തീയേറ്ററുകളിൽ റിലീസ് ചെയ്ത ‘കാട്ടാളൻ’ എന്ന സിനിമയ്ക്കെതിരെ ഓൺലൈൻ പ്ലാറ്റ്ഫോമുകളിൽ സംഘടിതമായി ഡീഗ്രേഡിങ് നടക്കുന്നതായി പരാതി. ചിത്രം റിലീസ് ചെയ്തതിന് തൊട്ടുപിന്നാലെ ഒരേ സ്വഭാവമുള്ള കടുത്ത നെഗറ്റീവ് റിവ്യൂകളും കുറഞ്ഞ റേറ്റിങ്ങും വലിയ തോതിൽ പ്രത്യക്ഷപ്പെട്ടിരുന്നു. സൈബർ ആക്രമണം പരിധിവിട്ടതോടെ പ്രമുഖ ടിക്കറ്റ് ബുക്കിങ് ആപ്പായ ബുക്ക് മൈ ഷോ ചിത്രത്തിന്റെ റേറ്റിങ് ഓപ്ഷൻ അപ്രതീക്ഷിതമായി ഡിസേബിൾ ചെയ്തു.
സിനിമാ ലോകത്ത് ഇപ്പോൾ ഈ നടപടി വലിയ ചർച്ചയായിരിക്കുകയാണ്. സിനിമയെ മനഃപൂർവ്വം തകർക്കാൻ ലക്ഷ്യമിട്ട് വ്യാജ അക്കൗണ്ടുകൾ ഉപയോഗിച്ചാണോ ഈ സൈബർ ആക്രമണം നടന്നതെന്ന സംശയം ബുക്ക് മൈ ഷോയുടെ ഈ നടപടിയോടെ ശക്തമായിട്ടുണ്ട്. സോഷ്യൽ മീഡിയയിലും മറ്റ് ഓൺലൈൻ ഇടങ്ങളിലും ഒരേ മാതൃകയിലുള്ള നെഗറ്റീവ് കമന്റുകൾ ഒരേസമയം വ്യാപകമായി പ്രചരിപ്പിക്കപ്പെട്ടത് ഇതിന് തെളിവായി ചൂണ്ടിക്കാണിക്കപ്പെടുന്നു.
സിനിമ കണ്ട യഥാർത്ഥ പ്രേക്ഷകരിൽ നിന്നും മികച്ച പ്രതികരണമാണ് ലഭിക്കുന്നതെന്നും അതിനിടയിലാണ് ഇത്തരം സൈബർ ആക്രമണങ്ങൾ നടക്കുന്നതെന്നും അണിയറ പ്രവർത്തകർ പ്രതികരിച്ചു. സിനിമയുടെ യഥാർത്ഥ വിജയവും പരാജയവും നിശ്ചയിക്കേണ്ടത് കാണികളാണ്. വ്യാജ റിവ്യൂകളിൽ വീഴാതെ എല്ലാവരും തീയേറ്ററുകളിൽ എത്തി ‘കാട്ടാളൻ’ കണ്ട ശേഷം സ്വന്തം അഭിപ്രായം രൂപീകരിക്കണമെന്നും സിനിമയിലെ പ്രവർത്തകർ പ്രേക്ഷകരോട് അഭ്യർത്ഥിച്ചു. ഒരു സിനിമയുടെ അന്തിമ വിലയിരുത്തൽ നിർണ്ണയിക്കേണ്ടത് യഥാർത്ഥ പ്രേക്ഷകരുടെ അഭിപ്രായങ്ങൾ മാത്രമായിരിക്കണമെന്നും അവർ കൂട്ടിച്ചേർത്തു.
