സുന്ദീപ് കിഷനും ഫരിയ അബ്ദുള്ളയും കേന്ദ്ര കഥാപാത്രങ്ങളായി എത്തിയ ‘സിഗ്മ’ എന്ന ചിത്രത്തിന്റെ ഒടിടി റിലീസ് വിവരങ്ങൾ പുറത്തുവന്നു. ഒക്ടോബർ 2ന് തിയറ്ററുകളിൽ റീലീസ് ചെയ്ത ചിത്രം, ഒക്ടോബർ 30 മുതൽ നെറ്റ്ഫ്ലിക്സിലൂടെ സ്ട്രീമിംഗ് ആരംഭിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. വിജയ്‌യുടെ മകൻ ജേസൺ സഞ്ജയ് സംവിധാനം ചെയ്യുന്നു എന്ന നിലയിൽ ഏറെ ശ്രദ്ധിക്കപ്പെട്ട സിനിമയാണിത്. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനാണ് ചിത്രം കേരളത്തിൽ വിതരണം ചെയ്തത്. ആഗോളതലത്തിൽ ഇതുവരെ 10 കോടി രൂപയാണ് ചിത്രം നേടിയിരിക്കുന്നത്.
തമൻ എസ് സംഗീതം നൽകിയ ചിത്രത്തിന്റെ നിർമ്മാതാവ് ജി.കെ.എം. തമിഴ് കുമരനാണ്. തമിഴ്നാട്ടിലും തായ്‌ലൻഡിലുമായാണ് ചിത്രീകരണം പൂർത്തിയാക്കിയത്. രാജു സുന്ദരം, സമ്പത്ത് രാജ്, ശിവ് പണ്ഡിറ്റ്, അൻപു ദാസൻ, യോഗ് ജാപി, മഹാലക്ഷ്മി, ഷീല രാജ്കുമാർ, കമലേഷ്, കിരൺ കൊണ്ഡ തുടങ്ങിയവരാണ് ചിത്രത്തിലെ മറ്റ് പ്രധാന അഭിനേതാക്കൾ.
പ്രവീൺ കെ.എൽ എഡിറ്റിങ്ങും കൃഷ്ണൻ വസന്ത് ഛായാഗ്രഹണവും നിർവഹിച്ചിരിക്കുന്നു. വിവേക്, സൂപ്പർ സുബ്ബു എന്നിവരുടേതാണ് വരികൾ. സഞ്ജീവ് ക്രിയേറ്റീവ് പ്രൊഡ്യൂസറും, സ്റ്റണ്ട് വെങ്കട്, സില്‍വ എന്നിവർ ആക്ഷൻ കോറിയോഗ്രാഫിയും നിർവഹിച്ചിരിക്കുന്നു. സുരേഷ് ചന്ദ്ര, വംശി ശേഖർ എന്നിവരാണ് പി.ആർ.ഒമാർ. സുബാസ്കരൻ നിർമ്മിച്ചിരിക്കുന്ന ചിത്രത്തിന്റെ എക്സിക്യൂട്ടീവ് പ്രൊഡ്യൂസർ സുബ്രഹ്മണ്യൻ നാരായണനാണ്. വിവിധ മേഖലകളിൽ നിന്നുള്ള പ്രമുഖരാണ് ചിത്രത്തിന്റെ മറ്റ് അണിയറയിലും പ്രവർത്തിച്ചിരിക്കുന്നത്.
