ഹൃത്വിക് റോഷൻ, ജൂനിയർ എൻടിആർ, കിയാര അദ്വാനി എന്നിവർ പ്രധാന വേഷങ്ങളിലെത്തുന്ന ചിത്രം ‘വാർ 2’ സെൻസർ ബോർഡിന്റെ വെട്ടിച്ചുരുക്കലുകൾക്ക് ശേഷം റിലീസിനൊരുങ്ങുന്നു. ഓഗസ്റ്റ് 14-ന് തിയേറ്ററുകളിൽ എത്താൻ തയ്യാറെടുക്കുന്ന ചിത്രത്തിന് U/A 16+ സർട്ടിഫിക്കറ്റാണ് ലഭിച്ചിരിക്കുന്നത്.
ചിത്രത്തിലെ ആക്ഷൻ രംഗങ്ങളിൽ യാതൊരു മാറ്റങ്ങളും നിർദ്ദേശിച്ചിട്ടില്ല, എന്നിരുന്നാലും ചിത്രത്തിലെ ചില സംഭാഷണങ്ങളും രംഗങ്ങളും സെൻസർ ബോർഡ് നീക്കം ചെയ്യാനോ മാറ്റം വരുത്താനോ ആവശ്യപ്പെട്ടിട്ടുണ്ട്.
ചിത്രത്തിലെ അനാവശ്യ പരാമർശങ്ങളുള്ള ആറിടങ്ങളിൽ സംഭാഷണങ്ങൾ മ്യൂട്ട് ചെയ്യണമെന്നാണ് സെൻസർ ബോർഡ് നിർദ്ദേശിച്ചത്. കൂടാതെ ഒരു അശ്ലീല പരാമർശം മാറ്റി പകരം പുതിയൊരു വാക്യം ചേർക്കുകയും ചെയ്തു. രണ്ട് സെക്കൻഡ് നീളുന്ന ഒരു അശ്ലീല രംഗം പൂർണ്ണമായും ഒഴിവാക്കാനും നിർദ്ദേശമുണ്ട്. ‘പ്രലോഭനകരമായ’ രംഗങ്ങൾ ഒൻപത് സെക്കൻഡായി ചുരുക്കാനും ബോർഡ് ആവശ്യപ്പെട്ടിട്ടുണ്ട്. കിയാര അദ്വാനിയുടെ ബിക്കിനി രംഗങ്ങളാണ് ഇത്തരത്തിൽ വെട്ടിച്ചുരുക്കിയതെന്നാണ് സൂചന. രണ്ട് മണിക്കൂർ 59 മിനിറ്റ് 49 സെക്കൻഡായിരുന്ന ചിത്രത്തിന്റെ ആകെ ദൈർഘ്യം, സെൻസർ ബോർഡിന്റെ നിർദ്ദേശങ്ങൾക്ക് ശേഷം രണ്ട് മണിക്കൂർ 51 മിനിറ്റ് 44 സെക്കൻഡായി ചുരുങ്ങി.
അയാൻ മുഖർജി സംവിധാനം ചെയ്ത ‘വാർ 2’വിൽ ഹൃത്വിക് റോഷൻ മേജർ കബീർ ധലിവാളായും ജൂനിയർ എൻടിആർ വിക്രമായും കിയാര അദ്വാനി കാവ്യ ലുത്രയായും എത്തുന്നു. സ്വാതന്ത്ര്യദിനത്തോടനുബന്ധിച്ച് തിയേറ്ററുകളിലെത്തുന്ന ചിത്രം രജനീകാന്തിന്റെ ‘കൂലി’ എന്ന സിനിമയുമായി ബോക്സ് ഓഫീസിൽ മത്സരിക്കുമെന്നാണ് പ്രതീക്ഷിക്കുന്നത്.‘വാർ 2’ വിന്റെ ടീസറുകൾക്കും ഗാനങ്ങൾക്കും മികച്ച പ്രതികരണമാണ് ഇതുവരെ ലഭിച്ചത്. കിയാരയും ഹൃത്വിക്കും ഒന്നിച്ച ‘ആവാൻ ജാവാൻ’ എന്ന ഗാനത്തിലെ കെമിസ്ട്രി പ്രേക്ഷകർക്കിടയിൽ വലിയ ചർച്ചയായിരുന്നു.
