ഓടും കുതിര ചാടും കുതിര പ്രേക്ഷകരുടെ ഇടയിൽ കണക്ട് ആകാതെ പോയതിനെക്കുറിച്ച് ഫഹദ് ഫാസിൽ. സിനിമയുടെ സ്ക്രിപ്റ്റ് സ്ട്രക്ച്ചർ ചെയ്യുന്നതിൽ വീഴ്ച സംഭവിച്ചെന്നും തന്റെ ഡിപ്രഷനെക്കുറിച്ച് സംസാരിക്കുന്ന സിനിമയിൽ മറ്റൊരു കഥാപാത്രത്തിലൂടെ പറയാൻ ശ്രമിച്ചതാണ് തെറ്റായി പോയതെന്ന് ഫഹദ് പറഞ്ഞു. പക്ഷേ താൻ ഏറ്റവും ഇഷ്ടപ്പെട്ട് ചെയ്ത സിനിമയാണ് ഓടും കുതിര ചാടും കുതിര എന്നും ഫഹദ് കൂട്ടിച്ചേർത്തു. ഗലാട്ട പ്ലസിന് നൽകിയ അഭിമുഖത്തിലാണ് ഫഹദ് ഇക്കാര്യം പറഞ്ഞത്.
‘ഓടും കുതിര ചാടും കുതിര സ്ക്രിപ്റ്റ് സ്ട്രക്ച്ചർ ചെയ്യുന്നതിൽ ഞങ്ങൾക്ക് വീഴ്ച പറ്റി, ഉദ്ദേശിച്ചത് അബി എന്ന കഥാപാത്രത്തിന്റെ കഥ പറയാനാണ്, പക്ഷേ അത് വേറൊരു ആളുടെ അനുഭവങ്ങളിലൂടെയാണ് കാണിക്കുന്നത്. എൻ്റെ മാനസിക വിഷമങ്ങളെയും ഡിപ്രഷനെയും പറ്റി തന്നെയാണ് സംസാരിക്കുന്നത്, പക്ഷേ അത് മറ്റൊരു പെൺകുട്ടിയുടെ ഡിപ്രഷനിലൂടെ കാണിക്കാനാണ് ഞങ്ങൾ ശ്രമിച്ചത്. അത് വർക്ക് ആയില്ലെന്നാണ് എന്റെ കണ്ടെത്തൽ, അല്ലെങ്കിൽ ആ പെൺകുട്ടിയുടെ കഥ കാണിച്ച ശേഷം എന്റേത് കാണിച്ചാൽ മതിയായിരുന്നു. എനിക്ക് ഒത്തിരി ഇഷ്ടപ്പെട്ട് ചെയ്ത ഒരു സിനിമയായിരുന്നു അത്’, ഫഹദ് പറഞ്ഞു.
തിയേറ്ററിൽ സമ്മിശ്ര പ്രതികരണം നേടിയ ചിത്രമായിരുന്നു ഓടും കുതിര ചാടും കുതിര. എന്നാൽ ചിത്രത്തിന്റെ ഒടിടി റിലീസിന് നിരവധി മികച്ച അഭിപ്രായങ്ങൾ സോഷ്യൽ മീഡിയയിൽ വന്നിരുന്നു. അൽത്താഫ് സലിം സംവിധാനം ചെയ്ത ചിത്രത്തിൽ ഫഹദിനൊപ്പം കല്യാണി പ്രിയദര്ശനാണ് നായികയായി അഭിനയിച്ചത്. ധ്യാൻ ശ്രീനിവാസൻ, വിനയ് ഫോർട്ട്‌, ലാൽ, രണ്‍ജി പണിക്കർ, റാഫി, ജോണി ആന്റണി, സുരേഷ് കൃഷ്ണ, നന്ദു, അനുരാജ്, ഇടവേള ബാബു, ബാബു ആന്റണി, വിനീത് ചാക്യാർ, സാഫ് ബോയ്, ലക്ഷ്മി ഗോപാലസ്വാമി, ആതിര നിരഞ്ജന തുടങ്ങിയവരാണ് സിനിമയിലെ മറ്റു പ്രധാന വേഷങ്ങളിലെത്തുന്നത്.
അതേസമയം, ഫഹദ് ഫാസിൽ നായകനായി എത്തുന്ന ഡോണ്ട് ട്രബിൾ ദി ട്രബിൾ ഒക്ടോബർ 2ന് ആഗോളതലത്തിൽ തിയേറ്ററുകളിൽ എത്തും. ബാലതാരം സാറ പാലേക്കർ, സൗരഭ് സച്ദേവ് എന്നിവർ പ്രധാന കഥാപാത്രങ്ങളിലെത്തുന്ന ‘ഡോണ്ട് ട്രബിൾ ദി ട്രബിൾ’ ശശാങ്ക് യെലേട്ടിയാണ് സംവിധാനം ചെയ്യുന്നത്. എസ്.എസ്. രാജമൗലി അവതരിപ്പിക്കുന്ന ചിത്രം എസ്.എസ്. കാർത്തികേയ, ഷോബു യാർലഗഡ്ഡ, പ്രസാദ് ദേവിനേനി എന്നിവർ ചേർന്നാണ് നിർമ്മിക്കുന്നത്.ഭാവനാ റിലീസാണ് ചിത്രം കേരളത്തിലെ വിതരണം നിർവഹിക്കുന്നത്.
