ഇന്ത്യൻ സിനിമാപ്രേമികളെ ആവേശത്തിന്റെ കൊടുമുടിയിൽ എത്തിച്ച സിനിമയായിരുന്നു തുമ്പാട്. ഒരു ഹൊറർ മിത്തോളജിക്കൽ ഫാന്റസി സിനിമയി എത്തിയ ചിത്രത്തിന് തിയേറ്ററിൽ വിജയിക്കാനായില്ലെങ്കിലും ഡിജിറ്റൽ റിലീസിന് ശേഷം വലിയ സ്വീകരണമായിരുന്നു ലഭിച്ചത്. തുടർന്ന് ചിത്രം ഒരു കൾട്ട് ക്ലാസിക് ആയി മാറുകയും ചെയ്തിരുന്നു. റീ റിലീസിനെത്തിയപ്പോൾ വലിയ സ്വീകരണമാണ് സിനിമയ്ക്ക് ലഭിച്ചത്. ഇപ്പോഴിതാ ചിത്രത്തിന്റെ രണ്ടാം ഭാഗത്തെക്കുറിച്ചുള്ള അപ്ഡേറ്റ് ആണ് പുറത്തുവരുന്നത്.
ആദ്യ ഭാഗത്തിൽ നായകനായിരുന്ന സോഹം ഷാ ആണ് ‘തുംബാഡ് 2’ നിർമിക്കുന്നത്. ആദ്യ ഭാഗം സംവിധാനം ചെയ്ത രാഹി അനിൽ ബർവെ ആകില്ല രണ്ടാം ഭാഗം ഒരുക്കുക. ആദ്യ ഭാഗത്തിന്റെ കോ ഡയറക്ടറായിരുന്ന ആദേഷ് പ്രസാദ് ആകും രണ്ടാം ഭാഗമൊരുക്കുക. പെൻ സ്റ്റുഡിയോസും സോഹം ഷാ ഫിലിംസും ചേർന്നാണ് ഈ ബ്രഹ്മാണ്ഡ ചിത്രം നിർമിക്കുന്നത്. നിമിഷ സജയൻ ആണ് രണ്ടാം ഭാഗത്തിൽ നായികയായി എത്തുന്നത്. ‘പോച്ചർ’, ‘ഡബ്ബ കാർട്ടൽ’ തുടങ്ങിയ ഹിന്ദി സീരിസുകളിലൂടെ ദേശീയ ശ്രദ്ധ പിടിച്ചുപറ്റിയ നിമിഷ സജയൻ, സോഹം ഷായുമായി വീണ്ടും ഒന്നിക്കുന്ന ചിത്രം കൂടിയാണിത്. സോഹം ഷാ നിർമിച്ച ‘ക്രേസി’ എന്ന ചിത്രത്തിന് വേണ്ടി നിമിഷ നേരത്തെ ശബ്ദം നൽകിയിരുന്നു. നവാസുദ്ദീൻ സിദ്ദിഖിയും സിനിമയിൽ പ്രധാന വേഷത്തിൽ എത്തുന്നുണ്ട്. സിനിമയുടെ മോഷൻ പോസ്റ്റർ പുറത്തുവന്നു.
തുംബാടിന്റെ സവിശേഷമായ കഥാപരിസരത്തെ ഞാൻ എപ്പോഴും ആരാധിച്ചിരുന്നു. സോഹം ഷാ രണ്ടാം ഭാഗത്തിന്റെ കാഴ്ചപ്പാട് പങ്കുവെച്ചപ്പോൾ എനിക്ക് ആ കഥ ഇഷ്ടപ്പെടുകയും ടീമിന്റെ ഭാഗമാകാൻ തീരുമാനിക്കുകയുമായിരുന്നു. വളരെ സങ്കീർണമായ ഒരു കഥാപാത്രത്തെയാണ് ഞാൻ ഇതിൽ അവതരിപ്പിക്കുന്നത്,’’ എന്ന് നവാസുദ്ദീൻ സിദ്ദിഖി പറഞ്ഞു. 15 കോടി ബജറ്റിൽ ഒരുങ്ങിയ തുമ്പാട് 2018 ൽ ആദ്യമായി റിലീസ് ചെയ്തപ്പോൾ 12 കോടിയായിരുന്നു നേടിയത്. ചിത്രത്തിന്റെ ഒടിടി റിലീസിന് ശേഷം നിരവധി പ്രേക്ഷകരാണ് സിനിമയുടെ സംവിധാന മികവിനെയും കഥപറച്ചിലിനെയും പുകഴ്ത്തിയത്.
