ജയസൂര്യയെ നായകനാക്കി ജിതിന്‍ കെ. ജോസ് സംവിധാനം ചെയ്യുന്ന ‘മായന്‍ ചാപ്റ്റര്‍ 1’ന്റെ ഫസ്റ്റ് ലുക്ക് പോസ്റ്റര്‍ പുറത്തിറങ്ങി. മാജിക് മൂണ്‍ പ്രൊഡക്ഷന്‍സിന്റെ ബാനറില്‍ രാജീവ് ഗോവിന്ദന്‍ നിര്‍മ്മിക്കുന്ന ചിത്രം ഡിസംബര്‍ 3ന് ആഗോള റിലീസായി തിയേറ്ററുകളിലെത്തും. ‘ബിയോണ്ട് ദ ഷാഡോസ്’ എന്ന ടാഗ്ലൈനോടെ എത്തുന്ന ചിത്രം ഒരു മിസ്റ്ററി ത്രില്ലറാണെന്ന സൂചന നേരത്തെ പുറത്തുവന്ന ടൈറ്റില്‍ വീഡിയോയടക്കം നല്‍കിയിരുന്നു. ചിത്രീകരണം പൂര്‍ത്തിയായ സിനിമയുടെ പോസ്റ്റ് പ്രൊഡക്ഷന്‍ ജോലികള്‍ പുരോഗമിക്കുകയാണ്. റഷ്യയില്‍ ആദ്യ ഷെഡ്യൂള്‍ ചിത്രീകരിച്ച ശേഷം കേരളത്തില്‍ തുടര്‍ന്ന ചിത്രത്തിന്റെ അവസാന ഷെഡ്യൂള്‍ പാലായിലാണ് പൂര്‍ത്തിയാക്കിയത്. പോലീസ് ഓഫീസറുടെ വേഷത്തിലാണ് ജയസൂര്യ ഈ ചിത്രത്തിലെത്തുന്നത്.
പോലീസ് വേഷത്തിലുള്ള ജയസൂര്യ കഥാപാത്രത്തെയാണ് ഫസ്റ്റ് ലുക്ക് പോസ്റ്ററിലൂടെ അവതരിപ്പിച്ചിരിക്കുന്നത്. ‘കളങ്കാവല്‍’ എന്ന ചിത്രത്തിന് ശേഷം ജിതിന്‍ കെ. ജോസ് സംവിധാനം ചെയ്യുന്ന സിനിമയെന്ന പ്രത്യേകതയും ‘മായന്‍ ചാപ്റ്റര്‍ 1’നുണ്ട്. ‘ഓര്‍ഡിനറി’, ‘അനാര്‍ക്കലി’ എന്നീ വിജയചിത്രങ്ങള്‍ നിര്‍മ്മിച്ച രാജീവ് ഗോവിന്ദന്‍ മാജിക് മൂണ്‍ പ്രൊഡക്ഷന്‍സിന്റെ ബാനറില്‍ ഒരുക്കുന്ന മൂന്നാമത്തെ ചിത്രമാണിത്. റാഫിയും ജിതിന്‍ കെ. ജോസും ചേര്‍ന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. നൈല ഉഷയാണ് ചിത്രത്തിലെ നായിക. വിജയ് ബാബു, ഐശ്വര്യ രാജ്, ജിബിന്‍ ഗോപിനാഥ് എന്നിവരും ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നു.
രാജ്യാതിര്‍ത്തികള്‍ കടന്നുപോകുന്ന നിഗൂഢതകളുടെ ലോകമാണ് ‘മായന്‍ ചാപ്റ്റര്‍ 1’ അവതരിപ്പിക്കുന്നതെന്നാണ് ചിത്രത്തെക്കുറിച്ച് പുറത്തുവന്ന സൂചനകള്‍ പറയുന്നത്. നൂറ്റാണ്ടുകള്‍ പഴക്കമുള്ള രഹസ്യ ആചാരങ്ങളും ലോകത്തിന്റെ വിവിധ ഭാഗങ്ങളില്‍ ഒളിഞ്ഞുകിടക്കുന്ന ശക്തികളും തമ്മിലുള്ള ബന്ധം കഥയുടെ പ്രധാന പശ്ചാത്തലമാകുമെന്ന റിപ്പോര്‍ട്ടുകള്‍ ചിത്രത്തെക്കുറിച്ചുള്ള ആകാംക്ഷ വര്‍ധിപ്പിക്കുന്നുണ്ട്. കേരളത്തിലെ ചില പുരാതന ക്രിസ്തീയ കുടുംബങ്ങളുമായി ബന്ധപ്പെടുത്തി പറയപ്പെടുന്ന ‘കറുത്തച്ചനൂട്ട്’ എന്ന ദുര്‍മന്ത്രവാദ രീതിയും ചിത്രത്തിന്റെ പ്രമേയവുമായി ബന്ധപ്പെട്ടിരിക്കാമെന്ന ചര്‍ച്ചകളും ഉയര്‍ന്നിട്ടുണ്ട്. എന്നാല്‍ ഇതുസംബന്ധിച്ച ഔദ്യോഗിക വിശദാംശങ്ങള്‍ പുറത്തുവന്നിട്ടില്ല. ആഗോള പശ്ചാത്തലവും നിഗൂഢത നിറഞ്ഞ കഥയും ചേര്‍ന്നൊരു മിസ്റ്ററി ത്രില്ലറായിരിക്കും ചിത്രമെന്ന പ്രതീക്ഷയിലാണ് പ്രേക്ഷകര്‍. ഫസ്റ്റ് ലുക്ക് പോസ്റ്റര്‍ പുറത്തുവന്നതോടെ സിനിമയുടെ ലോകത്തെയും കഥാപാത്രങ്ങളെയും കുറിച്ചുള്ള കൂടുതല്‍ വിവരങ്ങള്‍ അറിയാനുള്ള കാത്തിരിപ്പും ശക്തമായിരിക്കുകയാണ്.
ചിത്രത്തിന്റെ ക്യാമറ കൈകാര്യം ചെയ്യുന്നത് ഫൈസല്‍ അലി, സംഗീതം ഒരുക്കുന്നത് മുജീബ് മജീദ്, എഡിറ്റിംഗ് നിര്‍വഹിക്കുന്നത് പ്രവീണ്‍ പ്രഭാകര്‍ എന്നിവരാണ്. പ്രൊഡക്ഷന്‍ കണ്‍ട്രോളര്‍ – ദീപക് പരമേശ്വരന്‍, പ്രൊഡക്ഷന്‍ ഡിസൈനര്‍ – സുനില്‍ ദാസ്, ലൈന്‍ പ്രൊഡ്യൂസര്‍ – രോഹിത് ആര്‍ നായര്‍, കോസ്റ്റ്യൂം – സമീറ സനീഷ്, മേക്കപ്പ് – അമല്‍ ചന്ദ്രന്‍, ചീഫ് അസോസിയേറ്റ് ഡയറക്ടര്‍ – ബോസ് വി, വരികള്‍ – രാജീവ് ഗോവിന്ദന്‍, ജിതിന്‍ കെ ജോസ്, കോ – റൈറ്റര്‍ – ശ്രീഖില്‍ ശ്രീനിവാസന്‍, സ്റ്റില്‍സ് – സിനത് സേവ്യര്‍, പ്രോജക്ട് ഡിസൈനര്‍ – ആന്റണി സ്റ്റീഫന്‍, പിആര്‍ഒ- വൈശാഖ് സി വടക്കേവീട്, ജിനു അനില്‍കുമാര്‍, വിപിന്‍ കുമാര്‍ വി.
