ആന്റണി വർഗീസിനെ നായകനാക്കി നവാഗതനായ പോൾ ജോർജ് സംവിധാനം ചെയ്യുന്ന ബ്രഹ്മാണ്ഡ ആക്ഷൻ ചിത്രം ‘കാട്ടാളന്റെ’ ട്രെയ്ലർ പുറത്തിറങ്ങി. ഇന്ത്യൻ സിനിമാ ചരിത്രത്തിൽ തന്നെ ആദ്യമായി മൂന്ന് വ്യത്യസ്ത പശ്ചാത്തല സംഗീതങ്ങളിൽ ട്രെയ്ലർ ആസ്വദിക്കാം എന്ന പ്രത്യേകതയോടെയാണ് ഇത് എത്തിയിരിക്കുന്നത്. ‘കെജിഎഫ്’, ‘സലാർ’ തുടങ്ങിയ ചിത്രങ്ങളിലൂടെ പ്രശസ്തനായ രവി ബസ്റൂർ ഒരുക്കിയ ‘ഒറിജിനൽ ജംഗിൾ ബീസ്റ്റ്’, ‘കാറ്റലൻ വൈൽഡ് ബീസ്റ്റ്’, ‘ഹൗസ ഓഷ്യൻ ബീസ്റ്റ്’ എന്നീ മൂന്ന് തീമുകൾ പ്രേക്ഷകർക്ക് ഇഷ്ടാനുസരണം തിരഞ്ഞെടുത്ത് ട്രെയ്ലർ കാണാൻ സാധിക്കും.
ക്യൂബ്സ് എന്റർടൈൻമെന്റ്സിന്റെ ബാനറിൽ ഷെരീഫ് മുഹമ്മദ് നിർമ്മിക്കുന്ന ഈ ചിത്രം മലയാള സിനിമയിലെ തന്നെ ഏറ്റവും വലിയ ആക്ഷൻ വിരുന്നായിരിക്കുമെന്ന സൂചനയാണ് ട്രെയ്ലർ നൽകുന്നത്. രാജ്യാന്തര പ്രശസ്തനായ ആക്ഷൻ കൊറിയോഗ്രാഫർ കെച്ച കെംബാക്ഡിയുടെ നേതൃത്വത്തിൽ തായ്ലന്റിൽ വെച്ചാണ് ചിത്രത്തിലെ പ്രധാന സംഘട്ടന രംഗങ്ങൾ ചിത്രീകരിച്ചിരിക്കുന്നത്. ‘ഓങ് ബാക്ക്’ സിനിമകളിലൂടെ ശ്രദ്ധേയനായ ‘പോങ്’ എന്ന ആനയും ചിത്രത്തിൽ ഒരു പ്രധാന വേഷത്തിൽ എത്തുന്നുണ്ട് എന്നത് ആക്ഷൻ പ്രേമികളെ ആവേശത്തിലാക്കുന്ന കാര്യമാണ്.
പാൻ ഇന്ത്യൻ റിലീസായി എത്തുന്ന ചിത്രത്തിൽ തെന്നിന്ത്യൻ താരം ദുഷാര വിജയൻ, തെലുങ്ക് താരം സുനിൽ, ബോളിവുഡ് താരം പാർഥ് തിവാരി എന്നിവർക്കൊപ്പം ജഗദീഷ്, സിദ്ദിഖ് തുടങ്ങിയ വലിയ താരനിര തന്നെ അണിനിരക്കുന്നു. ‘ചെകുത്താന്റെ പ്ലാൻ തെറ്റിക്കുന്നതാ ദൈവത്തിന് ഇഷ്ടം’ എന്ന പവർഫുൾ ഡയലോഗോടെ എത്തുന്ന ട്രെയ്ലർ ഇതിനോടകം സോഷ്യൽ മീഡിയയിൽ തരംഗമായിക്കഴിഞ്ഞു. മെയ് 14-ന് ചിത്രം ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും.
