കോടീശ്വരന്മാരെ സൃഷ്ടിക്കുന്ന ഗെയിം ഷോയായ ‘കോൻ ബനേഗാ ക്രോർപതി’യുടെ (കെ.ബി.സി) 18-ാം സീസൺ ചിത്രീകരണത്തിനിടെ പ്രശസ്ത ചലച്ചിത്ര താരം അമിതാഭ് ബച്ചന് പരിക്കേറ്റു. സെറ്റിൽ വെച്ച് തെന്നിവീണ താരത്തിന് മുട്ടിനാണ് പരിക്കേറ്റിരിക്കുന്നത്. പരിപാടിയുടെ പുതിയ എപ്പിസോഡിന്റെ ഷൂട്ടിംഗിനിടയിലാണ് അപ്രതീക്ഷിത സംഭവമുണ്ടായത്.പതിവായി സ്റ്റേജിന്റെ മധ്യത്തിൽ നിന്നു സംസാരിക്കുന്ന ബിഗ് ബി, ബുധനാഴ്ചത്തെ (സെപ്റ്റംബർ 30) എപ്പിസോഡിൽ തന്റെ സ്ഥിരം കസേരയിൽ ഇരുന്നുകൊണ്ടാണ് ഷോ ആരംഭിച്ചത്. ഇത് കണ്ട് ആരാധകർക്കിടയിൽ സംശയവും ആശങ്കയും ഉയർന്നിരുന്നു. തുടർന്നാണ് താരം തനിക്കേറ്റ പരിക്കിനെക്കുറിച്ച് ആരാധകരോട് തുറന്നുപറഞ്ഞത്.
”എനിക്ക് മുട്ടിന് പരിക്കുണ്ട്. ചിത്രീകരണത്തിനിടെ തെന്നി വീഴുകയായിരുന്നു. എഴുന്നേറ്റു നിൽക്കാൻ ചെറിയ ബുദ്ധിമുട്ടുള്ളതുകൊണ്ടാണ് ഇന്ന് ഇരുന്ന് സംസാരിക്കുന്നത്” -ബച്ചൻ പരിപാടിയിൽ വ്യക്തമാക്കി. എങ്കിലും പരിക്കു ഗുരുതരമല്ലെന്നും ചികിത്സയ്ക്കുശേഷം ഉടൻതന്നെ പൂർണ്ണ ആരോഗ്യത്തോടെ തിരിച്ചെത്തുമെന്നും അദ്ദേഹം ആരാധകർക്ക് ഉറപ്പുനൽകി. 83-ാം വയസ്സിലും കഠിനാധ്വാനത്തോടെയും സമർപ്പണത്തോടെയും ഷൂട്ടിംഗിൽ പങ്കെടുക്കുന്ന താരത്തിന്റെ ആരോഗ്യത്തിനായി രാജ്യത്തുടനീളമുള്ള ആരാധകർ പ്രാർത്ഥനയോടെ കാത്തിരിക്കുകയാണ്.
