റിലീസ് ചെയ്തു വർഷങ്ങൾക്കിപ്പുറവും മലയാളികളുടെ പ്രിയപ്പെട്ട ചിത്രമാണ് അച്ചുവിന്റെ അമ്മ. ഉർവശിയും മീര ജാസ്മിനും പ്രധാന വേഷങ്ങളിൽ എത്തിയ സിനിമ ബോക്സ് ഓഫീസിൽ വലിയ വിജയമായിരുന്നു. ചിത്രത്തിൽ ഉർവശി ഇംഗ്ലീഷ് പറയുന്ന രംഗം ഇന്നും ഹിറ്റാണ്. ഇപ്പോഴിതാ ഈ രംഗം റീ ക്രിയേറ്റ് ചെയ്തിരിക്കുകയാണ് ബോളിവുഡ് താരം വിദ്യ ബാലൻ. ചിത്രത്തിൽ ഉർവശിയുടെ കഥാപാത്രം മകളായ മീര ജാസ്മിനോട് ഇംഗ്ലീഷിൽ കറി വെക്കാൻ പറയുന്ന രംഗമാണ് വിദ്യ ബാലൻ അവതരിപ്പിച്ചിരിക്കുന്നത്. ‘എന്റെ ഏറ്റവും പ്രിയപ്പെട്ട നടിമാരിൽ ഒരാളായ ഉർവശി ചേച്ചിയുടെ ഒരു രംഗം. ചേച്ചി ക്ഷമിക്കണം’ എന്ന ക്യാപ്ഷനോടെയാണ് വിദ്യ ബാലൻ വീഡിയോ പങ്കുവെച്ചിരിക്കുന്നത്. ‘മലയാളികളെ… ഇതിലെ ഇതിലെ’, ഉർവശി മലയാളത്തിന്റെ മഹാ നടി’, ഒരു ഫ്രെയിമിൽ രണ്ട് OGകൾ. യഥാർത്ഥ OG ശബ്ദത്തിലൂടെയും, മറ്റൊരു OG ആക്ഷനിലൂടെയും’ എന്നിങ്ങനെയാണ് വീഡിയോയ്ക്ക് ലഭിച്ച കമന്റുകൾ.
ഇതിന് മുൻപും മലയാള സിനിമയിലെ ഹിറ്റ് സീനുകൾ വിദ്യ ബാലൻ റീ ക്രിയേറ്റ് ചെയ്തിട്ടുണ്ട്. ‘പഞ്ചാബി ഹൗസി’ലെ നർമ രംഗം റീലായി അവതരിപ്പിച്ച് മുൻപ് നടി കയ്യടി നേടിയിട്ടുണ്ട്. പഞ്ചാബി ഹൗസ് സിനിമയിൽ ഹരിശ്രീ അശോകൻ ചപ്പാത്തി വേണ്ട ചോറ് മതി എന്ന് പറയുന്ന തമാശ രംഗമാണ് വിദ്യ ബാലൻ രസകരമായി അവതരിപ്പിച്ചത്. ലിപ് സിങ്കിനൊപ്പം വിദ്യയുടെ രസകരമായ ഭാവങ്ങൾ കൂടി ചേർന്നപ്പോൾ വീഡിയോ വൈറലായി. മലയാളി സെലിബ്രിറ്റികളടക്കം നിരവധിപ്പേരാണ് വിദ്യ ബാലന്റെ പെർഫോമൻസിനെ അഭിനന്ദിച്ചത്.നിരവധി മലയാളികളും റീലിന് താഴെ കമന്റുമായി എത്തി.
സമൂഹ മാധ്യമങ്ങളിൽ സജീവമായ വിദ്യ ബാലൻ ഇടയ്ക്കിടെ ഇത്തരം റീലുകൾ പങ്കുവെയ്ക്കാറുണ്ട്. രസകരമായ റീലുകൾക്ക് മികച്ച പ്രതികരണമാണ് ആരാധകരിൽ നിന്ന് ലഭിക്കാറുള്ളത്.
