തെന്നിന്ത്യൻ സിനിമാപ്രേമികൾ ഒന്നടങ്കം കാത്തിരിക്കുകയാണ് സൂര്യ-ലോകേഷ് കനകരാജ് ടീമിന്റെ റോളക്സ് സ്റ്റാൻഡ് എലോൺ ചിത്രത്തിനായി. വിക്രം എന്ന സിനിമയിലെ ഏതാനും നിമിഷങ്ങൾ മാത്രം നീണ്ട് നിൽക്കുന്ന കാമിയോ വേഷം അത്രത്തോളം ഹൈപ്പാണ് പ്രേക്ഷകരിൽ ഉണ്ടാക്കിയത്. എന്നാൽ വർഷം ഇത്രയുമായിട്ടും സിനിമയെക്കുറിച്ചുള്ള അപ്ഡേറ്റുകൾ ഒന്നും പുറത്തുവന്നിട്ടില്ല. ഇപ്പോഴിതാ റോളക്സ് സിനിമയെക്കുറിച്ച് മനസുതുറക്കുകയാണ് സൂര്യ. ‘ലോകേഷ് നിലവിൽ എന്താണ് ചെയ്യുന്നതെന്ന് എനിക്കറിയില്ല.
അല്ലു അർജുൻ സിനിമയും, വിക്രം 2 ഒക്കെയാണ് ലോകേഷ് തിരക്കിലാണ്. എന്നാൽ റോളക്സ് സംഭവിക്കും, ഞാൻ എഴുതുന്നുണ്ട് എന്ന് ലോകേഷ് അഭിമുഖങ്ങളിൽ പറയുന്നത് കണ്ടിട്ടുണ്ട്. അത് സംഭവിക്കുമ്പോൾ സംഭവിക്കും, കാലം മറുപടി നൽകും’, സൂര്യയുടെ വാക്കുകൾ.ലോകേഷ് കനകരാജിന്റെ എൽസിയുവിലെ (ലോകേഷ് സിനിമാറ്റിക് യൂണിവേഴ്സ്) പ്രധാന വില്ലൻ കഥാപാത്രമാണ് റോളക്സ്. 2022 ൽ പുറത്തിറങ്ങിയ കമൽഹാസൻ ചിത്രം വിക്രമിലായിരുന്നു ഈ കഥാപാത്രത്തെ ആദ്യം അവതരിപ്പിച്ചത്. പിന്നീട് 2023 ൽ പുറത്തിറങ്ങിയ ലിയോ എന്ന ചിത്രത്തിലും ഈ കഥാപാത്രത്തിന്റെ റഫറൻസ് ഉണ്ടായിരുന്നു. കാർത്തിയെ നായകനാക്കി ഒരുങ്ങുന്ന കൈതിയുടെ രണ്ടാം ഭാഗത്തിൽ റോളക്സ് എത്തുമെന്നും സൂചനകളുണ്ട്.
