തീയേറ്ററുകളിൽ വലിയ തരംഗം സൃഷ്ടിച്ച അനശ്വര രാജൻ – അബിഷൻ ജീവിന്ത് ചിത്രം ‘വിത്ത് ലവ്’ ഒടിടി സ്ട്രീമിംഗിന് തയ്യാറെടുക്കുന്നു. വെറും 4 കോടി രൂപ ബജറ്റിൽ നിർമ്മിച്ച് ആഗോളതലത്തിൽ 40 കോടിയോളം രൂപ കളക്ഷൻ നേടിയ ഈ റൊമാന്റിക് ഡ്രാമ നാളെ (മാർച്ച് 6) മുതൽ പ്രമുഖ ഒടിടി പ്ലാറ്റ്ഫോമായ നെറ്റ്ഫ്ലിക്സിൽ സ്ട്രീമിംഗ് ആരംഭിക്കും. സൂപ്പർതാരം രജനീകാന്തിന്റെ മകൾ സൗന്ദര്യ രജനീകാന്തിന്റെ സിയോൺ ഫിലിംസും എംആർപി എന്റർടെയ്ൻമെന്റും ചേർന്നാണ് ഈ ബിഗ് ഹിറ്റ് ചിത്രം നിർമ്മിച്ചിരിക്കുന്നത്. ഫെബ്രുവരി ആറിന് റിലീസ് ചെയ്ത ചിത്രം തീയേറ്ററുകളിൽ നിന്ന് മികച്ച പ്രതികരണമായിരുന്നു നേടിയത്.
തമിഴിലെ ഈ വർഷത്തെ ബ്ലോക്ക്ബസ്റ്ററായ ‘ടൂറിസ്റ്റ് ഫാമിലി’യുടെ സംവിധായകൻ അബിഷൻ ജീവിന്ത് ആദ്യമായി നായകനായി അരങ്ങേറ്റം കുറിച്ച ചിത്രം കൂടിയാണിത്. ‘ലവർ’, ‘ടൂറിസ്റ്റ് ഫാമിലി’ എന്നീ ശ്രദ്ധേയ ചിത്രങ്ങളിൽ അസോസിയേറ്റ് ഡയറക്ടറായിരുന്ന മദൻ ആണ് ‘വിത്ത് ലവ്’ സംവിധാനം ചെയ്തിരിക്കുന്നത്. മലയാളികളുടെ പ്രിയതാരം അനശ്വര രാജന്റെ സാന്നിധ്യം ചിത്രത്തിന് വലിയ സ്വീകാര്യത നൽകി. ഹരിഷ് കുമാർ, കാവ്യ അനിൽ, സച്ചിൻ നാച്ചിയപ്പൻ എന്നിവരടങ്ങുന്ന താരനിരയും പ്രണയത്തിനും കോമഡിക്കും പ്രാധാന്യം നൽകി ഒരുക്കിയ ഈ ചിത്രത്തിന്റെ വിജയത്തിൽ വലിയ പങ്ക് വഹിച്ചിട്ടുണ്ട്.
സാങ്കേതിക മികവ് കൊണ്ടും ശ്രദ്ധേയമായ ചിത്രത്തിന് സംഗീതം നൽകിയിരിക്കുന്നത് പ്രശസ്ത സംഗീത സംവിധായകൻ ഷോൺ റോൾഡനാണ്. ശ്രേയസ് കൃഷ്ണയുടെ ഛായാഗ്രഹണവും സുരേഷ് കുമാറിന്റെ എഡിറ്റിംഗും ചിത്രത്തിന് കരുത്തേകി. ഗുഡ് നൈറ്റ്, ലവർ തുടങ്ങിയ ഹിറ്റുകൾ സമ്മാനിച്ച എംആർപി എന്റർടെയ്ൻമെന്റ് സൗന്ദര്യ രജനീകാന്തുമായി കൈകോർത്തപ്പോൾ മറ്റൊരു അവിസ്മരണീയ ദൃശ്യാനുഭവം കൂടി സിനിമാപ്രേമികൾക്ക് ലഭിച്ചു. തിയേറ്ററുകളിൽ ചിത്രം കാണാൻ സാധിക്കാത്തവർക്കായി നാളെ മുതൽ ഡിജിറ്റൽ സ്ക്രീനുകളിൽ പ്രണയത്തിന്റെ ഈ പുതിയ കഥ ലഭ്യമാകും.
