ഒരു കാലത്ത് മലയാള സിനിമയെ പിടിച്ചുകുലുക്കിയ സിനിമയാണ് ഫോർ ദി പീപ്പിൾ. ജയരാജിന്റെ സംവിധാനത്തിൽ പുറത്തുവന്ന സിനിമ വലിയ ട്രെൻഡിങ് ആയിരുന്നു. ജാസി ഗിഫ്റ്റ് ഈണം നൽകിയ സിനിമയിലെ ഗാനങ്ങൾ ഇന്ന് ട്രെൻഡ്സെറ്റർ ആണ്. ഇപ്പോഴിതാ വർഷങ്ങൾക്ക് ശേഷം ചിത്രം വീണ്ടും ബിഗ് സ്ക്രീനിലേക്ക് എത്തുകയാണ്. സിനിമയുടെ റീ റിലീസ് അപ്ഡേറ്റുമായി എത്തിയിരിക്കുകയാണ് സംവിധായകൻ ജയരാജ്.
‘കേരളക്കര ആകെ നൃത്തം ചെയ്ത ഒരു സിനിമ. ഇന്നും നിങ്ങൾ ഒന്നുകൂടെ കാണാൻ ആഗ്രഹിക്കുന്നു. ഞങ്ങൾ ആ സിനിമയുമായി വീണ്ടും വരുന്നു. മിക്കവാറും ഈ അടുത്ത മാസങ്ങളിൽ ആ സിനിമ റിലീസ് ചെയ്യും’, ജയരാജിന്റെ വാക്കുകൾ. അരുൺ, ഭരത്, അർജുൻ, നരെയ്ൻ, ഗോപിക എന്നിവർ ആയിരുന്നു സിനിമയിലെ പ്രധാന അഭിനേതാക്കൾ. ജയരാജിന്റെ കഥയ്ക്ക് ഇക്ബാൽ കുറ്റിപ്പുറം ആണ് തിരക്കഥ ഒരുക്കിയത്. 40 ലക്ഷം ബജറ്റിൽ ഒരുങ്ങിയ സിനിമ വാരിക്കൂട്ടിയത് മൂന്ന് കോടിയോളമായിരുന്നു. ഇന്നും സിനിമയ്ക്ക് വലിയ ആരാധകരുണ്ട്. സിനിമയുടെ വിജയത്തെത്തുടർന്ന് രണ്ടു ഭാഗങ്ങൾ കൂടി ജയരാജ് പുറത്തിറക്കിയിരുന്നു.
അടുത്തിടെ മലയാളത്തിൽ നിന്ന് റീ റിലീസ് ചെയ്ത സിനിമകൾ എല്ലാം വലിയ വിജയങ്ങളാകവേ ഫോർ ദി പീപ്പിളിനും ആ ട്രെൻഡ് നിലനിർത്താനാകും എന്നാണ് എല്ലാവരുടെയും പ്രതീക്ഷ. നിലവിൽ അല്ലു അർജുൻ ചിത്രം ഹാപ്പി ആണ് കേരളത്തിൽ പ്രദർശനം തുടരുന്ന റീ റിലീസ് ചിത്രം. തിയേറ്ററിന് അകത്തുനിന്നുള്ള സിനിമയുടെ ആഘോഷങ്ങളുടെയും ആരവങ്ങളുടെയും വിഡിയോകൾ ഇപ്പോൾ തന്നെ സോഷ്യൽ മീഡിയയിൽ വൈറലാണ്. പാട്ടുകൾക്കൊത്ത് ഡാൻസ് കളിക്കുകയും ഡയലോഗുകൾ ഏറ്റുപറയുകയും ചെയ്യുന്ന ആരാധകരുടെ വീഡിയോ ട്രെൻഡിങ്ങിലാണ്. 4K അൾട്ര ഇംപാക്റ്റ് ആണ് ചിത്രം റീ റിലീസിന് ഒരുങ്ങുന്നത്.
