മലയാളത്തിൽ സീക്വലുകളുടെ തരംഗം തുടരുന്നതിനിടെ തീയറ്ററുകളിൽ എത്തിയ മോഹിനിയാട്ടം ബോക്സ് ഓഫീസിൽ മികച്ച മുന്നേറ്റം നടത്തുന്നു. 2024-ൽ പുറത്തിറങ്ങിയ ഭരതനാട്യം എന്ന സിനിമയുടെ രണ്ടാം ഭാഗമായി എത്തിയ ഈ ചിത്രം ആദ്യ ഭാഗത്തിൽ നിന്ന് വ്യത്യസ്തമായി ഒരു ഡാർക്ക് കോമഡി ത്രില്ലർ എന്ന നിലയിലാണ് പ്രേക്ഷകരിലേക്ക് എത്തിയത്. ഏപ്രിൽ 10-ന് റിലീസ് ചെയ്ത ചിത്രത്തിന് മികച്ച മൗത്ത് പബ്ലിസിറ്റിയാണ് ലഭിച്ചുകൊണ്ടിരിക്കുന്നത്. റിലീസ് ദിനത്തിൽ 52 ലക്ഷം രൂപ കേരളത്തിൽ നിന്ന് നേടിയ ചിത്രം, റിലീസിനേക്കാൾ വലിയ കളക്ഷനാണ് തുടർന്നുള്ള ദിവസങ്ങളിൽ സ്വന്തമാക്കിയത്.
ആദ്യ നാല് ദിവസങ്ങൾ പിന്നിടുമ്പോൾ കേരളത്തിൽ നിന്ന് മാത്രം ചിത്രം 3.62 കോടി രൂപ സ്വന്തമാക്കിയതായാണ് ട്രാക്കർമാർ നൽകുന്ന വിവരം. രണ്ടാം ദിനം 81 ലക്ഷവും മൂന്നാം ദിനം 1.2 കോടിയും നേടിയ ചിത്രം നാലാം ദിനത്തിലും ഒരു കോടിക്ക് മുകളിൽ (1.09 കോടി) കളക്ഷൻ നിലനിർത്തി. അവധിക്കാലമായതിനാൽ വരും ദിവസങ്ങളിലും തീയറ്ററുകളിൽ തിരക്ക് വർദ്ധിക്കുമെന്നാണ് അണിയറക്കാരുടെ പ്രതീക്ഷ. ആദ്യ ഭാഗത്തിലെ ഭരതൻ നായരുടെ മരണശേഷം ശശിധരനും കുടുംബവും നേരിടുന്ന പുതിയ പ്രശ്നങ്ങളും അവയിൽ നിന്നുള്ള രക്ഷപ്പെടലുകളുമാണ് സംവിധായകൻ കൃഷ്ണദാസ് മുരളി ഈ ഭാഗത്തിൽ രസകരമായി അവതരിപ്പിച്ചിരിക്കുന്നത്.
സൈജു കുറുപ്പ് എന്റർടൈൻമെന്റ്സും തോമസ് തിരുവല്ല ഫിലിംസും ചേർന്ന് നിർമ്മിച്ച ഈ ചിത്രത്തിൽ സൈജു കുറുപ്പിനൊപ്പം സുരാജ് വെഞ്ഞാറമൂട്, ജഗദീഷ്, വിനയ് ഫോർട്ട്, ബേബി ജീൻ തുടങ്ങി വലിയൊരു താരനിര തന്നെ അണിനിരക്കുന്നുണ്ട്. ശശിധരന്റെയും കുടുംബത്തിന്റെയും അസാധാരണമായ അവസ്ഥകൾ പൊട്ടിച്ചിരിയുടെ മേമ്പൊടിയോടെ അവതരിപ്പിച്ചതാണ് കുടുംബപ്രേക്ഷകരെ തീയറ്ററിലേക്ക് ആകർഷിക്കുന്നത്. ലിനി മറിയം ഡേവിഡ്, അനുപമ ബി. നമ്പ്യാർ എന്നിവർ നിർമ്മിച്ച ഈ ചിത്രം മികച്ച പ്രമേയം കൊണ്ടും അവതരണം കൊണ്ടും ഈ വർഷത്തെ ശ്രദ്ധേയമായ ഹിറ്റുകളിലൊന്നായി മാറുകയാണ്.
