സിനിമ ചിത്രീകരണത്തിനായി വാടകക്കെടുത്ത ക്യാമറയുടെയും ലൈറ്റിംഗ് ഉപകരണങ്ങളുടെയും പണം നൽകാതെ വഞ്ചിച്ചെന്നാരോപിച്ച് തമിഴ് നടൻ ആര്യക്കെതിരെ കേസ്. ഹൈദരാബാദ് ജൂബിലി ഹിൽസ് പോലീസ് സ്റ്റേഷനിലാണ് ആര്യക്കും ‘അനന്തൻ കാട്’ എന്ന സിനിമയുടെ നിർമ്മാതാക്കൾക്കും അണിയറപ്രവർത്തകർക്കും എതിരെ വഞ്ചനാക്കുറ്റത്തിന് കേസെടുത്തിരിക്കുന്നത്. ഹൈദരാബാദ് ആസ്ഥാനമായി പ്രവർത്തിക്കുന്ന ഒരു പ്രമുഖ ക്യാമറ എക്യുപ്മെന്റ് റെന്റൽ കമ്പനിയാണ് പരാതി നൽകിയിരിക്കുന്നത്. ‘അനന്തൻ കാട്’ സിനിമയുടെ ഷൂട്ടിംഗിനായി ഹൈദരാബാദിൽ നിന്ന് കേരളത്തിലേക്ക് പ്രീമിയം ഡിജിറ്റൽ ക്യാമറകളും അനുബന്ധ ഉപകരണങ്ങളും ഈ കമ്പനിയാണ് എത്തിച്ചു നൽകിയത്.
ചിത്രീകരണത്തിന് സാങ്കേതിക സഹായങ്ങളും ഇവർ നൽകി. മൊത്തം 2.12 കോടി രൂപയുടെ ബില്ലിൽ, ചെറിയൊരു തുക മാത്രമാണ് ലഭിച്ചത്. ബാക്കി 1.80 കോടി രൂപ ഇനിയും ലഭിക്കാനുണ്ട്. ചിത്രം റിലീസ് ചെയ്യുന്നതിന് മുൻപ് ബാക്കി തുക നൽകുമെന്ന് നിർമ്മാതാക്കൾ രേഖാമൂലം ഉറപ്പുനൽകിയിരുന്നെങ്കിലും ആ വാഗ്ദാനം പാലിക്കപ്പെട്ടില്ല. ഫോൺ കോളുകളിലൂടെയും സന്ദേശങ്ങളിലൂടെയും പണം ആവശ്യപ്പെട്ടപ്പോൾ അണിയറപ്രവർത്തകർ ഒഴിഞ്ഞുമാറുകയാണുണ്ടായത്. കുടിശ്ശിക തുക ആവശ്യപ്പെട്ട് കമ്പനി മാനേജർ നേരിട്ട് ചെന്നപ്പോൾ നടൻ ആര്യയും നിർമ്മാതാവ് വിനോദും പേഴ്സണൽ അസിസ്റ്റന്റും ചേർന്ന് ഭീഷണിപ്പെടുത്തിയതായും പരാതിയിൽ വ്യക്തമാക്കുന്നു. ഇതേത്തുടർന്നാണ് കമ്പനി പോലീസിൽ പരാതി നൽകിയത്.
വഞ്ചനാക്കുറ്റം, ഭീഷണിപ്പെടുത്തൽ എന്നീ വകുപ്പുകൾ പ്രകാരമാണ് പോലീസ് കേസ് രജിസ്റ്റർ ചെയ്തിരിക്കുന്നത്. പരാതിയിൽ പറയുന്ന രേഖകൾ പരിശോധിച്ചുവരികയാണെന്നും ആര്യ ഉൾപ്പെടെയുള്ളവരെ ഉടൻ ചോദ്യം ചെയ്യുമെന്നും ജൂബിലി ഹിൽസ് പോലീസ് അറിയിച്ചു.നിലവിൽ സന്തോഷ് ശ്രീവത്സൻ സംവിധാനം ചെയ്യുന്ന ‘സീ യു’ എന്ന ചിത്രത്തിന്റെ ജോലികളിലും മറ്റൊരു സിനിമയുടെ തിരക്കുകളിലുമാണ് ആര്യ. വിവാദ വിഷയത്തിൽ നടനോ അണിയറപ്രവർത്തകരോ ഇതുവരെ ഔദ്യോഗിക പ്രതികരണം നടത്തിയിട്ടില്ല. സിനിമ നിർമ്മാണരംഗത്തെ ഇത്തരം സാമ്പത്തിക തട്ടിപ്പുകൾ വലിയ ചർച്ചയാകുമ്പോൾ, ആര്യയുടെ ഭാഗത്തുനിന്നുള്ള മറുപടിക്കായി കാത്തിരിക്കുകയാണ് സിനിമാലോകം. നിയമനടപടികൾ ആരംഭിച്ചതോടെ കേസ് ഇനി എങ്ങോട്ട് നീങ്ങുമെന്ന ആകാംക്ഷയിലാണ് ആരാധകർ.
