മലയാള സിനിമയിൽ നൂറുശതമാനം വിജയനിരക്കുള്ള അപൂർവ്വം സംവിധായകരിൽ ഒരാളാണ് ദിലീഷ് പോത്തൻ. ‘മഹേഷിന്റെ പ്രതികാരം’, ‘തൊണ്ടിമുതലും ദൃക്സാക്ഷിയും’, ‘ജോജി’ എന്നീ മൂന്ന് ചിത്രങ്ങൾ മാത്രമാണ് കഴിഞ്ഞ പത്ത് വർഷത്തിനിടെ അദ്ദേഹം സംവിധാനം ചെയ്തത്. ഫഹദ് ഫാസിലിനെ നായകനാക്കി ഒരുക്കിയ ഈ മൂന്ന് ചിത്രങ്ങളും വലിയ വിജയങ്ങളായിരുന്നു. ജോജിക്ക് ശേഷം അഞ്ച് വർഷത്തെ ഇടവേളയിൽ ഒരുങ്ങുന്ന ദിലീഷ് പോത്തന്റെ അടുത്ത ചിത്രത്തിനായി വലിയ ആകാംക്ഷയോടെയാണ് സിനിമാപ്രേമികൾ കാത്തിരിക്കുന്നത്. ഈ ചിത്രത്തിൽ മോഹൻലാൽ നായകനാകുന്നുവെന്ന വാർത്തകൾ ഏറെക്കാലമായി പ്രചരിക്കുന്നുണ്ട്. ‘ദൃശ്യം 3’ റിലീസിന് മുന്നോടിയായി ആരാധകരുമായി നടത്തിയ സംവാദത്തിൽ ആന്റണി പെരുമ്പാവൂർ ആണ് ഈ പ്രോജക്റ്റ് ഉറപ്പിച്ചത്.
പിന്നാലെ നിർമ്മാതാവ് ഷിബു ബേബി ജോണും ചിത്രം ഔദ്യോഗികമായി സ്ഥിരീകരിച്ചിരുന്നു. വരും ദിവസങ്ങളിൽ സിനിമയുടെ ഔദ്യോഗിക പ്രഖ്യാപനം ഉണ്ടാകുമെന്നാണ് പ്രതീക്ഷിക്കുന്നത്.അടുത്ത ചിത്രത്തെക്കുറിച്ചുള്ള വിശേഷങ്ങൾ ഒരു അഭിമുഖത്തിൽ ദിലീഷ് പോത്തൻ തന്നെ പങ്കുവെച്ചിട്ടുണ്ട്. പോൾസണും ശ്യാമും ചേർന്ന് തിരക്കഥയൊരുക്കുന്ന ചിത്രം ഒരു ഡ്രാമ വിഭാഗത്തിൽ പെടുന്നതാണെന്നും, തന്റെ മുൻ ചിത്രങ്ങളിൽ നിന്ന് വ്യത്യസ്തമായിരിക്കുമെന്നും അദ്ദേഹം പറഞ്ഞു. നിലവിൽ പ്രീ-പ്രൊഡക്ഷൻ ജോലികളിലാണെന്നും, എഴുത്ത് പുരോഗമിക്കുകയാണെന്നും വ്യക്തമാക്കിയ ദിലീഷ് പോത്തൻ, കഥയിലെ വെല്ലുവിളികൾ ഏറ്റെടുക്കാൻ താൻ തയ്യാറെടുക്കുകയാണെന്നും കൂട്ടിചേർത്തു.
