ക്യൂബ്സ് എന്റർടെയ്ൻമെൻറ്സിൻറെ ബാനറിൽ മലയാളത്തിലെ ഏറ്റവും വയലൻസ് നിറഞ്ഞ സിനിമയെന്ന വിശേഷണവുമായെത്തിയ ‘മാർക്കോ’ എന്ന സൂപ്പർഹിറ്റ് ചിത്രത്തിന് ശേഷം ആന്റണി വർഗീസ് പെപ്പെ, ദുഷാര വിജയൻ, സുനിൽ, കബീർ സിംഗ് എന്നിവരെ കേന്ദ്ര കഥാപാത്രങ്ങളാക്കി ഷരീഫ് മുഹമ്മദ് നിർമ്മിച്ച് പോൾ ജോർജ്ജ് സംവിധാനം ചെയ്യുന്ന കാട്ടാളൻ മെയ് 28 ന് റിലീസിന് ഒരുങ്ങുകയാണ്. ചിത്രത്തിന്റെ അഡ്വാൻസ് ബുക്കിംഗ് ആരംഭിച്ചിരിക്കുകയാണ്. സിനിമയുടെ റിലീസിന് ശേഷം പെപ്പെയുടെ സ്റ്റാർഡം കൂടുമെന്നും മോഹൻലാലിന് ശേഷം ഏറ്റവും പഞ്ചുള്ള ഇടി പെപ്പെയുടേതാണെന്നും ജഗദീഷ് പറഞ്ഞു.
‘ഒരുപാട് റിസ്ക്കുള്ള ഷോട്ടുകൾ കാട്ടാളനിൽ പെപ്പെ അഭിനയിച്ചിട്ടുണ്ട്. ഈ സിനിമയ്ക്ക് ശേഷം പെപ്പെയുടെ സ്റ്റാർഡം കൂടും. അത്രയ്ക്ക് നന്നായി അദ്ദേഹം ചെയ്തിട്ടുണ്ട്. പെപ്പെയുടെ ഇടി ഒരു 15 കിലോ ഉണ്ടെന്ന് പറയും. പെപ്പെ ഇടിക്കുമ്പോൾ എതിരാളിയെ അദ്ദേഹം കീഴ്പ്പെടുത്തുന്നത് നമുക്ക് കയ്യടിക്കാൻ തോന്നും. മോഹൻലാൽ ഇടിക്കുമ്പോൾ ആ പഞ്ചിന് ഇത്ര കിലോ ഉണ്ടെന്ന് നമുക്ക് തോന്നാറില്ലേ. അത് കഴിഞ്ഞാൽ പുതുതലമുറയിൽ പെപ്പെയുടെ ഇടിക്കാണ് ഏറ്റവും പഞ്ചുള്ളത്. പ്രേക്ഷരുടെ സപ്പോർട്ട് പെപ്പെയ്ക്ക് ഉണ്ട്. അത് കാട്ടാളന് ഗുണം ചെയ്യും’, റിപ്പോർട്ടർ ഫിലിംസിനോട് ജഗദീഷ് പറഞ്ഞു.
മികച്ച പ്രതികരണം ആണ് സിനിമയ്ക്ക് അഡ്വാൻസ് ബുക്കിങ്ങിൽ ലഭിക്കുന്നത്. ആദ്യ ദിനം സിനിമയ്ക്ക് മികച്ച ഓപ്പണിങ് തന്നെ നേടാനാകും എന്നാണ് കണക്കുകൂട്ടൽ. പ്രേക്ഷകർ ഈ വർഷം ഏറെ ആകാംക്ഷയോടെ കാണാൻ കാത്തിരിക്കുന്ന ചിത്രങ്ങൾ ഉൾപ്പെട്ട ഐഎംഡിബി പട്ടികയിൽ ഒന്നാം സ്ഥാനത്താണ് ‘കാട്ടാളൻ’ ഇടം പിടിച്ചിരിക്കുന്നത്. ആനക്കൊമ്പ് കള്ളക്കടത്തിന്റെ ഏറ്റവും ഭയാനകവും വന്യവുമായ ദൃശ്യങ്ങളുമായാണ് ചിത്രം പ്രേക്ഷകരിലേക്ക് എത്തുന്നതെന്നാണ് ട്രെയിലർ നൽകിയിട്ടുള്ള സൂചനകൾ. ചോരക്കളിയുടെ ഇതുവരെ കാണാത്ത കാഴ്ചകളും ആക്ഷൻ വെടിക്കെട്ടും മാസ്മരികവും ചടുലവുമായ ദൃശ്യങ്ങളുമായാണ് സിനിമയെത്തുന്നത് എന്നാണ് മനസ്സിലാക്കാനാവുന്നത്. രവി ബസ്രൂർ ഒരുക്കുന്ന ഹരം കൊള്ളിക്കുന്ന സംഗീതമാണ് സിനിമയുടെ ഹൈലൈറ്റ്.
കന്നഡയിലെ ശ്രദ്ധേയ സംഗീത സംവിധായകൻ അജനീഷ് ലോക്നാഥും കാട്ടാളനിൽ സംഗീതമൊരുക്കുന്നുണ്ട്. ടി സീരീസാണ് സിനിമയുടെ മ്യൂസിക് റൈറ്റ്സ് സ്വന്തമാക്കിയിരിക്കുന്നത്. ഷിമാരൂ ആണ് ഡിജിറ്റൽ ആൻഡ് സാറ്റലൈറ്റ് ഡിസിട്രിബ്യൂട്ടർ പാർട്നർ. ‘കെ.ജി.എഫ്’, ‘കാന്താര’ തുടങ്ങിയ ബ്രഹ്മാണ്ഡ ചിത്രങ്ങളുടെ നിർമ്മാതാക്കളായ ഹോംബാലെ ഫിലിംസാണ് ചിത്രത്തിൻറെ കർണാടകയിലെ തിയേറ്റർ വിതരണാവകാശം റെക്കോർഡ് തുകയ്ക്ക് സ്വന്തമാക്കിയിരിക്കുന്നത്. ഫിലിം ഡിസ്ട്രിബ്യൂഷൻ രംഗത്തെ അതികായരായ ഫാർസ് ഫിലിംസാണ് ‘കാട്ടാളൻ’ സിനിമയുടെ ഓവർസീസ് ഡിസ്ട്രിബ്യൂഷൻ വിതരണാവകാശം സ്വന്തമാക്കിയിരിക്കുന്നത്.
