വിവിധ കഥാപാത്രങ്ങളിലൂടെ മലയാളി മനസില്‍ ഇടം പിടിച്ച താരമാണ് ചെമ്പില്‍ അശോകന്‍. ബെത്ലഹേം യൂണിറ്റാണ് താരത്തിന്റെ അവസാനമായി ഇറങ്ങിയ ചിത്രം. ആ ചിത്രത്തിലേക്ക് എത്തിപ്പെട്ടത് എങ്ങിനെയെന്ന് പറയുകയാണ് താരം. റിപ്പോര്‍ട്ടര്‍ ഫിലിംസിന് നല്‍കിയ അഭിമുഖത്തിലാണ് അദ്ദേഹം ഈക്കാര്യം പറഞ്ഞത്. ‘ബെത്ലഹേം കുടുംബ യൂണിറ്റിലെ എന്റെ സീനുകളൊക്കെ വാഗമണ്ണില്‍ വച്ചായിരുന്നു. ഞാന്‍ സെറ്റില്‍ ചെന്നപ്പോള്‍ ഗിരീഷ് നിന്ന് പരുങ്ങുന്നു. എന്നിട്ട് എന്നോട് പറഞ്ഞു ചേട്ടാ ഞാന്‍ ഉദ്ദേശിച്ച ക്യാരക്ടറിന് ഈ പ്രായം പോരാ. അതു കേട്ടപ്പോള്‍ എനിക്ക് ഉള്ളില്‍ ചിരിയാണ് വന്നത്. ഏത് പ്രായം വേണമെന്നാണ് പുള്ളി ഉദ്ദേശിച്ചിരിക്കുന്നതെന്ന് അറിയില്ലല്ലോ. തൃശ്ശൂരുക്കാരുടെ ഭാഷയില്‍ പറഞ്ഞാല്‍ ഞാന്‍ ചുള്ളനായിട്ടാണ് അവിടെ എത്തിയിരിക്കുന്നത്. എന്താ ഉദ്ദേശിക്കുന്നതെന്ന് ഞാന്‍ ഗിരീഷിനോട് ചോദിച്ചു. കുറച്ചു പ്രായമായ കഥാപാത്രമാണ് ഇതെന്ന് പറഞ്ഞു. അങ്ങനെ എന്റെ കുറച്ച് നരയൊക്കെ വച്ച് പ്രായമാക്കുകയാരിന്നു’-ചെമ്പില്‍ അശോകന്‍.
അതേസമയം, ‘ബെത്ലഹേം കുടുംബ യൂണിറ്റ്’ വിദേശ മാര്‍ക്കറ്റുകളിലും വന്‍ വിജയം നേടുന്നു. പ്രമുഖ ബോക്‌സ് ഓഫീസ് ട്രാക്കര്‍മാരായ സാക്‌നില്‍കിന്റെ കണക്കുപ്രകാരം, ഗിരീഷ് എ.ഡി. സംവിധാനം ചെയ്ത ഈ നിവിന്‍ പോളി ചിത്രത്തിന്റെ ആഗോള ബോക്‌സ് ഓഫീസ് കളക്ഷന്‍ ഇതിനോടകം 330.86 കോടി രൂപയാണ് പിന്നിട്ടിരിക്കുന്നത്.ചിത്രത്തിന്റെ ആകെ കളക്ഷന്റെ 42 ശതമാനത്തോളവും വിദേശ മാര്‍ക്കറ്റുകളില്‍ നിന്നാണ് നേടിയെടുത്തിരിക്കുന്നത്. നോര്‍ത്ത് അമേരിക്ക, മിഡില്‍ ഈസ്റ്റ്, യുകെ-അയര്‍ലന്‍ഡ്, ഓഷ്യാനിയ തുടങ്ങിയ പ്രധാന അന്താരാഷ്ട്ര കേന്ദ്രങ്ങളില്‍ നിന്നുമാത്രം ചിത്രം വാരിക്കൂട്ടിയത് 138.45 കോടി രൂപയാണ്. ഈ വര്‍ഷത്തെ തെന്നിന്ത്യന്‍ റിലീസുകളില്‍ ഓവര്‍സീസ് കളക്ഷനില്‍ ഏറ്റവുമധികം പണം വാരിയ ആദ്യ അഞ്ച് ചിത്രങ്ങളില്‍ മൂന്നെണ്ണവും മലയാളത്തില്‍ നിന്നാണെന്നത് ഇന്‍ഡസ്ട്രിക്ക് വലിയ അഭിമാനകരമാണ്.
വിദേശ കളക്ഷനില്‍ 138.45 കോടി നേടി ബെത്ലഹേം ഒന്നാം സ്ഥാനം അലങ്കരിക്കുമ്പോള്‍, 111.70 കോടി നേടിയ മറ്റൊരു മലയാള ചിത്രമായ ‘ദൃശ്യം 3’ ആണ് രണ്ടാം സ്ഥാനത്തുള്ളത്. മൂന്നാം സ്ഥാനത്ത് വിജയ് നായകനായെത്തിയ ‘ജനനായകന്‍’ 93.50 കോടിയും, നാലാം സ്ഥാനത്ത് 85.55 കോടി നേടിയ മലയാള ചിത്രം ‘വാഴ 2’ വും ഇടംപിടിച്ചു. സൂര്യ നായകനായ തമിഴ് ചിത്രം ‘കറുപ്പ്’ 81.15 കോടിയുമായി അഞ്ചാം സ്ഥാനത്താണ്. ബെത്ലഹേമിന്റെ ഇന്ത്യന്‍ ഗ്രോസ് കളക്ഷന്‍ 192.41 കോടി രൂപയാണെന്നും റിപ്പോര്‍ട്ടുകള്‍ വ്യക്തമാക്കുന്നു.
