കന്നഡ താരം യഷിന്റെ കരിയറിലെ ഏറ്റവും പ്രതീക്ഷയോടെ കാത്തിരിക്കുന്ന ചിത്രമാണ് ഗീതു മോഹൻദാസ് സംവിധാനം ചെയ്യുന്ന ‘ടോക്സിക്’. കെജിഎഫ് 2 ന് ശേഷം യഷ് നായകനാകുന്ന ചിത്രം തിരുവോണ ദിനത്തിൽ തിയറ്ററുകളിൽ എത്താൻ ഒരുങ്ങുകയാണ്. കന്നഡയിലും ഇംഗ്ലീഷിലും ഒരേസമയം ചിത്രീകരിച്ചിരിക്കുന്ന ഈ പാൻ ഇന്ത്യൻ ചിത്രം, ഹിന്ദി, തെലുങ്ക്, തമിഴ്, മലയാളം ഉൾപ്പെടെയുള്ള വിവിധ ഭാഷകളിൽ ഗ്ലോബൽ റിലീസിനൊരുങ്ങുകയാണ്. റിലീസിന് ദിവസങ്ങൾ മാത്രം ശേഷിക്കെ ചിത്രത്തിന് മികച്ച പ്രീ-റിലീസ് ബുക്കിംഗാണ് കർണാടകയിൽ നിന്ന് ലഭിക്കുന്നത്.
ട്രാക്കർമാരായ കർണാടക ടാക്കീസിന്റെ കണക്കുപ്രകാരം, അഡ്വാൻസ് ബുക്കിംഗിലൂടെ മാത്രം ചിത്രം ഇതിനകം 17 കോടി രൂപ നേടിക്കഴിഞ്ഞു. കന്നഡ സിനിമയുടെ ചരിത്രത്തിലെ എക്കാലത്തെയും മികച്ച ഓപ്പണിങ് ലിസ്റ്റിൽ ഇടംനേടിക്കഴിഞ്ഞ ഈ കണക്കുകൾ, റിലീസ് ദിവസമാകുമ്പോഴേക്കും ഇനിയും ഉയരാനാണ് സാധ്യത. യഷും ഗീതു മോഹൻദാസും ചേർന്ന് തിരക്കഥയൊരുക്കിയ ചിത്രത്തിന്റെ സാങ്കേതിക വിഭാഗവും ഏറെ ശ്രദ്ധേയമാണ്. ദേശീയ അവാർഡ് ജേതാവ് രാജീവ് രവി ക്യാമറയും, രവി ബസ്രൂർ സംഗീതവും, ഉജ്വൽ കുൽക്കർണി എഡിറ്റിങ്ങും നിർവഹിക്കുന്നു. കെജിഎഫ് തരംഗത്തിന് ശേഷം യഷ് തിയറ്ററുകളിലേക്ക് തിരിച്ചെത്തുമ്പോൾ വൻ ബോക്സ് ഓഫീസ് വിജയമാണ് സിനിമ പ്രതീക്ഷിക്കുന്നത്.
