‘ഗജിനി’ എന്ന ചിത്രത്തിലെ വില്ലൻ വേഷത്തിലൂടെ ശ്രദ്ധേയനായ നടൻ പ്രദീപ് റാവത്ത് (74) അന്തരിച്ചു. കാന്സർ ബാധിതനായി ചികിത്സയിലായിരുന്നു. മൂന്ന് പതിറ്റാണ്ടിലേറെ നീണ്ട അഭിനയ ജീവിതത്തിൽ ഹിന്ദി, തെലുങ്ക്, തമിഴ്, കന്നഡ, മലയാളം സിനിമകളിൽ സജീവ സാന്നിധ്യമായിരുന്നു. 2005ൽ പുറത്തിറങ്ങിയ ‘ഗജിനി’ എന്ന തമിഴ് ചിത്രത്തിലെ വില്ലൻ കഥാപാത്രത്തിലൂടെയാണ് അദ്ദേഹം ഏറെ ശ്രദ്ധിക്കപ്പെട്ടത്. 2008ൽ ആമിർ ഖാൻ നായകനായ ഹിന്ദി റീമേക്കിലും ഇതേ കഥാപാത്രത്തെ അവതരിപ്പിക്കാൻ അദ്ദേഹത്തെ ക്ഷണിക്കുകയായിരുന്നു.
2001ൽ പുറത്തിറങ്ങിയ ‘ലഗാൻ’ എന്ന ചിത്രത്തിലും അദ്ദേഹം ആമിർ ഖാനോടൊപ്പം പ്രവർത്തിച്ചിട്ടുണ്ട്. മഹാഭാരതം ടെലിവിഷൻ പരമ്പരയിലും പ്രദീപ് റാവത്ത് അഭിനയിച്ചിട്ടുണ്ട്. ദ്രോണാചാര്യരുടെ മകനായ അശ്വത്ഥാമാവിന്റെ വേഷമാണ് അദ്ദേഹം ചെയ്തത്. 1985ൽ ‘മേരി ജംഗ്’ എന്ന ചിത്രത്തിലൂടെയാണ് സിനിമാരംഗത്ത് അരങ്ങേറ്റം കുറിച്ചതെങ്കിലും, മഹാഭാരതത്തിലെ വേഷമാണ് അദ്ദേഹത്തിന് വ്യാപകമായ ജനപ്രീതി നേടിക്കൊടുത്തത്.
