ദിലീപിനെ നായകനാക്കി ജഗൻ ഷാജി കൈലാസ് സംവിധാനം ചെയ്യുന്ന പുതിയ ചിത്രത്തിന് ‘നീക്കം’ എന്ന് പേരിട്ടു. പ്രശസ്ത സംവിധായകൻ ഷാജി കൈലാസിന്റെ മകൻ ജഗന്റെ ആദ്യ സംവിധാന സംരംഭമാണിത്. ദിലീപിന്റെ കരിയറിലെ 152-ാമത്തെ ചിത്രമായ ഇതിന്റെ ടൈറ്റിൽ പ്രഖ്യാപനം ശ്രദ്ധേയമായ ഒരു പോസ്റ്ററിലൂടെയാണ് നടത്തിയത്. മഴയത്ത് കുടപിടിച്ച് നിൽക്കുന്ന ദിലീപിന്റെ തീക്ഷ്ണമായ ലുക്കാണ് പോസ്റ്ററിലുള്ളത്. പൂർണ്ണമായും ഒരു ഇമോഷണൽ ഡ്രാമ ത്രില്ലർ ഗണത്തിൽപ്പെടുന്ന ഈ ചിത്രം പ്രേക്ഷകരെ ആകാംക്ഷയുടെ മുൾമുനയിൽ നിർത്തുന്ന ഒന്നായിരിക്കുമെന്ന് അണിയറക്കാർ അവകാശപ്പെടുന്നു. വിബിൻ ബാലചന്ദ്രൻ തിരക്കഥയൊരുക്കിയ ചിത്രത്തിന്റെ ഷൂട്ടിംഗ് തൊടുപുഴയിലും കൊച്ചിയിലുമായി 60 ദിവസം കൊണ്ട് പൂർത്തിയായിക്കഴിഞ്ഞു.
ഉർവ്വശി തീയറ്റേഴ്സ്, കാക്കാ സ്റ്റോറീസ് എന്നീ ബാനറുകളിൽ സന്ദീപ് സേനനും അലക്സ് ഇ കുര്യനും ചേർന്നാണ് ചിത്രം നിർമ്മിക്കുന്നത്. സിദ്ദിഖ്, ബിനു പപ്പു, അശോകൻ, ശാരി, കലാഭവൻ ഷാജോൺ, ബിലാസ് ചന്ദ്രൻ, സാദിഖ്, ഷെല്ലി തുടങ്ങി വലിയൊരു താരനിര തന്നെ ചിത്രത്തിൽ അണിനിരക്കുന്നുണ്ട്. അജയ് ഡേവിഡ് കാച്ചപ്പിള്ളി ഛായാഗ്രഹണവും മുജീബ് മജീദ് സംഗീതവും നിർവ്വഹിക്കുന്നു. എഡിറ്റിംഗ് സൂരജ് ഇ എസ് ആണ്. നിർമ്മാണ പ്രവർത്തനങ്ങൾ പൂർത്തിയായി വരുന്ന ചിത്രം ഉടൻ തന്നെ ഉർവ്വശി തീയറ്റേഴ്സ് പ്രദർശനത്തിനെത്തിക്കും.
