സിനിമാ ലോകത്ത് ഏറെ ചർച്ച ചെയ്യപ്പെടുകയും ഒപ്പം വിമർശനങ്ങൾ നേരിടുകയും ചെയ്ത കഥാപാത്രമായിരുന്നു അമല പോൾ അഭിനയിച്ച ‘ആടൈ’യിലേ വേഷം. എന്നാൽ അത്തരം സീനുകളിൽ അഭിനയിക്കുമ്പോൾ താൻ അനുഭവിച്ച മാനസികാവസ്ഥയെക്കുറിച്ചും അന്ന് തോന്നിയ ടൈപ്പ്കാസ്റ്റ് ചെയ്യപ്പെടുമോ എന്ന ഭയത്തെക്കുറിച്ചും അമല പോൾ തുറന്നുപറയുന്നു. ഇന്നായിരുന്നെങ്കിൽ അങ്ങനെ ഒരു കഥാപാത്രം ചെയ്യില്ലെന്നും അമല പറയുന്നു. ഇന്ത്യ ടുഡേയുടെ കോൺക്ലേവിലാണ് നടിയുടെ പ്രതികരണം. ‘ആടൈ’ സിനിമയിലെ ആ രംഗങ്ങളിൽ അഭിനയിക്കുമ്പോൾ എനിക്ക് സംവിധായകനെയും ക്യാമറമാനെയും പൂർണ്ണമായി വിശ്വസിക്കണമായിരുന്നു. ‘ഇതൊരു വൈകാരികമായ നല്ല സിനിമയാക്കാനാണോ ഇവർ ശ്രമിക്കുന്നത്, അതോ വെറും നഗ്നത കാണിക്കാൻ മാത്രമാണോ?’ എന്നതായിരുന്നു എന്റെ ഉള്ളിലെ പ്രധാന സംശയം.
എന്നാൽ ഇത് വളരെ ക്രിയേറ്റീവായാണ് ചിത്രീകരിക്കാൻ പോകുന്നതെന്ന് ഉറപ്പായതോടെ എനിക്ക് ആ വിശ്വാസം വന്നു. അതിനുശേഷം അത് ഞങ്ങൾക്കെല്ലാം വളരെ മനോഹരമായ ഒരു അനുഭവമായിരുന്നു. സെറ്റിൽ വളരെ കുറച്ചു ആളുകളെ മാത്രം നിർത്തി അവർ എന്നെ വളരെയധികം കംഫർട്ടബിൾ ആക്കി നിർത്തി. പക്ഷെ, ആ സമയത്ത് എന്റെ ഇമേജിനെക്കുറിച്ച് എനിക്ക് വലിയ പേടിയുണ്ടായിരുന്നു. ഇങ്ങനെയുള്ള കഥാപാത്രങ്ങളിൽ മാത്രം ഞാൻ ഒതുങ്ങിപ്പോകുമോ എന്ന ഭയം എനിക്കുണ്ടായിരുന്നു. അതുകൊണ്ടുതന്നെ ഇത്തരം കൂടുതൽ സിനിമകൾ ചെയ്യാൻ ഞാൻ ആഗ്രഹിച്ചതുമില്ല. അങ്ങനെയൊരു രംഗം ഇന്ന് ചെയ്യുമോ എന്ന് ചോദിച്ചാൽ, ഇനി ഞാൻ അത് ചെയ്യില്ല; അമല പോൾ പറഞ്ഞു.
രത്‌ന കുമാറിന്റെ സംവിധാനത്തില്‍ 2019ല്‍ പുറത്തിറങ്ങിയ സിനിമയാണ് ‘ആടൈ’. ശക്തമായ അഭിനയ മുഹൂര്‍ത്തത്തിലൂടെ അമല തിളങ്ങിയ ചിത്രമായിരുന്നു അത്. എന്നാല്‍ ബോക്‌സ് ഓഫീസില്‍ ചലനം സൃഷ്ടിക്കാന്‍ സിനിമക്ക് കഴിഞ്ഞില്ല. വലിയ തരത്തിലുള്ള വിമര്‍ശനങ്ങള്‍ അമലക്ക് അന്ന് നേരിടേണ്ടി വന്നിരുന്നു.
