Celebrity

‘വിവാഹമോചനത്തിനു കാരണം ഐശ്വര്യയുടെ മദ്യപാനം’, മകൾക്കെതിരായ പ്രചാരണങ്ങളിൽ രൂക്ഷ പ്രതികരണവുമായി അർജുൻ സർജ

മൂത്ത മകൾ ഐശ്വര്യ അർജുനെതിരെ സമൂഹ മാധ്യമങ്ങളിലൂടെ നടക്കുന്ന വ്യക്തിഹത്യയ്ക്കും അപകീർത്തികരമായ പ്രചാരണങ്ങൾക്കുമെതിരെ രൂക്ഷ പ്രതികരണവുമായി നടൻ അർജുൻ സർജ രംഗത്ത്. ഇളയ മകൾ അഞ്ജനയുടെ വിവാഹചിത്രങ്ങൾ പുറത്തുവന്നതിന് പിന്നാലെ ഐശ്വര്യയുടെ ഭർത്താവ് ഉമാപതി ചടങ്ങുകളിൽ പങ്കെടുത്തില്ലെന്ന ചർച്ചകൾക്കിടെയാണ് അടിസ്ഥാനരഹിതമായ ആരോപണങ്ങൾ ഉയർന്നത്. അഞ്ജനയുടെ വിവാഹത്തിന് ആശംസകളറിയിച്ച എല്ലാവർക്കും നന്ദി പറഞ്ഞുകൊണ്ടാണ് അർജുൻ പ്രസ്താവന ആരംഭിച്ചത്.ബോളിവുഡ് സിനിമ കാണൂ

മകളുടെ സ്വകാര്യതയെ പൂർണമായും മാനിച്ചാണ് ഇതുവരെ നിശ്ശബ്ദത പാലിച്ചതെന്ന് അർജുൻ വ്യക്തമാക്കി. സ്വന്തം ഇഷ്ടാനുസരണം ജീവിക്കാനും സ്വതന്ത്ര തീരുമാനങ്ങളെടുക്കാനും ഏതൊരു സ്ത്രീക്കും അവകാശമുണ്ടെന്നും താൽപര്യമുണ്ടെങ്കിൽ ഉചിതമായ സമയത്ത് ഐശ്വര്യ തന്നെ അവളുടെ വ്യക്തിജീവിതത്തെക്കുറിച്ച് സംസാരിക്കുമെന്നും അദ്ദേഹം പറഞ്ഞു. എന്നാൽ മകളുടെ സ്വഭാവത്തെയും വ്യക്തിജീവിതത്തെയും കുറിച്ച് അടിസ്ഥാനരഹിതമായ ആരോപണങ്ങൾ ഉയരുമ്പോൾ ഒരു അച്ഛനെന്ന നിലയിൽ നിശ്ശബ്ദനായിരിക്കാൻ കഴിയില്ലെന്നും യാതൊരു തെളിവുമില്ലാതെ ‘മദ്യപാനി’ എന്നതുൾപ്പെടെയുള്ള പരാമർശങ്ങൾ നടത്തുന്നത് അങ്ങേയറ്റം നിരുത്തരവാദപരമാണെന്നും അദ്ദേഹം കുറ്റപ്പെടുത്തി.

പൊതുശ്രദ്ധയിലുള്ളവരാണ് എന്നതുകൊണ്ട് ആർക്കും കഥകൾ മെനഞ്ഞെടുക്കാനോ വ്യക്തിഹത്യ നടത്താനോ അവകാശമില്ലെന്ന് അർജുൻ ഓർമ്മിപ്പിച്ചു. മൗനം കുറ്റസമ്മതമായോ നുണകൾ പ്രചരിപ്പിക്കാനുള്ള അനുവാദമായോ ആരും തെറ്റിദ്ധരിക്കരുതെന്നും ബന്ധപ്പെട്ട അധികാരികൾക്ക് ഔദ്യോഗികമായി പരാതി നൽകി നിയമനടപടികൾ സ്വീകരിച്ചിട്ടുണ്ടെന്നും അദ്ദേഹം അറിയിച്ചു. വാർത്തകൾ വിറ്റഴിക്കാൻ വേണ്ടി സത്യത്തോടും വിശ്വാസ്യതയോടും കൂറില്ലാതെ ആരോപണങ്ങൾ പർവ്വതീകരിക്കുന്ന ചില മാധ്യമങ്ങളുടെ പ്രവണത നിർഭാഗ്യകരമാണെന്നും അദ്ദേഹം വിമർശിച്ചു.

ഇത് തന്റെ മകളുടെ മാത്രം പ്രശ്നമല്ലെന്നും ആത്മാഭിമാനം ചോദ്യം ചെയ്യപ്പെടുകയും വ്യക്തിപരമായ തിരഞ്ഞെടുപ്പുകൾ പരസ്യവിചാരണയ്ക്ക് ഇരയാവുകയും ചെയ്യുന്ന ഓരോ സ്ത്രീയുടെയും വിഷയമാണെന്നും അർജുൻ കൂട്ടിച്ചേർത്തു. ഒരു സ്ത്രീയും ഇത്തരം ആരോപണങ്ങൾ ഒറ്റയ്ക്ക് നേരിടേണ്ടി വരരുതെന്നും സ്വന്തം ജീവിതരീതി മറ്റുള്ളവർക്ക് മുന്നിൽ ന്യായീകരിക്കേണ്ട അവസ്ഥ ഉണ്ടാകരുതെന്നും അദ്ദേഹം പറഞ്ഞു. അടിസ്ഥാനരഹിതമായ വ്യാജവാർത്തകൾ ഇനിയും പ്രചരിപ്പിക്കുകയോ പങ്കുവെക്കുകയോ ചെയ്താൽ കർശന നിയമനടപടികൾ നേരിടേണ്ടി വരുമെന്ന മുന്നറിയിപ്പോടെയാണ് അദ്ദേഹം പ്രസ്താവന അവസാനിപ്പിച്ചത്.

Related Articles

Leave a Reply

Your email address will not be published. Required fields are marked *

Back to top button