നടൻ ഷാരൂഖ് ഖാനുമായി നടന്ന കൂടിക്കാഴ്ചയെക്കുറിച്ച് മനസുതുറന്ന് ഹോളിവുഡ് താരം ജേസൺ മൊമോവ. തങ്ങൾ പരസ്പരം ആരാധിക്കുന്നവരാണെന്നും തന്നെക്കാൾ മികച്ച നടനാണ് ഷാരൂഖ് ഖാൻ എന്നും പിങ്ക് വില്ലയ്ക്ക് നൽകിയ അഭിമുഖത്തിൽ ജേസൺ മൊമോവ പറഞ്ഞു. ‘വളരെ ഹാൻഡ്സം ആയ വ്യക്തിയാണ് ഷാരൂഖ് ഖാൻ. ഞങ്ങൾ രണ്ട് പേരും പരസ്പരം ആരാധിക്കുന്നവരാണ്. അദ്ദേഹം ഒരു ജന്റിൽമാൻ ആണ്. എന്നെക്കാളും മികച്ച നടനും പെർഫോമറും ആണ് അദ്ദേഹം’, ജേസൺ മൊമോവയുടെ വാക്കുകൾ. സൗദി അറേബ്യയിൽ നടന്ന ജോയ് അവാർഡ്സിൽ വെച്ചാണ് ഷാരൂഖ് ഖാനും ജേസൺ മൊമോവയും കണ്ടുമുട്ടുന്നത്.
ജേസൺ മൊമോവയുടെ വാക്കുകൾ നിമിഷനേരം കൊണ്ടാണ് വൈറലായത്. ഗെയിം ഓഫ് ത്രോൺസ്, അക്വാമാൻ, ഫാസ്റ്റ് ആൻഡ് ഫ്യൂരിയസ് തുടങ്ങിയ സിനിമകളിലൂടെ പ്രേക്ഷശ്രദ്ധ നേടിയ നടനാണ് ജേസൺ മൊമോവ. ഡി സി ചിത്രമായ സൂപ്പർഗേൾ, ഡ്യൂൺ ത്രീ എന്നിവയാണ് ഇനി പുറത്തിറങ്ങാനുള്ള ജേസൺ മൊമോവ ചിത്രങ്ങൾ. അതേസമയം, നിലവിൽ കിംഗ് എന്ന സിനിമയുടെ ഷൂട്ടിലാണ് ഷാരൂഖ് ഖാൻ. ഷാരൂഖ് ഖാനെ നായകനാക്കി സിദ്ധാർഥ് ആനന്ദ് ഒരുക്കുന്ന ആക്ഷൻ ചിത്രമാണ് കിംഗ്. പത്താൻ സിനിമയ്ക്ക് ശേഷം സിദ്ധാർഥ് ആനന്ദ് ഒരുക്കുന്ന മാസ്സ് ആക്ഷൻ ചിത്രമാണ് കിംഗ്. ചിത്രം ക്രിസ്മസ് റിലീസായി ഡിസംബർ 25 പുറത്തിറക്കാനാണ് അണിയറപ്രവർത്തകരുടെ പദ്ധതി.
ആദ്യം ഡിസംബർ 4 ന് ആയിരുന്നു റിലീസ് പദ്ധതിയിട്ടിരുന്നത്. എന്നാൽ നവംബർ അവസാന വാരം ബിഗ് ബജറ്റ് ചിത്രം രാമായണ പുറത്തിറങ്ങുന്നതിനാൽ ക്രിസ്മസിലേക്ക് റിലീസ് മാറ്റിവെക്കാൻ കിംഗ് ടീം തീരുമാനിക്കുകയായിരുന്നു എന്ന് ബോളിവുഡ് ഹങ്കാമ റിപ്പോർട്ട് ചെയ്യുന്നു. ഷാരൂഖ് ഖാന്റെ മകള് സുഹാനാ ഖാന് ആദ്യമായി ബിഗ് സ്ക്രീനിലെത്തുന്ന ചിത്രമെന്ന പ്രത്യേകതയും കിംഗിനുണ്ട്. ദീപിക പദുക്കോണ്, അഭിഷേക് ബച്ചന്, അനില് കപൂര് എന്നിവരും ചിത്രത്തില് പ്രധാനവേഷത്തില് എത്തുന്നുണ്ട്. വലിയ ബഡ്ജറ്റിൽ ഒരു ആക്ഷൻ ത്രില്ലറായി ഒരുങ്ങുന്ന സിനിമയ്ക്ക് മേൽ വലിയ പ്രതീക്ഷകളാണുള്ളത്. കിംഗിൻ്റെ സംഗീതം ഒരുക്കുന്നത് സച്ചിൻ ജിഗറും പശ്ചാത്തലസംഗീതം ചെയ്യുന്നത് അനിരുദ്ധ് ആണ്. സുജോയ് ഘോഷ് ആയിരുന്നു ചിത്രം ആദ്യം സംവിധാനം ചെയ്യാനിരുന്നത്. പിന്നീടത് സിദ്ധാർഥ് ആനന്ദ് ഏറ്റെടുക്കുകയായിരുന്നു.
