കെജിഎഫ് എന്ന ബ്രഹ്മാണ്ഡ സിനിമയ്ക്ക് ശേഷം യഷ് നായകനായി എത്തുന്ന ചിത്രമാണ് ‘ടോക്സിക്’. ഗീതു മോഹൻദാസ് ആണ് സിനിമ സംവിധാനം ചെയ്യുന്നത്. സിനിമയുടെ ടീസർ പുറത്തുവന്നിരിക്കുകയാണ്. വമ്പൻ ബജറ്റിലുള്ള ഒരു പക്കാ ആക്ഷൻ ചിത്രമാകും ടോക്സിക് എന്ന സൂചനയാണ് ടീസർ നൽകുന്നത്. ഗീതു മോഹൻദാസിന്റെ മുൻ സിനിമകളിൽ നിന്ന് മാറി ആക്ഷനും വയലൻസിനും സിനിമയിൽ വലിയ പ്രാധാന്യമുണ്ടാകും. ഇപ്പോഴിതാ വിജയ് ചിത്രമായ ദി ഗോട്ടും ടോക്സിക്കും തമ്മിലുള്ള കണക്ഷൻ കണ്ടെത്തിയിരിക്കുകയാണ് ആരാധകർ.
ടോക്സികിന്റെ ടീസറിൽ യഷിന്റെ കഥാപാത്രം ‘It’s over when I say It’s over’ എന്ന് പറയുന്നുണ്ട്. ഇതേ ഡയലോഗ് തന്നെ വെങ്കട്ട് പ്രഭു സംവിധാനം ചെയ്തു വിജയ് നായകനായി എത്തിയ ഗോട്ടിലും കാണാം. സിനിമയുടെ പോസ്റ്റ് ക്രെഡിറ്റ് സീനിൽ വിജയ്യുടെ ജീവൻ എന്ന കഥാപാത്രം സ്ക്രീനിലേക്ക് നോക്കി ‘Game is over only when I say It’s over’ എന്ന് പറയുന്നുണ്ട്. ഈ രണ്ട് ഡയലോഗും ഒന്നാണെന്ന് കണ്ടെത്തിയിരിക്കുകയാണ് ആരാധകർ. വിജയ്യുടെ ഡയലോഗിനെ യഷ് കോപ്പിയടിച്ചു എന്നാണ് ചിലർ എക്സിലൂടെ കുറിക്കുന്നത്. ചിത്രത്തിൽ യഷ് ഇരട്ട വേഷത്തിലാണ് എത്തുന്നതെന്ന സൂചനയാണ് ടീസർ നൽകുന്നത്. ടീസറിന്റെ അവസാനം പുതിയ ലുക്കിലുള്ള യഷിനെ കാണാനാകും. പക്കാ ഹോളിവുഡ് സിനിമയെന്ന് തോന്നിപ്പിക്കുന്ന തരം വിഷ്വലുകൾ ആണ് സിനിമയിൽ ഉള്ളതെന്ന സൂചനയാണ് ടീസർ നൽകുന്നത്.
ഈ വർഷം മാർച്ച് 19 ന് ചിത്രം ആഗോളതലത്തിൽ റീലീസ് ചെയ്യുമെന്ന് നിർമാണ കമ്പനിയായ കെ വി എൻ പ്രൊഡക്ഷൻസ് അറിയിച്ചു. സിനിമ ഒരേസമയം കന്നഡയിലും ഇംഗ്ലീഷിലുമാണ് ഒരുങ്ങുന്നത്. ടോക്സിക് പറയുന്ന കഥയ്ക്ക് ആഗോള സ്വഭാവമുളളതിനാൽ ഇതൊരു പാൻ വേൾഡ് സിനിമയായി ഒരുക്കുക എന്ന തീരുമാനത്തിലാണ് അണിയറപ്രവർത്തകർ. ഇതിനാലാണ് കന്നഡയിലും ഇംഗ്ലീഷിലും ഒരേസമയം ചിത്രീകരിക്കുന്നത് എന്നാണ് റിപ്പോർട്ട്. മാത്രല്ല മറ്റ് ഇന്ത്യൻ ഭാഷകളിലേക്ക് സിനിമ ഡബ് ചെയ്യുന്നുണ്ട്.
കെ വി എൻ പ്രൊഡക്ഷൻസിന്റെ ബാനറിൽ വെങ്കട്ട് കെ നാരായണയും മോൺസ്റ്റർ മൈൻഡ് ക്രിയേഷൻസും ചേർന്നാണ് ടോക്സിക് നിർമ്മിക്കുന്നത്. യഷിന്റെ 19-ാം സിനിമയാണിത്. ‘എ ഫെയറി ടെയിൽ ഫോർ ഗ്രോൺ-അപ്സ്’ എന്നാണ് ചിത്രത്തിന്റെ ടാഗ് ലൈൻ. നേരത്തെ യഷും ഗീതുവും തമ്മില് അഭിപ്രായവ്യത്യാസം ഉണ്ടായിരുന്നു എന്നും സിനിമയുടെ ചിത്രീകരണം നിര്ത്തിവെച്ചു എന്നും റിപ്പോര്ട്ടുകള് ഉണ്ടായിരുന്നു. എന്നാല് തുടര്ന്ന് ഇതില് വിശദീകരണം എന്നവണ്ണം ചിത്രത്തിന്റെ റിലീസ് പോസ്റ്ററുമായി നിര്മാതാക്കള് എത്തിയിരുന്നു.
