിമിഷങ്ങൾ കോർത്തിണക്കിയാണ് ഒരുക്കിയിരിക്കുന്നത്.
മനുഷ്യരും നായ്ക്കളും തമ്മിലുള്ള അഭേദ്യമായ ബന്ധത്തിന്റെ കഥ പറയുന്ന ഈ ചിത്രം എല്ലാ പ്രായത്തിലുള്ള പ്രേക്ഷകർക്കും ആസ്വദിക്കാൻ കഴിയുന്ന ഒരു ഹൃദയസ്പർശിയായ ആഖ്യാനമാണ് വാഗ്ദാനം ചെയ്യുന്നത്. രുദ്രം സിനിമാസ്, എസ് ആർ ഫിലിംസ് എന്നിവയുടെ ബാനറിൽ വേലായുധം രാജേന്ദ്രൻ നിർമ്മിക്കുന്ന ഈ ചിത്രത്തിന്റെ ഛായാഗ്രഹണം അശോക് കുമാർ രാജാണ് നിർവ്വഹിച്ചിരിക്കുന്നത്. പ്രശസ്ത സംവിധായകരായ വസന്ത്, സർക്കുണം എന്നിവരുടെ കീഴിൽ പ്രവർത്തിച്ച് പരിചയമുള്ള രാജ ദുരൈ സിംഗം ഒരുക്കുന്ന ഈ ചിത്രം തികച്ചും മനോഹരമായ ഒരു കുടുംബചിത്രമായിരിക്കുമെന്ന് അണിയറപ്രവർത്തകർ അവകാശപ്പെടുന്നു.
ചിത്രത്തിലെ ഗാനങ്ങൾക്കും വലിയ പ്രാധാന്യമാണ് നൽകിയിരിക്കുന്നത്. ഇതിനോടകം ശ്രദ്ധേയമായ കാതുകുള്ളക്കുരുവി എന്ന ഗാനം സിനിമ പ്രേമികൾ ഏറ്റെടുത്തു കഴിഞ്ഞു. മനോജ് ചിന്നസ്വാമി സംഗീതവും മണി അമുതവൻ വരികളും ഒരുക്കിയിരിക്കുന്ന ചിത്രത്തിന്റെ എഡിറ്റിംഗ് എ.ആർ ശിവരാജ് രാജാമണിയാണ്. എക്സിക്യൂട്ടീവ് പ്രൊഡ്യൂസർ രാജ്കുമാറും ക്രിയേറ്റീവ് പ്രൊഡ്യൂസർ ആർ. ശരവണനുമാണ്. പി.ആർ.ഒ പ്രവർത്തനങ്ങൾ എ.എസ് ദിനേശും മനു ശിവനും ചേർന്ന് നിർവ്വഹിക്കുന്നു. വിഷ്വൽ എഫക്ട്സിനും സൗണ്ട് ഡിസൈനിനും വലിയ പ്രാധാന്യമുള്ള ഈ ചിത്രം ഉടൻ തന്നെ തിയേറ്ററുകളിൽ എത്തുമെന്നാണ് പ്രതീക്ഷിക്കുന്നത്.
